Es geht wieder los. Aschermittwoch. Die Fastenzeit beginnt. Und überoi werdns auf amoi scheinheilig. Im Radio redens a zwamoi pro Stund üwa den Beginn der Fastenzeit. Die Mizi Tant, de im Joahr ka anzigs moi ind Kirchn geht, sogt auf amoi, dass ma heite ka Fleisch essen deaf. Weu des is jo a Sünde, und Sünden werden vom lieben Gott bestraft (welch Ironie).
Und auf amoi schaun dich die Leid deppat au, wennst genusshoft a Wurschtsemmel isst. Ois warasd a Schwerverbrecher. Owa komischerweise mochn des nur die ötaren Leid, oiso ungefähr mei Altersklasse (50 aufwärts). Die Jüngaren, oiso die „next generation“, streitn si mit dir in da Woateschlaungan vom McDonald’s wer ois erster do woa. Weu die Mama hot jo gsogd, dass heite ka Fleisch gibt.
Owa des is zum Glück ned bei ollen der Foi.
Warum wird des Thema eigantlich so verallgemeinert? Warum wird darüber so geredet, ois würd ma olle in den Topf „Christentum“ einepassn? Es is nunmal so, dass die Leid in da heitigen Zeit neama auf an oidn Mau in den Wolken glauben, der so liebevoll is, dass er die Menschheit moi ausradiert hot (Sintflut), oda eana es Leben pervers schwa gmocht hot (sieben Plagen), oda seinen eigenen Sohn bei ana blutrünstigen Hinrichtigung geopfert hot – um uns zu erlösen.
Und weu der besagte Sohn aungeblich 40 Tage und 40 Nächte durch die Wüste spaziert is und gefastet hot, suin wir a 40 Tage und 40 Nächte fasten und auf einige Dinge verzichten – zum Beispiel Fleisch. Eigantlich hot ma jo in da gaunzn Zeit ka Fleisch gegessen, heitzutog beschränkt ma si nur mehr auf a boa Tog wie Gründonnerstag (Spinat, juche), Karfreitag, Karsamstag und bis 12 Uhr mittags am Ostersonntag.
40 Tage lang – gaunz sche launge Zeit, wie hot der Bursch des nur ausghoitn? Ajo richtig, Gottes Sohn, do woa jo wos.
Owa interessant, dass es wiedermal die Zahl 40 sein muss, findets ned a? Die 40 Tage der Sintflut, die 40 Tage die Mose am Berg Sinai bei Gott verbracht hot, die 40 Tage die der Prophet Jona da Stodt Ninive zum Buße üben aufgetragen hat, damit Gott nicht deren Stadt auslöscht (wie gesagt, sehr liebevoller Kerl dieser Gott). Und natürlich die 40jährige Reise des Volks Israel beim Auszug aus Ägypten etc….. oiso hier geht’s rein um die Symbolik.
Leiwand, Volkssagen die vor tausenden Jahren entstanden bzw. erfunden woan san, suin fia uns im heitigen Leben no immer a Leitfaden sei? Fia wos denn bitte? Damit i sündenfrei leb und ned in die Hölle kumm? Sorry, owa i bin bekennender Agnostiker und glaub mit Sicherheit ned aun die Lehren des Christentums. Wenns noch denen geht, daun kumman Schwule, Prostituierte, „Rebellen“, Drogenjunkies etc… olle noch da Reih in die Hölle – na heast, do geh i doch freiwüllig in den unteren Stock. Darad mi gern mitn Kurt Cobain, John Lennon und Freddie Mercury auf a Zigarettn treffen. Außadem is do untn sicha wärmer und die feschn Frauen san a unten. Perfekt!
Warum sui i ma vo ana Sektengemeinschaft (des is nämlich des Christentum, genau so wie jede aundare Religionsgruppierung – Zeugen Jehova zum Vergleich) vorschreim lossn, waun i wos essn suit? Des is ma jo beim Oarsch wuascht wos de daherträllern! Ka Auhnung vom Tuten und Blosn, owa mir wos vom Leben dazöhn wuin. Sowos mocht mi grantig!
Und no grantiger mochts mi, dass des so in die Öffentlichkeit posaunt wird, ois würds uns ALLE betreffen! I trau mi wetten, dass der Radiomoderator vo 88.6 ka Kirchengänger is. Und ob er den kompletten Rosenkraunz beten kau, wage i a zu bezweifeln. Und ob er schomoi wos vo den Apokryphen gehört hot, owa des wird jetza zu speziell.
Aundaraseits deaf ma eam a ned bes sei, weu er jo aktuelle Themen im Radio aufbringa muas. Und traurigerweise is die Fastenzeit a aktuelles Thema, weu ma laut Papier no immer sehr vüle Aunhänger vo monotheistischen Religionen in Österreich hom. Betonung auf Papier, zumindest bei de Leid deren Religion kurz noch da Zeitenwende entstaunden is.
Wie stehts ihr zu dem gaunzn? Hoits ihr eich aun die Fastenzeit oder geht’s ihr, so wie i, frei nochm Motto: „Mei Lem, mei Entscheidung, mei Problem“?
Und tschuidige fia den etwas bösen Ton vo mir, owa diese Religionsthemen mochn mi grantig. Eigene Meinung und so J
