Im Andenken aun einen meina besten Freind, dem Roman, der aun den Folgen seina HIV Infektion AIDS griagt hot und gstoam is, hob i gestern an sehr lustigen Obend beim Life Ball vabrocht.

HIV bzw. AIDS kau uns olle treffen, ned nur Homosexuelle! Desweng muas des Bewusstsein fia de Kraunkheit weiter voranbrocht werdn (is des deitsch?), damit ma diese schreckliche Seuche endlich weggriang. Da Roman woa zum Beispü hetero und hot in ana Wochn mehr Weiwa flochglegt ois ihr in eichan gaunzn Lem - bledaweise is eam genau des zum Vahängnis woan.

I wia nie vagessn wie ma si in den 80er Jahren um eam gekümmert hom, des hot si üwa Joahre gezaht. Wenn du mitaunsehng muast, wie ana deina besten Freind und dei Mitbewohner (WG, wir woan jung) sozusagen bei lebendigen Leibe verwest und du nix dageng tuan kaunst, daun is des wirklich ois aundare ois sche.

Diese Zeit hot mi sehr geprägt, olladings hätt i liebend gern darauf verzichtet.....i darad vü liawa jetza no mitn Roman am Wochnend fuatgeh, ma an driwasaufn, auf Aufriss geh und in da Fruah in an fremden Bett nem ana fremden Frau munta werdn.Life's a b*tch - oiso sei a ane! Den Schmäh homma oft grissn. Niemois hätt ma docht, dass ausgerechnet desweng ana vo uns stirbt. A späte Rache vo ana vanoschtn Frau, de uns mit an Haumma daschlogt, mitn Auto zaumfiahrt oda in da Donau vasenkt - des warad no vorstellbar, owa a AIDS Erkrankung? Na!Desweng: Bitte passts imma sche auf eich auf! I hob den Roman bis zum Schluss gepflegt und i kau eich song, des woa so ziemlich ane der schlimmsten Ereignisse in meinem Leben. Ma kau des ned beschreiben! Auf kan Foi!I wia nie vagessn, wie er in a Koma gfoin is, da Orzt vorbeikumman is und eam Morphium gspritzt hot. Er hot seinen Körper neama unta Kontrolle ghobt, desweng hot a si auprunzt. I hob eam die Kleidung wechseln wuin und hob dabei bemerkt, dass a neama atmet und ebenso kan Puls mehr hot.

I hob eam ned reanimiert! Er hot an sehr langen und unbeschreiblich qualvollen Todeskaumpf ghobt und somit woa i wui genauso erleichtert wie er, wie ers üwastaundn und losglossn ghobt hot.R.I.P Roman!I was no gaunz genau wos i danoch in London auf da Hausmauer vo deinem größten Idol, Freddie Mercury, an Tog noch dessen Tod higschriem hob."Flying with the stars" PS: Meinen höchsten Respekt vor Gery Weszler, der gestern gaunz überraschend vorm vollen Rathausplatz a Outing über seinen Gesundheitszustaund gmocht hot. Er is seit seinen 20ern mit HIV infiziert, steht trotzdem pumperlgsund auf da Bühne und erwähnt unter Tränen, dass er schon sehr vüle Freind wegen dieser schrecklichn Kraunkheit valorn hot.

Respekt Gery, Respekt! I was wie du di gfühlt host, wenn a Freind weng HIV gstoam is. I fühl mit dir und bin dir sehr daunkboar, dass du sowos nettes wie den Life Ball ins Leben gruafn host. I bin hetero vo vurn bis hintn, owa am Life Ball zählt das Leben, ned die Sexualität!