I woa 39 Joahr oid und hob no immer die Zeit meines Lebens ghobt. Mei Leben hätt ned besser sei kennan, i persönlich woa glücklicher ois je zuvor. Es Anzige wos no gföht hätt, warad a Frau und eigene Kinder, owa he – es Lem is ka Wunschkonzert, oiso mocht ma hoit afoch es beste draus, und des hob i gmocht.

Ironischerweise hot mei Körper ois aundare ois die Zeit seines Lebens durchgmocht.

Es woa a schleichender Prozess den i wirklich erst vü zu spät ernst gnumman hob.

Begonnen hot ois in den Weihnochtsferien, wia i auf Skiurlaub in Flachau woa.

Mei Wecker hot immer 6:30 Uhr gläutet. Aufsteh, kurz kultivieren, frühstücken und vo 8:30 – 16:00 Uhr auf da Piste steh. Beim Skifoahrn geht ma immer wieder aufs neichaste es Herz auf. Owa diesmoi is ma wirklich wortwörtlich aufgaungan.

Jedes moi wenn i aufgwocht hob, hots ma an Stich ins Herz gem, dass i glaubt hob i fliag glei um. Echt schirch, bist deppat. I hob ma docht, dass a eizwickter Brustnerv is. Bissl massiern, Rücken durchbiagn und es gröbste woa üwastaundn. I hob den Schmerzen vü zu wenig Beachtung gschenkt.

Nochm Urlaub woa ois wieder vorbei. Im Endeffekt hob i ma hoit docht, dass a Verkühlung woa. Hoib so wüd. Ois ehemaliger Bauhackler bist a wengl härter im Nehmen und gehst ned glei ei wenn di a Schas zwickt.

Zu der Zeit woa i grod ois Lehrer aktiv. Die Ferien woan vorbei, der Schulalltag hot wieder augfaungan. I was no, dass mei Klass grod a Englisch Schularbeit gschriem hot. Meine Schüler hom bei Unsicherheiten imma frogn können, i bin daun zu eana gaungan und wuitat eana des iagandwie erklären, ohne eana die richtige Antwort zu song. Meistens sans immer vo söbst draufkumman und des hot mi sehr glicklich gmocht.

I bin während der Schularbeit auf meinem Sessel ghuckt, ois a Schülerin mi gfrogt hot, ob i kurz herkumman kau. I wuit aufsteh, auf amoi hots an Schnoiza beim Herz gmocht, dass i glei moi kurz und leise aufgschrian (kau ma leise schrein?) hob. Die Schüler hom olle aufgschaut und meine Augn woan total aufgrissn, so gschreckt hob i mi. I bin sitzen bliem, hob tief ein- und ausgeatmet und der Schülerin gsogd, dass i in a boa Sekunden bei ihr bin. Gesagt getan, da Schock und da Schmerz woa weg, i bin zu ihr higaungan, hob ihr ghuifn und beide woan ma glücklich.

Wir hom a Doppelstunde ghobt, olladings nur die erste Stund fiad Schularbeit genutzt. I hob die Arbeiten eigsaummelt und in da zweiten Stund homma begonnen die Schularbeit zu verbessern. Punkt für Punkt. Es woa immer sche, wennst die Lösung auf die Tafel schreibst und si die Schüler gfrein. Bled woas hoit, wenns gschimpft hom, weus wos foisch gmocht hom. Owa vo sowos geht die Wöd a ned unter.

I hob auf da Tafel grod des Wort „territories“ gschriem, ois ma wieder a Schmerz durch die linke Brust gfoahrn is. Schlimmer ois je zuvor. Mir is die Kreide obbrochn, i bin vornüber gegen die Tofel gflong, hob mi mit da rechten Hand obgstützt und mit da linken aufs Herz ghoitn. I hob mein Schädl noch rechts draht, die erste Reihe meiner Schüler gsehng, mit an schmerzverzerrten Gsicht zu eana gschaut und gsogd: „Huits an Lehrer, i brauch Hüfe, mei Herz spinnt.“

Kane 20 Sekunden späda woa da Lehrer vo da Nebenklass und ana meina Lieblingsspetzln bei mir, hot mi aufn Sessel gsetzt und gschaut, dass i mi beruhig. Sofuat homma gschaut, ob i mein linken Arm ohne Probleme bewegen kau. Hot funktioniert. Danoch bin i aufgstaundn, beide Haxn obwechselnd angezogen, kurz gsprungan, Arme gekreist, Kopf gekreist, tief ein- und ausgeatmet etc…. hot ois wieder funktioniert.

Owa jetzt woa ma kloa, dass i a wengl a Problem hob. Desweng bin i zum Direktor gaungan, hob eam die Sachlage erklärt und eam gebeten, dass a mi zum Doktor foahrn losst. Woa ois ka Problem, er wuit mi sogoa söwa fiahrn owa i hob do schowieda Schmähs reißn kennan und desweng zu eam gsogd: „Wennst an Audi foahrst, daun steigst ned freiwüllig in so an schirchn BMW ei.“ :-P niemois den Humor valieren!

I bin zu meinem Orzt gaungan, hob eam ois erklärt und bin glei moi auns EKG aughängt woan. Komischerweise woa ois ok, mei Herz woa stoark wie a notgeiler Stier. Des hot mi sehr gwundat, weu i hob ma fest eibüdet, dass i in da Schui grod an gaaaanz minimalen Herzinfarkt ghobt hob – oder song ma moi, da Motor is gaunz kurz obgstoarm.

Am nächsten Tog in da Fruah hob i komplett nüchtern (also nix essen, nix trinken) bei eam sei miasn. A Bluatbild woa augsogt.

„Vielleicht host afoch nur a Gripp übergangen. I schreib di moi in Kraunkenstaund bis ma die Ergebnisse hom. Schau ma moi wos de song, hoff ma moi nix schlimmes.“

Mei Hausarzt, mittlerweile in Pension, woa übrigens da beste Typ im weißen Gwandl. Ausm Iran herkumman, an geileren Dialekt ois jeder Wiener und es Hirn vo eam woa a anziges Lexikon, egal zu welchem Thema. Bevorzugterweise natürlich Medizin.

A Wochn späda woa i wieder bei eam wegen den Ergebnissen. Hot mi ehrlich gsogd gwundert wie schnö des gaungan is, bei aundaren woatest 25 Joahr bist wos griagst. I hob mi higsetzt, er hot mi gaunz ernst augschaut und die Worte gsogd, de ma wirklich fost a braune Hose beschert hom wenns vastehts wos i man.

„Fraunz, wir hom a Problem und du muast jetzt gaunz stoark sei.“

Na super, des faungt jo guat au. Ob dem Moment woa ma kloa, dass i aunscheinend mit an Haxn im Grob steh und hoiwat am Varrecken bin.

„Du host extrem hohe Tumorwerte. Viel zu hohe. Und i wü ehrlich zu dir sei, des schaut üwahaupt ned guat aus. Wenns a bissl zu hoch san, daun hot des ned wirklich wos zu bedeuten, weu da Körper afoch verrückt spün kau. Bei dir sans owa drastisch erhöht und deine Schmerzen im Brustbereich kumman a no dazua. Meiner Einschätzung noch host du an Tumor in da Brust. Kummt bei Männern ned oft vor, deaf ma owa trotzdem ned unterschätzen. Wir miasn so schnö wie meglich wos tuan und schaun, ob er eh no kane Metasthasen gstraht hot.“

Danoch hob i neama wirklich highuacht. Da Boden hot si unter mir aufgmocht und mei gaunze Welt is zaumbrochen. Krebs. Brustkrebs. Ich. Warum i? Wos hob i gmocht? I woa mei Leben laung a guada Mensch, hob jedem ghuifn so guat i kennan hob und jetza sui i mit ned amoi 40 Joahr aun Krebs varrecken? Es woa erst a boa Joahr her, ois mei Opa qualvoll an Krebs gstoam is. I hob sei Haund im Todeskampf ghoitn bis vorbei woa, kurz davor hot a no a schwarze klebrige Masse raufgekotzt. Es hot gwirkt, ois waradn seine Organe auffakumman. Und des gaunze sui jetzt mit mir a passiern?

Fia einige Sekunden hob i mi wirklich komplett aufgebn und woa so pessimistisch, dass i glaubt hob i muas steam. In dem Moment hots kan Ausweg mehr fia mi gem, es woa a Todesurteil. Owa wie gsogd, es woan nur einige Sekunden.

Glei danoch is in mir sowos wie a Feuer entfacht. Das Feuer der Hoffnung, das Feuer der Kraft, das Feuer des Kampfes! Huacht si echt gschwuin au, i was, owa auf amoi hob i so vü Kroft aus mir söbst geschöpft. Du klana Dreck in meina Brust wüsd mi oiso umbringan? Dir zag i wo da Bartl in Most huit, du legst di mitn Foischn au. Mi biagst du ned um, i hob no laung ned genug vom Leben!

„Fraunz, host du vastaundn wos i gsogd hob?“ – mit diesen Worten hot a mi aus meiner Trance ghuit. I hob eam augschaut, genickt und gsogd: „Jo, jetzt haßts kämpfen. Und den Kaumpf wia i gwinnan.“

I hob a Überweisung fias Kraunkenhaus griagt und am nächsten Tog hätt i scho duat mei Zimmer beziang suin. Wohlgemerkt muas i erwähnen, dass ma do no ned amoi gwusst hom, ob i jetza wirklich an Tumor hob oda ned. Und ob er in meiner Brust is oder iagandwo aundast. Owa instinktiv hom da Oarzt und i scho gwusst, dass es wui nix aundares sei kau.

I bin vom Oarzt hamgfoahrn, zum Telefon gaungan, wuitat meine Ötan auruafn und eana die Hiobsbotschaft üwabringan. Genau in dem Moment wo i den Hörer in die Haund gnumman hob, is ma eigfoin, dass no wer aundara davo erfoahrn muas. Und zwar vo mir persönlich, ned vo iagandwem aundaren.

Kane fünf Minuten späda bin i im Auto gsessen und Richtung Schui gfoahrn. Ois Klassenvorstand woas ma afoch wichtig, dass i meiner Klass des persönlich mitteile. Die schwerste Prüfung meines Lebens hot soeben begonnen und ois Lehrer wü ma seine Schüler aufn Ernst des Lebens vorbereiten. Ma sui eana zang, dass ma hin und wieder afoch stoark sei muas und si ned umbiang lossn deaf, weu es Leben afoch viele Rückschläge parat hoit. Wie hätt i eana des oiso bessa zang kennan? Außerdem hot mi des sehr guat obglenkt, daham warad i wui im emotionalen Chaos versunken. Soeben hot a wichtige Mission begonnen und de wird verdaummt nomoi erfolgreich abgeschlossen!

Fortsetzung folgt!