Weu in letzter Zeit leider vermehrt traurige Gschichtln unseren Tagesablauf bestimmen (Flüchtlingskatastrophe), hob i ma docht, dass i moi so zwischendurch a lustiges Gschichtl aus mein Lem aussehau und eich damit hoffentlich a wengl zum Lachen, Schmunzeln oda afoch nur zum Schädl beidln bring. Vü Spaß :) Gfrei mi üwa Feedbacks aller Art.

----------------------------

Vor 10 Joahrn und a boa Zaquetschte hob i grod mein 40er hinter mi brocht. Laung is her, sche woas und meine Hoa woan no ned grau.

Mei Freindeskras is natialich a immer öta woan und so is kumma, dass ana meiner besten Hawara, da Andi, sein 40er gfeiert hot. Scho einige Wochn davor samma mit die Freind besaumman ghuckt und hom si docht wos ma dem Andi zum Geburtstog bescheren kennan.

I muas dazua song, dass da Andi am Laund wohnt. I bin zwoa a Wiener, hob owa an zweiten Wohnsitz (eh kloa, scheiß Summerfrischla!) im südlichen Niederösterreich und bin wui ana der wenigsten Wiener der in der Dorfgemeinschaft vui und gaunz ois Laundbua (mehr oder weniger) augsehng wird.

Oiso kennt seich vurstön, wos fia a kraunke Partie wir olle woan. Lauter Mauna vom Laund, mit uns wirds nie fad und da Treffpunkt Nummer 1 is und bleibt da Wirt unseres Vertrauens. Do homma mitn Andi scho so manchen Rausch lieng lossn.

Am liabstn trink ma Cola Rum. Owa ned in die normalen klanan Glasln, des is jo fad. Na, wir haun des immer sche in a Moß eine, oiso 1 Liter Cola Rum mit ana ned grod schwochn Mischung.

Da Andi is und bleibt wohl bis zum Ende der menschlichen Spezies da Rekordhoita im Ex-saufen vo Cola Rum stutzen – derzeitiger Rekord liegt bei 4 Moß hintereinander. Saufts amoi 4 Liter Cola Rum ohne Pause hintereinander auf amoi owe.

Wahrscheinlich hot er desweng 130 Kilo und schaut aus wie a Heliumballon.

Jednfois wuitn wir eam desweng a gaunz besonderes Geschenk mochn. An 40 Liter großn Kruag mias ma basteln. Jo, ihr hobts richtig glesen – 40 Liter!

Tjo, wie mocht ma sowos? Guade Frog, des homma si nämlich a gfrogt. Wir hom gegrübelt und studiert, owa bis auf unmögliche Ideen is uns nix eigfoin. Bis mir (wem sunst?) die glorreiche (oder doch total deppate) Idee kumman is.

Gach an Bekaunntn augruafn der in da Metallbranche tätig is und a eigene Firma hot.

„Herbert, hüf ma, i brauch fian Geburtstog vo an Freind vo mir unbedingt a 22er Rohr, 110cm in da Länge. Wie vü kost ma des bei dir?“

„A 22er Rehrl? Goanix, kane 10€, wos wüsd mit dem Schas aufaungan?“

„10€? Tschuidige, i man ned 22 Millimeter, sundan 22 Zentimeter.“

Jo, des woa daun neama so büllig. Hot scho am 100er krotzt, owa he, Spaß muas sei und Spaß is teuer – ned nur im Puff.

Mitn 22er Rohr und der vorher genannten Länge waradn si genau 40 Liter Cola Rum ausgaungan. Perfekt! Des Rohr homma organisiert, jetza fehlt nur no da Inhalt.

Olle Prospekte aussagsuacht und gschaut wo da Rum und es Cola in Aktion is. Perfekt, beim Eurospar bin i fündig woan.

Kaufts moi fia 40 Liter Cola Rum ei. Do merkts erst wie bled die Leid schaun kennan, bist deppat.

Natialich woan vü zu wenig Flascherl im Regal, desweng hob i es Loger a no a wengl leer räumen miasn. Foahr moi mit an Eikaufswagerl mit mehr ois 20 Floschn Rum durchs Gschäftl und prowia ned zu lochn. Geht ned.

Ois kauft, ins Auto eiglond und draufkumman, dass i des scheiß Cola vagessn hob. Umdraht und die gleiche Prozedur wiederhuit. Woa ziemlich lustig.

Daun woa der Tag der Feier. Des Rohr homma natürlich total Ö-Norm gerecht zaumbaut (des is a Lüge!). An schenan Boden homma natialich eibaut, an schenan Zopfhauhn no drauf und des gaunze auf an schenan stoarkn Tisch, damit nix schief geht.

Na bist, da Andi hot si goaned auskennt. Wie er gwusst hot wos drinnan is, hot a si natialich extrem gfreit. Ois ma eam gsogd hot, dass er de 40 Liter jetza auf Ex saufn muas, weu a Russe den neuen Ex-saufen Rekord im Cola Rum trinken mit 39 Liter aufgstöt hot, do is eam daun es Gsicht a wengl eigschlofn. Owa er hot eh glei üwarissn, dass des nur a Schmäh woa.

Najo, daun hot die Eskalation begonnen. Die Frauen hom olle dankend verzichtet, aunscheinend hob is vü zu stoark gmischt (es woa wirklich verdaummt stoark!), desweng woan ma nur sieben Hawara de bei dera Rumsäule mitgsoffn hom.

2 Stunden fia 40 Liter Cola Rum – mochts es besser, ihr Wichte!

Und die Moral von der Geschicht?

Cola Rum, das saufen wir geschwind!