08.11.2015

Wos woa des heite fia a Wetter? Mehr als 20 Grad, permanenter Sonnenschein und fost scho a Badewetter. Jo, ois recht leiwaund, olladings a wengl komisch wenn ma bedenkt, dass wir in 1einhalb Monaten scho Weihnachten feiern.

Irgendwie is dieses Wetter australisch. Do geht ma zu Weihnochtn a gach ins Meer schwimman, weus so haß und die Klimaanlage im Oarsch is.

I hob den heutigen Tag jedenfois perfekt genutzt.

Vor a boa Tog hob i jo scho die Wettervorhersage gheat. Denan kaunst owa normalerweise so vü vatrauen wie ana Hua, de dir sogt, dass nur dich liebt und mit kan aundan im Puff verkehrt. Na ned no na.

Wie auch immer, sicherheitshoiwa bin i hoit fruah aufgstaundn, hob ausm Fenster gschaut und an bratn Grinser im Gsicht griagt. Die Sunn hot ma ins Gsicht ghatzt wie seit Wochen nimma. I bin nur in da Unterhose (Rawrrr) auf meina Terrassn gstaundn und mir is haß woan. Und des im November! Bockst es?

Wos mocht a Mensch wie i bei dem Wetter? Spazieren im Stadtpark? Die schöne Hauptstadt anschauen? A Tog im Tiergarten Schönbrunn?Gehts scheißen, Wean kau ma aun suichen Togen gstuin bleim, de Stodt siech i jedn Tog. Bei so an Wetter gibt’s nur ans wos da menschliche Körper braucht: Freiheit!

Und wo griagt ma diese Freiheit? Meistens bei ana Bank wennst es überfällst, mit a boa Millionen aussekreust, nie dawischt wirst und dei Lem auf ana Südsee Insel vabringst. Owa jo, des is leichter gesagt als getan.

I find mei persönliche Freiheit immer in der Natur. Und zwar in der höher gelegenen Natur. Desweng bin i in mei zweite Heimat gfoahrn und auf die Rax gewandert. Olladings woa i ned da anzige, sehr vüle Wiener Kollegen hom si aunscheinend fias gleiche entschieden, wobei etliche Richtung Hoche Waund und Schneeberg obbong san. Na Gott lob.

Trotzdem woas gsteckt vui bei die Parkplätze. Scheiß au, auffekumman samma scho imma.

Endlich oben angekommen. Wetter is weidahin traumhoft, wundersche woam und die Luft is afoch genial. So richtig wundersche. Ma nimmt a boa tiafe Lungenzüge und glaubt, dass da Körper vo sämtlichen Giftstoffen gereinigt wurde.

Auf des hob i ma glei moi a Tschick auzundn, die Aussicht genossen und genüsslich graucht. Es wird hoit zur Sucht und warum suit ma oide Gewohnheiten aufgem?

I bin ziellos auf da Rax herumgaungan. I hob ka Frau und kane Kinder, oiso bahoat gsogd niemanden der mi aufd Gachn vermissen könnte. Desweng hob i alle Zeit der Wöd ghobt und hob diese stressfreie Zeit genossen. In da Oaweit geht’s eh grod drunter und drüwa, so wie jedes Joahr um de Zeit, do san suiche Tage wie der heutige Sonntag a göttlicher Segen fürs Wohlbefinden.

Mit meine fost 53 Joahr (nur mehr 1 Monat und 4 Tog) bin i auf die Felsn rumghupft wie in meina Jugend, weu im Herzen bin i eh no immer da junge Hawara vo friacha. Scheiß auf de grauen Hoar, des san Reifeflecken….  :)

Fia maunche Leid is des vielleicht a gaunz normale Waunderung auf an Weg den ma scho 1000moi gaungan is, fia mi is jedoch jedes moi a neues, einzigartiges Ereignis. Es zagt mir immer wieder, dass wir in ana wunderschönen Welt leben. Zumindest wennst in da Natur bist, in Wean söwa kummt ma maunchmoi ehrlich gsogd es Speim. Und aufm Mars kennt is ma a ned so sche vorstön. Lauter rote Stana, des is jo a fad.

Aun suichn Tagen wie heite gibt’s nur mich, mi, und mi söbst. Kan Stress, kane Sorgen, kane Schmerzen, kane aundaren Probleme, nur den Drang zum Prunzen, der is allgegenwärtig.

Aun suichn Tagen wie heite leb i a total gsund, do gibt’s kan Tropfen Alkohol den i zu mir nehme. Normalerweise is es total sche, wenn ma si am Rande der Felswand hihuckt, a Punti aussahuit, die Aussicht genießt und die Stimmbandln a bissl mitn Bier eischmiert. Echt lässig, des stimmt scho, owa a normales Wossa reicht do a aus. Is a leichter zum Transportieren.

In solchen Momenten, wenn i die Laundschoft in da Nähe betrachte, denk i immer intensiv üwas Leben und üwa mi söbst noch. Bin i mit mir söbst zufrieden? Moch i ois richtig? Wos moch i foisch? Und wos kau i besser mochn?

Sowos kau i wirklich jedem empfehlen! Danoch kumm i immer ois total entspannter und zufriedener Mensch vom Berg zruck. I brauch kan Wellness Urlaub, i brauch die Bergluft und a schene Aussicht.

Es Anzige wos ma immer wieder auffoit und a wengl wehtuat wenn i so unterwegs bin: I brauch wieder an Hund! Dafia mangelts owa leider aun da Zeit. Ois Lehrer woa des no wos aundares, owa am Bau host ned so vü Freizeit. Egal, mir taugts total, i bin zufrieden und kau mi somit a ned beschweren.

Wenn i moang ned hackln miasat, daun warad i heite mit an Zöt auffegwaundat, hätts aufbaut, a Lagerfeuer gmocht, a Floschn Jägermeister (wennst schlofn gehst is erlaubt!) und Grüwirschtln mitgnumman und fia a Nocht die Freiheit komplett genossen. Schene Griaß aun den Christian bei dera Stelle, du host sowos moi gmocht und des find i total super – muas i a moi prowian. Bin stuiz auf di! :)

Und wos hobts ihr heite so gmocht?