Meine Freind würdn mi heite wui ned so leicht erkennen. I sitz jetza beim Laptop und hob mi sehr verändert. Vier Wochn laung hob i mein Boat neama rasiert, bis aufs Kinn is ois zuagwochsn. Es Kinn is wundersche frei, davor ziagt da Bort a wunderschene Kurvn Richtung Oberlippn. Da Schnurrbort is a mehr oder weniger wos woan, olladings bei weitem ned so ausgeprägt wie die restliche Gesichtspartie.

Mit an Edding hob i ma auf da linken Gesichtshälfte zwa große Punkterl auffegmoint, sie suin Geschwülste (Fibrome) darstellen.

Auf mein Schädl hob i an schenan Huat mit an lässigen Logo. Mei Oberkörper wird vo an ausgwoschanen schwoazn Arbeiterhemd bedeckt, darüber trog i a schwoaze Jeans Weste mit a boa Albumcovers und Schriftzügen vo ana gaunz bestimmten Band.

Weu ma scho bei den Jeans san: I trog a enge schwoaze Jean (es zwickt!!!) und meine Springerstiefel (Na, des mocht di ned zum Neonazi!) runden meinen dubiosen Cowboyblick a wengl ob.

Zur Krönung hob i ma no an E-Bass umghängt.

Warum renn i heite so herum? Weu heite „Faschingsonntag“ is und in etlichen Gemeinden in Österreich finden heite Faschingsumzüge statt. Soweit i informiert bin, gibt’s des in Wien ned wirklich. Zumindest ned so, wie mas in den aundaren Bundesländern kennt. Desweng huck i mi glei ins Auto und foahr zu Bekaunnten noch Niederösterreich, do beginnt in 2 Stundn da Umzug und wir hom an eigenen „Musiklegenden“ Wagen.

Die eingefleischten Rock ‘n‘ Roller werden hoffentlich erkannt hom, ois wos i heite geh. Lemmy Kilmister, Bassist und Sänger der Band Motörhead und mei größtes Idol seit den späten 70er Jahren – mei, woa i moi jung.

Auf unserm Wogn san no aundare Legenden vertreten, unter aundarem Janis Joplin, Jimi Hendrix (aufn Loui bin i scho gspaunnt, der is kasweiß und muas an Afroamerikaner verkörpern), Kurt Cobain, Freddie Mercury, Falco, Georg Danzer und da oide Gusti spüt den Udo Jürgens. Owa am meistn gfrei i mi aufn Hausi, wenn a den John Bonham am Schlogzeig verkörpert.

Wir hom an Wagen, Stromversorgung, E-Bass, E-Gitarre, Schlogzeig und a Mikro (Janis, gemma, auf geht’s). Wenn des ka Gaude wird, daun friss i an Besen saumt da Putzfrau.

DAS, meine Damen und Herren, is richtige österreichische Kultur! Des Faschingstreiben is fia mi immer ans der Highlights im Jahr. Gibt nix leiwaundares, ois si zu verkleiden und afoch moi obzugeh wie a Zapferl. Do spüst an Rockstar und wirst nebenbei vo an Indianer mit ana Hockn vafuigt, während a Frau ois Teufel verkleidet auf die woatet und mitn Dreizack aufspießen wü. Herrlich, i hob richtig an Grinser im Gsicht.

Wie schauts bei eich aus, gibt’s heit bei eich a an Faschingsumzug? Wenn jo, geht’s hi? Verkleidets eich, oder sads stille Besucher? Und wie is eichre Meinung zu unserm Fasching? Teilts es mit uns, i bin scho gspaunnt.

Und jetzt start i mein Quattro und zisch ausse noch Niederösterreich. Hawedere, mochts es guad, owa ned zu oft.