Endlich daham! Fost 12 Stunden Autofahrt liegen hinter mir. Daunke aun die Baustellen und Staus in Deitschlaund. Ziemlich zacha Weg, vor ollem wennst scho seit Donnerstog duatn woast, wenig Schlof gfundn und sehr vü gsoffn host.

Wo woa i eigantlich? Mei Reise hot mi diesmoi, kurz nochm Nova Rock, noch Hockenheim zum ersten Konzert der Böhsen Onkelz gebrocht. Es woa, bis auf wenige Ausnahmen, sehr geil.

Am meisten taugts ma jo, wenn ma noch Deutschland foahrt und auf amoi kane Geschwindigkeitsbegrenzungen mehr auf da Autobahn hot. Und geht scho, i hob mein A5 gscheid durchtreten und eam jenseits der 200 km/h raufgequält. Leck di Tant in Oarsch, des woa ein geiler Scheiß, i hoff olle Männer kennan mi vasteh.

Olladings brauchst duatn a guade Bremsen, weu meistens homs nur zwei Spuren auf der Autobahn und auf amoi überholt a LKW den aundaren LKW. Wenns schlecht reagierst, daun ziagst den Kürzeren.

Daunk a boa Pausen homma 7:30 Stunden bis noch Hockenheim gebraucht. Wir san aukumman und es hot geregnet wie aus Kübeln. Leiwaunder Scheiß (Ironie!), und koit woas a wie im Wohnzimmer vom Eisbären. Owa sehng mas positiv, die Haring gengan leichter zum Eineschlong. Zötplotz suachn, Zöt aufstön, Zöt spannen, Pavillon & Tisch aufstellen, Sesseln dazua, Griller auhatzn, Fleisch auffe und gib eam! Thüringer Bratwürste san übrigens total geil, suitats moi prowian.

Wir hom logischerweise österreichisches Bier mitgnumman. Und Wodka, Whisky, Jägermeister, Obstler, Palinka und Bacardi, owa des is jetza moi wurscht. Unser heiliger Trichter hot natialich a ned föhn diafn. Und scho is losgaungan – da 52jährige Großvoda (oiso ich) zagt denan Preissn moi wie ma trichtert. Die Preissn mochns noch und nach 2 Stunden sans auf amoi olle blunzenfett. Tjo, einser Schmäh – Deutsche vertragen kein österreichisches Bier. Endlich stehts moi 1:0 für Österreich!

Es wurde dunkel, die Getränke wurden härter und iagandwaun setzt mei Erinnerung aus. Jednfois woas ana der härteren Räusche de i jemois ghobt hob. Hawedere….i hob mit an 40jährigen Deutschen über Spongebob philosophiert. Kranke Welt.

Am nächsten Tog bin i gegen 7 Uhr aufgstaundn und woa froh, dass i no leb. Schnö ausnüchtern, nur Wasser und Orangensoft trinken. Um 12 Uhr samma zur Bühne gaungan. Woan eh nur 3 Kilometer. Diese Bühne. Bist deppat, i sogs eich, sowos kolossales hob i no ned gsehng. 102 Meter breit, über 40 Meter hoch. Wos fia a kraunker Scheiß, Hut ab Onkelz, Hut ab.

Tjo, in der Wartezeit is des passiert warum i jetza sterbenskraunk bin. A Wolkenbruch. Mittelstarker Regen mit echt beschissenen Wind dazua. Des is ca a hoiwe Stund so gaungan, danoch woan ma olle waschlnoss. Und i woa nur mit Shirt & Pulli unterwegs. Da Pullover hot si natialich mit Wossa augsogt wie a Schwaumm, dadurch is es Shirt auch a wengl noss woan. Und da Wind hot afoch ned aufgheat. I hob scho die Lungenentzündung in mir Freudentänze mochn gheat.

Pünktlich zum Intro vo den Onkelz hots zum Regnen aufgheat! Und des woa a geiles Intro. Viva Los Tioz, es faungt gaunz laungsaum au und genau zum Refrain – BÄMM – vuigas! Danoch hots ka Halten mehr gem. A legendärer Onkelz Song noch dem aundaren. Auf amoi sogt da Weidner die legendären Worte. „Wollt ihr etwas Neues vom Alten hören?“

Da neue Song, da erste seit dem Jahr 2004, mit dem Namen „Wir bleiben“ wurde gspüt. Leck mi doch am Oarsch, des woa episch. Da Song is no laung ned ausgereift und ma hot gmerkt, dass do textlich no ned so a Routine drinnen is. Desweng hot si da Kevin a moi sche vasungan. Egal, des passiert und gheat dazua. Fia uns Fans is da Text auf da Leinwaund gstaundn. I muas song, dass a ma bis auf a boa Schönheitsfehler sehr gefällt. I hob gehofft, dass da neue Song guat wird, owa dass er so guat wird hätt i ned docht.

Der legendäre Songexpress rollt weida. „WAS WOLLT IHR HÖREN?“ – „MEXIKOOO!“

Mit „Erinnerung“ verobschiedet si die Band vom ersten Abend und wir treten die 3km launge Rückreise zu Fuaß au und woan zum Glück unter den ersten Leuten.

Es woa ans der lässigsten Konzerte de i jemois gsehng hob. Und sötn hob i so wenig vo da Band gheat, weu die Fanz so laut woan. Is und bleibt hoit da beste Chor da Wöd.

Danoch hob i des Haundtuach gworfn, i bin ins Zöt eine und hob mi niedaglegt, weu mi mei Husten scho umbrocht hot. Reden woa unmöglich, sobald iagandwie Luft in meinen Rachen kumman is, hot mi a Hustenanfall niedergstreckt. Echt schirch. Schnö in mein Bundesheer Schlafsack eingwickelt, damits sche woam wird, a Jacke auzong und die Jägermeister Floschn trunken, weu i kann Hustensoft mitghobt hob. Danoch schnö ins Land der Träume.

Am nächsten Tog bin i tausend Tode gstoam. Mir is dreckig gaungan. Richtig dreckig. Mei Brust hot brennt, meine Hände hob i ned heben kennan, mei Nosn woa komplett vastopft und Halsweh hob i a ghobt wie a Dodl. Na super.

Glei moi ins Sani Zelt gaungan und noch Medikamenten gfrogt. De hom nix ghobt. Super. Oiso zu Fuß a hoibe Stund noch Hockenheim in die Apotheke gaungan und ois kaft wos iagandwie gegen den Schas hüft. I woa glauwi no nie auf so vülen Substanzen wie zu dem Zeitpunkt, a Drogenjunkie hätt si no wos obschauen kennan vo mir.

Danoch hob i mi eigraucht um wieder schlofn zu kennan. Iagandwie hob i daun bis 17 Uhr durchpennt. Leiwaunder Scheiß und a bissl bessa is ma a gaungan. Dadurch, dass gregnet hot und nur 12 Grad geherrscht haben, homma unsare Zöte zaumpockt, ins Auto trong und beschlossn heimzufahren – wuitn eigantlich bis heite bleim, owa daun warad i scho in fremder Erde.

Wir san no zum Konzertgelände gaungan, hom uns Merchandising Sochn und wos zum Trinken kauft und vor bissl mehr ois 12 Stunden samma endlich hamgfoahrn.

Jetza huck i do, schreib diese Zeilen, hob hohes Fieber, kau ned gscheid atmen ohne zu husten, spuck scho boid Blut (fühlt si zumindest so au), hob ka Kroft in den Gelenken und a verstopfte Nosn, bin übernachtig und wü steam. Und moang bin i übrigens wieder auf da Baustö und am Donnerstag fliag i noch London um am Freitag The Who live im Hyde Park zu sehen.

Life is a b!tch, so f*ck it ;)