Gaunz ehrlich? Wos muas eigantlich ois schief geh, damit Jugendliche auf Facebook bei Beruf "Daheim Chillen " steh hom? Gehts no? So a Frechheit, dass ärger nimma geht! Eh total jung und gsund, kennan so ziemlich üwaroi hackln wenns noch da körperlichen Verfassung geht und wos tuans? Daham huckn und a no stuiz drauf sei!
Waun des meine Kinder waradn, denan darad i scho die Wadln viarerichtn! Und kummts ma jetza ned mit "find mal an Job..." - hättats eich in da Schui a wengl Mühe gem und bissl weniger am Computer gspüt, daun hättats bessare Noten und hechare Chauncen wenns iagandwo bei an Schreibtisch speun wuits. I woa söwa moi a kurze Zeit Lehrer (ka Witz!) und i was, wia die Jugend domois scho drauf woa. Olladings woa des no vor da großn Internet Welle, meine Schüler hom domois no fost a hoiwe Stund braucht, damits hamlich an 2 Minuten Porno aufm Büdschirm lodn kennan...der Blick, wenn is drauf augsprochn hob und eana gsogd hob, dass i des eanan Ötan mitteiln wia, woa afoch nur göttlich. Hob i owa eh ned gmocht, so gemein woa i a wieda ned.Ma braucht ned üwaroi a guads Zeignis. Bei uns am Bau san die Noten wurscht, die Leistung zählt! Und genau des is des, wos bei den meisten Leid ohne Oaweit föht: Die Leistung!I sog nix geng Leid, de saisonal oaweitslos san, des san nämlich de Leid de ma daun in da Skihittn die bestn Sochn kochn und ohne de geht amoi goanix auf da Pistn. I sog a nix, wenn ma gesundheitlich ausfoit weu ma oaweitsunfähig is, i woa söwa moi a boa Monat daham noch an Unfoi, olladings nur im Kraunknstaund.
Owa wenn ma mit ned amoi 20 Joahr scho 3 Joahr daham huckt, auf Facebook "Chillen Daheim <3" steh hot und um 4e in da Fruah postet, dass ma grod FIFA spüt, daun frog i mi scho wo die strenge Haund der Erziehung hikumman is (fia die Moralaposteln: Damit is NICHT a Watschn gmant, oiso bleibts moi gaunz ruhig!). Und obendrei kennans ned amoi gscheid Rechtschreim. Nomoi wos fia die Moralaposteln und Gutmenschen - Mundoat is trotzdem a Rechtschreibung, solaung mas vasteht und die Buchstaben an Sinn ergeben. Owa bei suiche Sochn wia "maii schatzüü is sou qail, ich liiebe diich soooh seHr ♥♥♥" stirbt bei mir die Hoffnung fia die Menschheit!
Schaumts eich es Sacklpicka! Und sowos miasn wir dahoitn und sowos suit tatsächlich unsare Pensionen moi zoihn? Na bin i froh, dass i auf dem Gebiet a wengl ausgsorgt hob.Zum Glick is heit Sunntog, sunst darad i am Bau a wengl randaliern.
Wünsch eich wos- Da Fraunz
Da Fraunz zählt mit mehr als 135.000 Facebook-Fans zu Österreichs berühmtesten Facebookerianern. Auf Zuckerbergs Plattform gilt er schon lange als Superstar. Da Fraunz schreibt nur in der Mundart und bloggt unter einem Pseudonym, niemand kennt die wahre Identität des Mannes. Profil ansehen
