Den 14. Juni 1978 wia i niemois vagessn. Es woa es zweite Moi in mein Lem, dass i dem Tod hauchdünn entkumman bin.

I woa domois bluatjung, a boa Monat vorm 16. Geburtstag und mitten in meiner Lehre. Es woa die schenste Zeit in mein Lem. I woa jung, motiviert, hob a sau geile Hockn ghobt und guads Göd vadient. Zwar bei weitem ned so guat wie beim Pfuschen zwischendurch, owa wurscht. I woa und bin bis heite a Workaholic, domois warad i am liabstn mit Ziaglstana schlofn gaungan und hättats…..na wurscht, loss ma des Thema moi liawa.

Es woa Mittwoch, Wochnteulung, a hoibwechs schena Tog und a lässige Baustö. Ziagl schupfen bis zum geht nimma, do kaunst di sche auspowern wennst es drauf aulegst und die Zeit vageht a schnö. Endlich homma a Jausenpause gmocht, i hob nämlich scho an uandlichn Hunger ghobt. Die ane Höfte hot gessn, die aundare Höfte hot weidaghacklt, damit ma jo schnö fertig wean.

Mir woa extrem haß, desweng hob i mi bis aufd Schuach und Hosn auszong. Unsare Kollegen woan ziemlich locker, desweng hob i domois sogoa rauchen diafn obwuih i no kane 16 woa. Domois woa des no relativ wurscht, außadem homs meine Ötan sowieso gwusst.

Olle san gsessn, nur i ned. Mei Unterhosn hot si richtig grindig bei mein Oarsch aubickt vor lauter Schweiß, desweng wuitat i steh, damit des ned mit meina Haut verschmilzt. Aus diesem Grunde bin i a boa Schritt gaungan, damit si des ois löst. Die Männer wean mi vasteh.

Und daun is passiert.

Irgendwer hot „ACHTUNG!“ gschrian, i hob reflexhoiwa auffegschaut und nur mehr an Ziaglsta gsehng der genau auf mi zuagflong is.

ZACK – danoch woas aus. Keine Ahnung wos daun mit mir passiert is, i woa weg und mehr tot ois lebendig. I was ned wie vü Träume i erlebt hob in dera Zeit, i kau mi nur drau erinnern, dass i immer wieder den Ziaglsta auf mi zuakumman gsehng hob.

Iagandwaun bin i wieder zu mir kumman. I bin in an sehr gmiatlichn Bett gleng. Ois woa so sche wach und woam, richtig herrlich. I wuitat meine Augen aufmochn, owa es is ned gaungan. Ois hättat ma wer Gwichta aughängt. Mei Körper hot a wengl zuckt, weu i mi beweng wuitat, owa iagandwie is ned gaungan. I muas ausgschaut hom wie a Fisch der auns Laund gspült woan is. Auf amoi hot wer gaunz fest mei Haund gnumman und mit sehr erfreuter und weinender Stimme gsogd, dass i endlich zu mir kumm – auf ungarisch. Ois kloa, die Mama is oiso nebn mir (sie is Ungarin). Desweng hob i mei gaunze Kroft zaumgnumman und meine Augn wirklich kurz aufbrocht. I hob si mit ihre blonden Hoa vor mir gsehng mit an traurigen Lochn. Danoch woa i wieder weg.

Mei nächste Erinnerung is, dass i auf amoi munter woan bin. Wie wenn i gschlofn hätt. Die Kraunknschwester und da Orzt san vor mir gstaundn und hom gfrogt wies ma geht. I wuitat song, dass i miad bin, hob owa nur a „Jo…“ aussabrocht – i hob vor lauter Schmerzen ned reden kennan. Daun hot si da Orzt zu mir hergsetzt und erklärt wos passiert is.

Da Ziaglsta hot mein Schädl a wengl hinig gmocht. I griag heit no a Ganslhaut wenn i drau denk, weche Verletzungen er mir aufzöht hot.

Schädelbasisbruch, Jochbeinbruch, Kieferbruch – des hot schomoi schiach klungan. Daun hot a ma dazöht, dass i ned nur Blut, sondern auch Hirnflüssigkeit verloren hob. Aungeblich is des ka Seltenheit bei ana derartig schweren Verletzung. Aufgrund der heftigen Wucht und weu a Ziaglsta ned grod so leicht is wenn a auf dei Birn fliagt, hob i auch a schweres Schädel-Hirn Trauma ghobt. Mei absolute Masn woa, dass i ka Hirnblutung griagt hob, wos bei an derart schweren Unfall eigantlich zu erwoatn woa.

Der Kollege der „Achtung“ gschrian hot, den kau i eigantlich ois meinen Lebensretter ansehen. Weu daunk seiner Warnung hob i reflexhoiwa auffegschaut und den Ziaglsta somit „gfressn“, oiso wundasche mitn Gsicht ogfaungt. Wiederum a Masn, dass mei Gnack ned brochn und mei Schädl ned ogrissn is. Hätt i den Ziagl nämlich genau aufn Schädl griagt, warad i mit Sicherheit neama unter den Lebenden, sundan hätt ois guads Wurmfutter unter da Erden geendet.

I wuitat wissen weches Datum grod woa. Es woa da 03.07.1978. I bin oiso fost 3 Wochn im Koma & Tiefschlof gwen. Ziemlich heftig, weu fia mi is de Zeit wie a kurzer Mittogsschlof gwen. Kurz Augen zua gmocht und scho san knoppe 3 Wochen vorbei. Echt heftig. I was ned, ob i in dera Zeit wos mitgriagt hob vo de Sochn de um mi passieren. Vielleicht unterbewusst, jednfois kau i mi an nix erinnern. Kane Stimmen, kane Träumen vo Verwaundten & Freunde, ka Lebensfilm etc… nada.

Vo Minute zu Minute bin i munterer woan. Mei Körper is wieder richtig in Fahrt kumman, weus mi neama mit ollemeglichen Drogen vuipumpt hom. Gegenüwa vo mir is a ötare Frau gleng, hot wos mitn Haxn ghobt. Sie hot mi augschaut und mit erhobenen Finger gsogd: „Des is passiert, weusd am Sonntog davor ned in da Kirchn woast!“. I woa so fertig mit da Wöd, dass i ned amoi den Kopf beidln hob kennan. Eppa warad daun eh ois auseinandagfoin. I hob de guade Frau afoch ignoriert.

Daun hob i gsehng, dass do hunderttausend Schläucherl aun mir hängan und laungsaum owa sicha hob i de gaunzn Nodln in mein Körper gspiat. Wei, des mog i goaned, i woa no nie a Freind vo Nodln. Vor ollem hob i mi desweng ned gscheid beweng kennan. Und es hot wehtau. Weu i so benebelt woa, hob i afoch augfaungan, dass i ma jedes anzelne Schläucherl aussagrissn hob. TIPP: NICHT NACHMACHEN! Leck mi in Oarsch, des woa ned aungenehm. Und i woa mit Medikamenten vuipumpt, oiso total clean muas des no um etliches schmerzhofter sei.

Daun hom de scheiß Geräte nehm mir a no zum Piepen augfaungan, weus kane Signale vo mein Körper mehr griagt hom, weu den Pulsmesser hob i ma natialich a owa gnumman. Es hot ned amoi a Minutn dauat, do san scho drei Schwestern, a Ärztin und da Oberarzt vo vorher einegstürmt – laut Geräten woa i nämlich tot, weu jo ka Herzschlog mehr gmessn woan is. Daweu bin i eh hoibwechs lebendig in mein Bett gleng. Na bist deppat, de woan uandlich haß auf mi. Owa i hobs lustig gfundn.

Lässig, laungsaum owa sicha bin i wieder zruckkumman und bin denan scho am Oarsch gaungan. Des hätt jo nur a lustige Zeit wean kennan.

Wies weidagaungan is, erklär i eich in an zweiten Teil, weu der Blog sunst zu laung wird. Es wird jedenfois sehr lustig, weu i no a Randl total deppat im Schädl woa. Außadem homma no obwoatn miasn, ob i iagandwöche Schäden davotragen würde.