Dörfer sterben? Liegts an Ebola? Oder herrscht a erhöhte Strahlung? Nein! Es geht eigantlich um die Kleinunternehmen in den Dörfern, deren Schließung und die Folgen in der Zukunft. Zumindest san des meine eigenen Gedanken.
I bin gern unterwegs, desweng bin i am Saumstog mit meina Winterbitch (Audi 80, guat zum Driften) a wengl im südlichen Niederösterreich herumtuckert. Vo Rax bis Hohe Wand bin i ois obgfoahrn, oiso Reichenau – Puchberg am Schneeberg – Maiersdorf wenn mas genau nehman wü. Und spätestens in Puchberg is ma wos schmerzhoft bewusst woan.
Die Dörfer steam imma mehr aus!
Wie man i des?
Wia i no kla woa, bin i mit meina Famülie oft in de Gegend zum Waundan gfoahrn. Es gibt nix schenares ois aun an schenan Summertog auf da Rax zu spazieren oder mit da Salamander Bahn aufn Schneeberg auffezutuckern. Gegn a Klettertour auf da Hohen Wand hob i a nix, am Schluss geht ma a Runde paragleiten und genießt die Freiheit. Owa wurscht, i gleit vom Thema ob.
Friacha san ma daun moi gach zum Fleischhocker um die Eckn gaungan und hom si a guade Jausn ghuit. Oder in da Fruah zum nächstbesten Bäcker um a gscheids Fruahstuck zu hom. Ois aundare host da beim nächsten klanan Lodn kauft.
Und genau des is es Problem: Diese Läden gibt’s olle neama! I hob so vü geschlossene (na, es woa ka Mittagspause!) Fleischhauereien, Greißler und aundare Kleinunternehmen gsehng, dass ma richtig koit aufgrunnan is. San des die Folgen der Globalisierung oda wos? I was ned, jednfois tuats ma sehr weh, dass suiche traditionellen Betriebe olle dicht mochn, weu die Leid zum Billa, Spar oda ins nächste Einkaufszentrum in da Umgebung huschn, weus do ois vü billiger griang. Und zu ana meist schlechteren Qualität.
Huits eich moi a Leberkässemmel bei an guadn Fleischhocker am Laund. Meistens is egal wie dick de is, du zoihst an gewissen Fixpreis (da Fleischhocker meines Vertrauens valaungt imma € 1,50) und griagst dafia a so an guadn Leberkäs, dassd am liabstn 10e davo essen würdest. Und daun kauf da moi zum Vagleich an Lewakas beim Billa. Pfui Teifl, do wirst jo freiwüllig zum Vegetarier….
Owa warum sterben deswegn die Dörfer? Weus meiner Meinung noch a Kettenreaktion is. Domois bist zum Fleischhocker gaungan, host a wengl trotscht und aundare Leid ausm Ort troffn. Genauso beim Greisler, beim Schuachmocha etc… und heite? Heite bist froh, wennst beim Wirten no iagandwöche Gsichta autriffst de die Politik vor da Tür lossn.
Die Leid kumman afoch neama zaum. Ma bleibt in seinen eigenen vier Wänden und zum Eikaufn foahrt ma gach zum Billa ohne das ma mit iagandwem redet, weu ma is jo im Stress und wenn 4 Leid vor dir woatn, muas sofuat die zweite Kassa aufgmocht wean.
Wir legn unsa Leben vü zu sehr auf die Überholspur aus anstott, dass mas afoch genießen. Und es san so klane Schritte wie die Schließung vo Kleinunternehmen, die dazu führen, dass si die Leid neama treffen und neama so kommunikativ san wie domois. Moi schauen wie des die heitige Jugend in 40 Joahr handhabt.
Wie sehts ihr des?
I geh jetza zum Wirten auf a Tratscherl und a boa Bier, iagandwie muas i die Wirtschoft jo a in da Freizeit unterstützen.
