A gaunz lustige und kurze Gschicht zwischndurch.

Vor etlichen Joahrn hob i ma a schens Eigenheim baut auf des i total stuiz bin. Natialich ois im Pfusch. A boa Leid wean jetza vielleicht a wengl aufschrecken, weu des jo bei da Regierung und so üwahaupt ned gern gsehng wird. Owa he Leidln, gaunz ehrlich – ohne uns Pfuscher daradn die gaunzn Baumärkte sowos vo in Konkurs geh weus afoch ka Gschäft mehr mochn. Ihr brauchts es ned glaum, es is owa so.

Pfusch hin oder her: Es Haus steht und des passt. I hob an sehr großn Goatn, a klane Hittn, eigane Garage, sehr vüle Pflaunzn, an Pavillon, an Swimming Pool und sogoa an Gemüsegoatn – selbst ist der Mann! Und es Obst und Gemüse ausm eiganen Goatn schmeckt sowieso vü bessa ois des kafte Zeig.

Wennst a eiganes Haus host, muast natialich a hin und wieda wos erneuern. Bei mir woas vor a boa Joahr da Foi wia i mei Bodezimmer neich mochn wuitat. Domois hob i zwa klanare Räume ghobt, in an woa es Bodezimmer und im aundan woa es stille Örtchen. Damit i mehr Plotz hob und mehr eirichtn kau, hob i mi dazua entschlossn, beide Räume durchzubrechn und 1 Raum draus zu mochn.

Oiso außa mit da Hilti und scho kau die Stemmerei losgeh. Leck mi am Oasch, auf aundaren Baustön woa ma des jo imma wuascht, owa wennst amoi die gaunze Staublawine siechst de durch dei Haus fegt, DAUN denkst a wengl aundas driwa. Vor ollem waunst allanig lebst und ka Frau host de des ois putzt (ned foisch vasteh Mädls, ihr sads super und i hob eich olle lieb). I hob daun natialich ois söwa putzn kennan. Am liabstn hätt i des gaunze Haus obgrissn und ma de scheiß Putzarei daspoat. Owa wos sei muas muas sei.

Jednfois woa diesbezüglich moi ois fertig und wir (Güsi und i) hom augfaungt die Dusch zu mochn. Zum Duschen warad a Boden ned schlecht, desweng homma augfaungt zum Fließn leng. Da Peda und i, die Spezialisten schlechthi.

Goldene Regel beim Pfuschen: Ma braucht immer a wengl Genauigkeitswossa. Damit is übrigens Wodka gmahnt. I bevorzug jo den Jägermasta, owa do host am Ende vom Hackln stott an Bodezimmer a Weltkriegsruine baut.

Du bucklst oiso moi die erste hoiwe Stund, daun mochst a Rauchpause. Noch da Tschick haust es erste Stamperl owe. Und weus so guat woa, gönnst da glei a Zweites. Des wiederhuist noch ana weitaren Stund. Daun losst die Mittogspause neama laung auf si woatn. Zu dera Pause gibts daun natialich moi 2 oda 3 guade koite Bier und imma an klanan Nochputza damit ois sche owegspült is. Mittlaweule is scho gaunz woam im Bauch und es Hackln geht vü leichter. Do oaweit ma trotzdem a wengl laungsauma und losst es Genauigkeitswossa total wirken.

Irgendwaun bist daun fertig und kaunst dei Werk bestaunan.

Wundersche hot des ausgschaut. Die Fliesn san olle sche grod nemeinaunda, kane klanan Hugal oda sunst iagandwos dabei, sogoa mit da Wossawoog is ois grod gwesn.

Und genau in dem Moment is mei Voda durch die Tia kumman und wuitat schaun wie weit ma scho san.

„Voda schau da des au wie sche ma des gmocht hom. Supa gö? Des wird a herrlicher Raum, i sogs da.“

Voda: „Jo Bua des glaub i da scho, sads eich sicha, dass nix foisch gmocht hobts?“

I: „Owa geh bitte, wie laung hackln wir scho am Bau? Und so a Dusch zu mochn is jo wirklich ois aundare ois schwa, des kennt a klans Kind mochn.“

Voda: „Daun is des klane Kind um etliches gscheida ois du. Sogts ma moi wo es Wossa obrinnt wenn des a Dusch sei sui.“

…..Scheiße! Do homma beide a wengl bled gschaut. Ois homma so wundasche gmocht, owa es wichtigste homma bei da Dusch vagessn: Den Obfluss fias Wossa. Bist du narrisch, i bin ma deppat vorkumman.

Daun homma des Gaunze wieda aussagrissn damit da Obfluss dazua kumman hot kennan. Und natialich brauchst a wengl a Gefälle, sunst wird des mitn Obrinnan a wengl schwa.

Na i sogs eich, des woa a lustiges und gschissanes Ereignis. Owa immahin hot uns mei oida Herr daun no unterstützt und mitn Genauigkeitswossa ghuifn, damit a er wos davo hot. Beim Hamgeh hot a zwoa a Latern frontal gnumman, owa des liegt wui drau, dass a scho a wengl miad woa.

In mein Kölla hob i an wundaschenan großn Raum mit ana Bar, Dart und an Beamer wo i immer mit Freind beinaunda sitz wenn Besuch do is. Iagandwaun wü i ma do untn an Pizzaofen einebaun damit i sozusong mei eigane Pizzaria hob.

Owa waun i aun de Soch mitn Bodezimmer denk, daun üwaleg i ma des liawa eftas ois nur zwamoi.