A sehr heikles Thema üwa des si fost niemand reden traut, obwuihs so vüle Leid in unsan Laund betrifft: Alkoholmissbrauch in der Familie!

Es gibt leida vü zu vüle Fälle bei denen da Voda noch da Oaweit gach zum Wirten foahrt, si an einesauft und daun vuifett hamkummt um sei augsoffane Wut aun da Familie auszulossn. Grod in da Kindheit bzw. in da Jugend is des extremst schlimm.

I woa davo zum Glick vaschont. Hin und wieda is mei Papa natialich mit an Rausch wie a Oberlehrer hamkumman, owa mehr ois glocht hot er do ned. Er is nie gewalttätig woan, hot uns nie gschimpft oda sunst iagandwos. Und i bin dermaßen froh, dass i so a immenses Glück ghobt hob. Spätastens in meina Zeit ois Lehrer is ma aufgfoin, dass des bei mir ois aundare ois söbstvaständlich woa.

Heit mecht i eich a Gschicht aus meina Zeit ois Lehrer dazöhn:

Es woa mei erstes Joahr aun da Schui und i hob die erste Klass ana dreijährigen Fachschule in Englisch unterrichten diafn. I bin wia i bin, so wie i mi online gib, so woa i a (meistens hoit) in da Schui – a gmiatlicha Hawara mit demst a Murdsgaude hom host kennan. Nur woa i in da Schui hoit die Respektperson, wer des ned eigsehng hot, der hot a wengl a Pech ghobt.

Da Markus (Name geändert) woa mei bester Schüler in Englisch. Egal wie schwa die Vokabeltests, mündlichen Wiederholungen und Schularbeiten a woan, da Markus hot imma olle Punkte ghobt. Punkto Englisch woa der a Genie wenn ma des so song deaf. Und er hot imma brav mitgearbeitet, imma aufzagt und gaunz vü Smalltalk mit mir gmocht. Theoretisch hätt er ob November nix mehr mochn miasn, weu er aufgrund seiner Mitarbeitsplus den 1er im Zeugnis so guat wie fix ghobt hot. Praktisch hots aundast ausgschaut.

Am Aufaung vom zweitn Hoibjoahr hot a si verändert. Er hot nix mehr gredet und neama aufzagt im Unterricht. Guat, sui ma recht sei, er kau sis eh leisten und wir hom a ned imma Lust ghobt zum Mitoaweitn. Daun woa da erste Vokabeltest do und da Markus hot auf amoi a Genügend gschriem, oaschknopp am Fetzn vorbei. Auf mei Nochfrog wos mit eam los is, hot er nur die Schuitan zuckt. I hob ma docht, dass er Liebeskummer oder sowos hot.

Schularbeit! Meine Schüler hom eine Woche vorm Test den Stoff griagt und so umfaungreich und schwer woa des ned. Da Markus is am Tog der Schularbeit mit an großn blauen Fleck bei da Schläfn erschienan. Auf mei Nochfrog hot er nur gsogd, dass des a Soch „zwischn eam und mir“ is. Guat, wie er mant.

Schularbeit is gschriem, olle gem ob und i ziag mi ins Lehrerzimmer zruck und faung mitn kontrolliern au.

Und do woa die Überraschung: Da Markus hot an bombenfetzen biblischen Ausmaßes ghobt. Jetza hots ma greicht, der Bua woa am bestn Weg sei Noten total zu versauen. Oiso bin i gach ind Klass gaungan, hob die Lehrerin gfrogt, ob i ma den Markus gach ausborgn kennt und hob mi mit eam in a leere Klass ghuckt.

I: „Markus wos is los mit dir? Du bist total stü woan, host an simplen Vokabeltest vahaut und dei Schularbeit is a historischer Fetzen obwuih du mit Obstaund da Gscheidaste in da Klass bist! Wüsd du mir irgendwos song?“

Da Markus hot mi mit wässrige Augen augschaut und gsogd: „I hob Probleme daham. Mit mein Voda. Er sauft so vü und in letzter Zeit wirds immer heftiger. I hob richtig Aungst nach Hause zu geh. Wenn er mi siecht, daun faungt er au mi zu schimpfen. Wie bled i doch bin, dass i nix aufd Reih griag, niemois wos gscheids hackeln werd und a Schaund fia die Menschheit bin. Daun mischt si mei Mama ei, weus des ned duldet und daun muas i mit ausehng wie er mei Mama aufs tiafste schimpft. Und des loss i ma ned bieten. Wenn er mi augeht, daun schluck i des owe. Owa i kau ned mitaunschaun wie er auf mei Mama so losgeht. Gestern woa des wieda da Foi, mei Mama hot erm zaumgschissn und auf amoi hot er mei Mama gschlong. I bin auszuckt und auf eam losgaungan, er hot ma daun des Wutzal auf da Schläfn vapasst und mi die Stiang oweghaut“ – do is er aufgstaundn und hot ma sein Ruckn zagt, er woa übersät vo blaue Flecken… Eam san scho die Tränen owegrunnan ois er gsogd hot: „Herr Professor es tuat ma so Lad, owa i kau mi nimma konzentrieren. I hoit des nimma aus. I wuit scho weglaufen owa i weiß ned wohin. Es tuat ma Lad, i wü Sie damit ned belostn.“

I: „Du belostest mi ned damit, i bin die Lehrer und a in suichn Fällen fia meine Schüler do. Sog ma bitte die Nummer vo dein Papa“

2 Stund späda san seine Ötan gegenüber vo mir gsessn, ois Begründung hob i gsogd, dass i gern wengan Markus seinen schulischen Leistungen mit eana reden würd. Da Voda woa stocknüchtern und brav mit Hemd und schwoaza Jean do gwen. Noch a boa Gesprächsfetzen bin i zum eigentlichen Teil übergaungan.

I hob aufn Markus sei Schläfn deit und gsogd: „Wissns wie des passiert is?“

Sei Papa mit an Grinser: „Na, keine Ahnung, owa wissns eh wie die Burschn san. Maunchmoi muas ma a wengl rafn.“

I: „Owa ned mit sein eiganen Vater!“

In dem Moment host a Stecknadel foin hören kennan, so leise is auf amoi gwen. Sei Voda hot mi gaunz entgeistert augschaut und i hob mi zaumreißen miasn, dass i eam ned aun die Gurgel geh.

I bin aufgstaundn, hob mi noch vorglehnt, sein Papa aus kurzer Entfernung ind Augen gschaut und gsogd: „Ans sog i Ihnan, wenn Sie no amoi so a Scheiße obziang, daun lernans mi vo ana Seitn kennan de si besser nie gsehng hättn. Do vagiss i olle meine pädagogischen Fähigkeiten. Wie Sie scho richtig gsogd hom: Maunchmoi muas ma a wengl rafn! Ich bitte Sie jetzt, den Raum zu valossn, die Sprechstunde is beendet. Frau MUSTERFRAU, ihr Bua is übrigens da Klassenbeste in Englisch. Mochn sa si kane Sorgen, aus dem wird amoi a bodenständiger Mau der was wos er wü. Und i garantier Ihnan, dass er seine Ziele erreichen wird. Vatrauens ma, i unterricht Ihren Sohn und kau Ihnen des mit reinem Gewissen bestätigen. So erfoahrt ma mehr üwa die Fähigkeiten eines Menschen ois wenn ma eam oder sei Mutter schlogt!“

Danoch hob i so guat wie jeden Tog a kurzes Gespräch mitn Markus geführt. Am Aufaung hot er no total Aungst vor den Konsequenzen ghobt, owa noch und noch scheint die Lage daham besser gwoan zu sei. In den ersten Gesprächen hot er plärrt wie a Wossafoi, weu a si endlich wem aunvertrauen hot kennan. Gleichzeitig is daham ois bessa woan, da Voda hot si goaneama zum Wirtn foahrn traut – i hob nämlich no a boa Drohungen zwecks Jugendamt, Fürsorge etc… mit aufm Weg gem. Des scheint ghuifn zu hom.

Leider woa da Markus ka Einzelfall und i hob vüle Schüler ghobt, de die gleichen Probleme ghobt hom. Wenns wuits, daun schreib i eich an weiteren Erfahrungsbericht aus meiner Zeit ois Lehrer.

Werde auch Du Teil unserer Community und nimm Kontakt zu Journalisten und anderen Usern auf. Registrier dich kostenlosund begeistere unsere Community mit deinen Kommentaren oder eigenen Texten/Blogbeiträgen.