Draußn schneits, eighatzt hob i und üwan Computer rennt lautstork die Musik vo The Who. Wos fia a schens Gfühl. Du lahnst di zruck, mochst die Augn zua und erinnerst di aun die Kindheit während Liada wie „Pinball Wizard“ oda „Baba O'Riley“ durchs Haus fetzn.

Im Auto ist des a recht entspaunnend (natialich mit offene Augen) wennst Songs vo legendären Gruppen wie Guns N' Roses, Led Zeppelin, Black Sabbath & Co heast.

Leider is des im Auto heitzutog neama meglich. I was ned wias eich geht, owa i hea im Radiokastl nur mehr David Ghetto (obsichtlich so gschriem), Avicii und lauter DUTZ DUTZ Geräusche. Oiso Techno und seine Kinder.

Und des find i extrem schod. Mog jo sei, dass de Ort vo „Musik“ bei da Jugend und einigen aundaren Leid guat aukummt wenn ma fuatgeht und pumpnzua im Kras hupft. Owa muas ma des desweng 24 Stundn am Tog auf und ob spün? Na!

Stöts eich moi vor: A ötares Ehepoa, song ma moi beide san 75 Joahr, foahrn im Summa noch Italien oda sunst wo hi. Auf da Autobauhn schoitns es Radio ei und auf amoi kumman eana diese DUTZ DUTZ Geräusche lautstork entgegn gschossn – gaunz ehrlich, do wundats eich no, dass so vüle Leid an Herzinfarkt beim Autofoahrn hom?

Friacha host di mit deine Freind in da Garage troffn, a büllige und hoiwat hinige Gitarr kauft, es Schlogzeig hot ma si im Notfoi aus Mülltonnen zaumbaut und a Mikrophon hots sowieso ned gem. So hot ma augfaungt zu spün und seine Fähigkeiten zu verbessern und auf diese Art san Bands wie Nirvana, Queen, Guns N' Roses, The Beatles etc... rauskumman.

Und wos is heite? Heite muast afoch nur an hoibwechs aunsehnlichen Körper hom, a bissl mitn Oarsch wockln, Zungan aussestreckn und guad zum Playback deine Lippen beweng kennan. Des hots friacha ned gem! Do hot dein Talent zöht, ned die Gier deiner Hintermänner! Schauts eich die „Künstler“ vo heite au: Wos kennan de?

Friacha host zu Leid wie Robert Plant, Pete Townshend, John Lennon, Freddie Mercury und sogoa zum Ozzy Osbourne aufgschaut – wos mochst heite bei Leid wie Miley Cyrus, Justin Bieber etc...? Do kaunst nur Sehnsucht noch ana Schrotflintn griang, iagandwo vasteh i den Kurt Cobain soga.

Und vo suiche Kasperl wie „Kay One“ und Co mecht i goaned aufaungan!

Die Musikwöd geht immer mehr in Oarsch. Heitzutog gibt’s so guat wie ka guade neue Newcomer Band, de die Bezeichnung „Band“ verdient hätte. Und wenn, daun schoffns es leider ned zu mehr außa a boa Auftritte in klanen Hallen und Hinterhöfen.

Wos is eichre Meinung dazua? Speziell die ötaren unta eich, die jungan werdn mir woahrscheinlich wieder vorhoitn wie „extrem schwer“ so a „Arbeit“ am Laptop is wenn ma so a „Lied“ „komponiert“ - Burschn, kaufts eich a E-Gitarr und schreibts a Liad mit Text und Noten für Schlogzeig, E-Bass, E-Gitarr und natialich fia die Vocals. Und bitte am Niveau vo Led Zeppelin, des is jo eh ois so prunznafoch und bei weitem ned so schwa wie des Knopfaldruckn am Laptop :)

Werde auch Du Teil unserer Community und nimm Kontakt zu Journalisten und anderen Usern auf. Registrier dich kostenlosund begeistere unsere Community mit deinen Kommentaren oder eigenen Texten/Blogbeiträgen.