Wir befindn uns wieda aufm Campingplotz in Italien. Mittlaweule woan ma scho a boa Tog duatn und hom uns wunderboar in die Gemeinschoft eiglebt. Gibt echt nix leiwaundares ois mit Bayern zu campieren. Do erlebst Sochn, des pockst ned.
Amoi samma wieda beim Dozente ghuckt ois auf amoi sei Handy (90er Joahr, mit dem Host no Leid daschlong und aunschließend eigrobn kennan) gläutet hot. Noch an kurzn Telefonat hot er an fettn Grinser im Gsicht ghobt und folgendes gsogd. „Vahurte Scheißarei, jetza kemma si woam auziang, zwa Bekaunnte san grod auf Gschäftsreise in Venedig und schaun jetza an Sprung vorbei bevors wieda hamfliang.“
I: „Aha, is des leicht schlimm weust scho so lochn muast?“
Dozente: „Mit denan geht’s a bissl schlimma zua. Des san Gschäftsleid. Ana vo eana is da Chef vom Flughofn EGAL-OWA-BEKAUNNT-UND-GROSS“
Uiiii do homma moi olle die Augn aufgschlong, des kau jo nur lustig werdn.
Noch ana Stund woan die Herren scho do. Wundasche im maßgeschneiderten Aunzug, ois waradns grod vo an Mordauftrog vo da Mafia kumman. Sie sehng uns, ziang es Sakko und es Hemd aus, ois warads a dreckiger Fetzn und hauns afoch am Bodn.
A ned schlecht, des Zeig woa sicha sindteia und de hauns afoch aufm Saundbodn. De miasn Göd scheißn de Hundling.
Und scho is losgaungan: Saufen saufen saufen…..laungsaum owa sicha hot ma es Bier scho fost neama gschmeckt, weu ma jedn Tog an Rausch ghobt hom. Und Gschichtln homma uns do dazöht, hawedere. I hob imma docht, dass i lustige Sochn dalebt hob, owa i hob mi bei denan so gfüht wie a Lehrbua dem da Gsö grod gsogd hot, dass a die Gwichter fiad Wossawaage suachn sui. (Wer jetza zum Nochdenkn aufaungt, der suit liawa in a Büro geh)
Am Obend homma olle an Hunger griagt und san desweng in die Pizzeria beim benachbarten Campingplotz gaungan. Da Chef vom Flughofn hot an gaunz leiwaundn Nauman ghobt – Fraunz! Den hob i gern ghobt, ned nur weng da Namensgleichheit.
Des miasts eich moi vorstön: A Pizzeria bei an Campingplotz, mittn in da Hauptsaison, ois grammlt vui mit Leid und deren Kindern – und mittendrin huckt a Partie augsoffana Hawara (des woan wir). Na hawedere, do is zuagaungan.
Bevor ma es Essen griagt hom, hot da Fraunz scho fünf Runden Schnops zoiht. Frogts mi ned wos des woa, i was wiakli neama. Owa es woa a stoarkes Zeig.
Endlich woa es Essen do. Neama saufen, afoch stü sei und den Magen füllen. Auf amoi hot da Fraunz a Tabasco fia sei Pizza valaungt. Gesagt getan, scho is des Zeig am Tisch gstaundn.
Er mochts Flascherl auf, setzt au und auf moi passierts. FLATSCH! Iagandwie hot as gschofft, dass a den kompletten Vaschluss (oiso a den Tropfverschluss, damit ned so vü aussakummt) aufmocht, hots owa ned bemerkt, und afoch so amoi die hoiwate Tabasco Floschn üwa sei Pizza glaht. Bist deppat, i warad fost dastickt, weu i mi vor lauter Lochn vaschluckt hob.
Auf dera Pizza woa mehr Tabasco ois Tomatensauce drauf.
Der Hund hot Göd, owa beim Essen is er geizig. Er wuitats ned umtauschen, na, er hot bahoat augfaungt die Pizza zu essen. Stück für Stück.
I hob no nie an Menschen so schwitzen gsehng wie eam hahaha. Respekt, i hätt des ned owegriagt, und ois gebürtiger Ungar bist da schoafes Essen gwohnt.
Noch an sehr berauschenden Obendessen homma uns wieda zu unsan Campingplotz zruckgschlong. Heite woa i wieda da Gastgeber, oiso homma die Bierpaletten aussagstöt und zum Saufen augfaungt. I glaub i hob no nie in mein Lem so vü Bier gsoffn wie in dera Nocht.
Davor hom olladings da Fraunz und sei Hawi no mödn miasn, dass die heitige Nocht am Plotz bleim. Sunst gibt’s Probleme mit da Polizei. Normalerweise hättat des (Hausnummer) 30 Euro pro Person kostet – da Fraunz is zum Marcelo (Campingchef) gaungan, hot eam 5.000 Schilling higlegt und gsogd: „Wir bleim heite do!“ – und is wieda gaungan.
Wir woan an dem Obend 6 Leid und hom uandlich Gas gem. Ob 22 Uhr woa Nachtruhe, do host wirklich die Pappm hoitn miasn. Wennst nur a bissl laut woast, daun hot die da Nochtwächter zaumgschissn und im schlimmsten Foi vom Campingplotz ausseghaut.
Außa du bist da Dozente, daun host an Freifoahrtsschein! Und daunk des großzügigen Übernachtungspreises den da Fraunz zoiht hot, homma no an Extrabonus ghobt. Narrenfreiheit olé.
Gegen Mitternocht is da Nochtwächter moi vorbeikumman und hot (in an italienischem Dialekt) gsogd: „Dozente, bitte, etwas leiser. Bitte bitte.“
Dozente: „Leck mi doch du Oarschloch, an Schas wia i mochn. Hau di liawa dazua und gib a Ruah.“
Tjo, daun hot da Nochtwächter a mit uns mitgsoffn.
Gegen 4 Uhr in da Früh hot a gsogd, dass er wieder weidaschaun muas, weu sunst griagt er schimpfa. Er hot si aufs Radl ghuckt und is auf da aundan Seitn wieda owagflong. Den host vagessn kennan.
In dem Moment hob i ane meiner legendären Ideen ghobt.
I: „Heast Hawi, scheiß di ned au, wir baun jetza a Alarmaunlog, daun muast neama hackln. Dozente, host an aufgruitn Strick fiad Wäscheleinen?“
Jo, den hot a ghobt. Wer de Strick kennt, der wird wissen, dass de vadaummt laung san (damitst immer wieda neiche owaschneidn und vawendn kaunst).
Da Campingplotz woa voller Pinien Bäume, damit genug Schottn gspendet wird. Italien hoit. Oiso homma augfaungt vo an Baum zum aundan an Strick zu spaunnan. Olladings is a Strick allanig no ka Alarmaunlog.
Desweng homma imma wieda a leere Bierdosn am Strick aufghängt. Um 5e in da Fruah woa unsare Alarmanlage fertig und laungsaum owa sicha homma gsehng wos fia a oages Werk wir vollbracht hom.
Wir hom in dera Nocht insgesaumt 117 Bierdosen ausgsoffn und ollesaumt auf unsara Alarmaunlog aufghängt. Des woa ned nur a Bild für Götter, sundan auch a Rausch fia Götter! Wennst bei ana Dosn aukumman bist, hom olle aundaren Dosen a zum Scheppern augfaungt. I hätt des ned fia meglich ghoitn, owa de scheiß Alarmaunlog hot wiaklich funktioniert. Wia die ersten Nochbarn munter gwoan san, homs es no lustiger gfundn ois wir. Wie immer mehr Leid damit gspüt hom, homs die Laungschläfer neama so lustig gfundn. Und wia die Kinder aufgwocht san und drauf rumgspüt hom, is dem Marcelo zu deppat woan und wir homs obbauen miasn.
Schade!
Owa es woa a unvergessliches Erlebnis. So wie so ziemlich jeder aundare Tog auf dem Campingurlaub.
