In meiner Zeit ois Lehrer hob i hin und wieder moi des Fach Politische Bildung supplieren miasn und oft a spannendes Projekt mit meine Schüler gmocht. Des gleiche mechat i jetza mit eich mochn und i hoff, dass vü mitmochn und des Projekt zu ana ernsten Sache reifen lossn!

Seit fost 3 Jahren bin i auf Facebook und seitdem fordern einige Leid immer wieder, dass i eine eigene Partei gründen und in die Politik gehen suitat.

Jo, genau des moch i jetza mit eich!

Mir stehts da Zorn nämlich bis über die Haarspitzen! Schauts eich afoch moi die politische Situation in Österreich au, wos sui der Schas? Die SPÖ is die Unfähigkeit in Person und da Faymann is die personifizierte Lächerlichkeit. Da Mitterlehner vo da ÖVP kau nur grantig dreischauen owa haut afoch a nie aufn Putz. Des führt so weit, dass suiche Kasperln vom Dienst, wie a insolventer Zahntechniker (Strache) daherkumman, haße Luft predigen und komischerweise vü Aunhänger finden. Is olladings a ned schwa, wenn ma bedenkt, dass a Taxifahrer das Amt des Kanzlers inne hot.

Vo die Grünen faung i moi liawa goaned au, denan eanare greßte Sorg is woahrscheinlich die „Töchter“ Erwähnung in der Hymne. Des is übrigens die erste Änderung de i beantrage – die neiche Hymne muas „I Am From Austria“ vom Fendrich wean! Wehe do valaungt daun wer, dass ma „I am from Austria  und my wife a“ singan miasn.

I hoff jeder vo eich vasteht, dass i aundare Parteien wie NEOS, Strohsack und Co. goaned erwähnenswert find.

Kurz gsogt: Es reicht! (Zitat von Molterer!)

Wie schaut mei Partei aus?

Vielseitig! Zu allererst mechat i moi song, dass des a reine Internet Partei is. Wir agieren oiso ned in da Realität, do daradn wir im Moment ned vü erreichen. Owa he, i loss mi gern vom Gegenteil üwazeugen. Muas ma hoit a große Anhängerschaft schoffn und daun kau ma an die Öffentlichkeit geh.

Die Partei is weder rechts noch links, sondern do wo uns olle aktuellen Politiker am Oarsch leckn kennan – in da Mittn!

Es gibt ka unnediges Gegeneinander und „Der hat das gesagt, der hat das gesagt, der is so böse, ich bin so gut, ich mach das, ich mach das und jenes und der nicht bla bla bla Mama hilf mir“ ähnliches Geplärre mit aundaren Parteien. So erreicht ma genau goanix. Ma muas an einen Strang ziehen! Wenn die aundaren Parteien des ned so wuin, wos jo leider da Foi is, daun losst mas afoch moi gegen die Waund rennen. Im Endeffekt weans scho sehng wos davo hom, nämlich a brochane Nosn.

A gaunz wichtiger Faktor is fia mi die Menschlichkeit! Es is scheißegal, ob ma jetza Migrationshintergrund hot oder ned – i bin jo söwa hoibata Ungar – JEDER kau bei dem Projekt mit der neuen Partei im Internet mitmachen!

Des Wort „Ausländer“ existiert do ned, wir san nämlich olle Menschen. Obs es woahr hom wuits oda ned, owa nockat schaun ma olle gleich aus. Bis auf die geschlechtlichen Unterschiede. Wir atmen olle die gleiche Luft, wir miasn olle iagandwaun moi aufs Klo und iagandwaun werdn wir olle sterben und verfaulen. Somit kau mas drehen und wenden wie ma wü – wir san immer gleich!

Und da wichtigste Faktor, meiner Meinung noch, is der Humor! Weu unser Schmäh zeichnet die Leid in Österreich aus! Diesen Humor tuan ma ned nur intern zeigen, sondern auch öffentlich. Mir persönlich geht des nämlich am Oarsch, wenn die Politiker bei iagandwöchen Veranstaltungen immer an auf todernste Schastrommel mochn. Wos bringt des? Wuins Stärke signalisieren? Was i ned, i finds jednfois lächerlich. Es gibt scho zu vü Zorn und Hass auf dera Wöd, wir miasn olle mehr lochn. Und des is mei wichtigstes Anliegen, dass die Leid uns ernst nehman, owa trotzdem lochn, weu ma afoch fröhliche Leid san.

Rein fiktives Beispiel, damit i eich des mitn Humor verdeutlichen kau.

Angenommen i huck beim ORF in ana Diskussionsrunde und mei Gegenüber is da Stronach. Frank: „Hom Se eigantlich a Auhnung vo Wirtschoft wenn si scho do sitzän?“

I: „Woahrscheinlich ned so vü wie du, dafür kau i an Opflstrudl ausziang, des is fia mi a bissl österreichischer ois a Vortrog üwa die Wirtschoft wo noch zwa Minutn kana mehr hihuacht.“

Oder nehman ma des Beispiel Strache, der hot si jo moi so aufgregt, weu eam da Haider mit „Du“ augsprochn hot. Des moch i übrigens bei jedem Politiker, is afoch persönlicher und des „Sie“ taugt ma ned.

Strache: „Herr Fraunz, ich teile mit Ihnen das vertrauliche Du-Wort nicht, und das hat einen guten Grund. Sie sind nämlich nichts weiter als ein normaler Bauarbeiter der sich jetzt in der Politik groß profilieren will, nur weil er ein paar Gefällt Mir auf Facebook hat.“

I: „Und des sogt ma grod a ehemaliger Zahntechniker. Warum bist du in die Politik gaungan? Samma insolvent woan? I sog trotzdem weiterhin Du zu dir, kaunst di ruhig aufreng, i hea trotzdem ned.“

Juhu, jetzt homma olle glocht oder mitn Schädl beidlt, oiso samma olle glicklich und zufrieden.

Wie schaut des Parteiprogramm aus?

I hob a boa Ideen, olladings find i des a bissl wie in ana Diktatur, wenn i des allanig beschließe. Desweng wü i unsare Demokratie dafia ausnutzen und obwoartn wie vüle Leid do mitmochn, damit ma üwa die einzelnen Punkte abstimmen und die jeweilige Zustimmung obwoartn kennan. Wie gesagt – miteinander stott gegeneinander, auch in der Partei!

Wie heißt die Partei?

Gleiche Lage wie bei da vorherigen Frage, des wü i a ned allanig bestimmen. Mei Favorit warad jo die „Menschliche Partei Österreichs“ – die MPÖ. Owa iagandwie hob i des Gefühl, dass do bessere Vorschläge gibt. Oiso hoits eich mit Vorschlägen ned zurück, i bin fia ois offen. Außer TPÖ, Trangla Partei Österreichs, des moch ma ned ;)

Welche Farbe hat die Partei?

Do bin i wirklich mit mein Latein am Ende, iagandwie san scho olle leiwaundn Farben vergeben und sowos schirches wie Türkis oder ähnliches gfoit ma ehrlich gsogd ned. Oiso, a do warad wieder die Stimme der Mehrheit vo Entscheidung.

Soweit fürs Erste! Wos hoits ihr vo dera Idee? Idiotisch? Genial? Lustig? Scheißegal, sogts eich wos denkts, hier herrscht Meinungsfreiheit.

An alle de dabei sei wuin: Schreibts ma auf Facebook a private Nochricht und im besten Fall, fois eich wos eigfoin is, a glei eichare Vorschläge zu Parteiname und Farbe.

Olles weitere erfoahrts ihr in an neichn Bericht vo mir. Jetza schau ma moi wie sie des ois entwickelt.

I gfrei mi üwa jeden anzelnen, der bei dem Projekt mitmocht und dem gaunzen an ernsten Grundboden verleiht. Mir würd des gaunze extrem vü Spaß mochn und trotzdem würd i mit Ernst bei da Soch sei. Moi schaun wos daraus wird.

Miteinander statt gegeneinander!

-       Da Fraunz!