Boid geht’s wieder los, es juckt scho uandlich in den Fingern. In fünf Tagen betreten wir wieda die heiligen Felder in Nickelsdorf und feiern vier Tage (Donnerstog bis Sonntog, am Montog geht’s wieder ham) bis ma afoch umfliang. Und nembei huacht ma si richtig geile Bands au. Mötley Crüe mitn letzten Österreich Konzert (Abschiedstour), Motörhead (is wui boid mei 100. Motörhead Konzert, es wird afoch nie fad), Die Toten Hosen (mit an Onkelz T-Shirt ;) ), Powerwolf, Drescher (Geheimtipp!) etc….

Und ois Highlight gibt’s den Wolfgang Ambros ois Late Night Act.

Wah, es is so herrlich. Mit meine 52 Joahr foahr i auf des Festival ois warad i erst 18 woan. Sche warads, daun hätt i no kane grauen Hoa.

Owa wie bereitet ma si eigantlich auf so a Festival vor? Und wos wü i eich mit dem Blog eigantlich mitteilen? Ka Auhnung, i schreib afoch meine Vorbereitung moi owa und vielleicht is fian an oda aundaren wos hüfreiches dabei.

Wichtig is amoi, dass a Zöt hobts. Sunst schlofts draußn und des is aufd Nocht ned so leiwaund. Es kau nämlich sehr koit werdn. Oiso nehmts eich a wos launges und wärmeres zum Auziang mit.

Im Zöt wüsd natialich ned am Boden schlafen – oiso nehmts eich a Iso Matte mit. I hob no dazua a aufblasbares Luftbett mit. Gfrei mi scho, wenn i des mit a boa Frauen testen kau. Höhöhö, i bin jo so a Macho.

A Schlofsock warad auch a Hit, weu wie gsogd – es wird koit.

Trinken, ihr brauchts wos zum Trinken! I persönlich marschier mit 5 Paletten Bier ei, de sauf i jedoch ned allanig. Auf an Festival herrscht generell des Motto „geben und nehmen“ – du saufst wos mit die Nochbarn, gibst eana wos vo deinem Alk und am nächsten Tog saufst eanan Alk. Wenns des ned mochn, daun host die foischn Nochbarn dawischt. Pech.

Nehmts auch an Radler mit. Iagandwaun hängt da es Bier ausse und du wüsd a wengl ausnüchtern. Do eignet si de Biervergewaltigung am besten.

Fia Saufspiele aufd Nocht (togsüber is zu haß – gefährlich!) brauchts Mischtrankln und wos hoates wie Schnops. I kumm mitn söwabrennten Palinka vo da Vawaundtschoft, der brennt da ois wegga. Des is wirklich ka Spielzeug.

Essen, des is gaunz wichtig. Am Besten kaufts eich Dosenfutter. Chili Con Carne und Serbische Bohnensuppe (fian Subwoofer, wenns vastehts wos i man) san meine Lieblingsgerichte aus da Dose. De kaunst a koit essen, i nimm generell kan Gaskocher mit und iss des immer koit. Schmeckt wirklich super, diafts eich nix scheißn.

Schauts, dass ned zu oft wos vo da Fressmeile huits. Des Zeig is sauteia und vü zu wenig. Letztes Joahr wuit i ma Palatschinken kaufn. Hom 4,50 Euro kostet. Im Endeffekt woas a 10cm launge Palatschinken mit an Mokka Löffel Marmelade. Fost so a Vaorschung wie unsre Politiker. Oiso – vagessts des und nutzts es nur im Notfall.

Sonnencreme!!!

Campingsessel! Den brauchts, damits unterm Pavillon (den miasts a selber mitnehmen) sitzen kennts.

Iagandwie miasts de Sochn a einetrong. Oiso schauts, dass eich a Rodel oda ähnliches besorgts. I hob ma söwa a Transportwagal zaumbaut, des tua i am Parkplotz no zaumschrauben und scho geht’s los. Owa vawendets gscheide Rafn, am besten Hartplastik. Die Stana bescheren eich schnölla an Rafnplotza ois schaun kennts und daun schauts nämlich bled drei.

Gwaund vasteht si hoffantlich vo söbst.

Duschzeig und Haundtuach, es gibt a Duschzöt wo ma si supa duschen kau. I schau do gern üwan Zaun zum Damenbereich umme. Vielleicht siecht ma si jo.

Zahnbürste warad a ned schlecht, sunst wird’s fia eichan Aufriss a wengl grindig.

Apropo Aufriss: Fia die notwendige Verhütung suitats sorgen. A waun die Frau die Pille nimmt, grod auf an Festival is Hygiene ned so es wichtigste, do faungst da schnölla wos ei ois wosd schaun kaunst. Wos am Nova passiert, bleibt am Nova. Außa Herpes, den Scheiß host ewig. Und a Freind vo mir is weng fehlender Verhütung aun AIDS gstoam, ois aundare ois leiwaund.

Oiso – liawa a Strumpfhosen üwas dritte Haxal driwastrafn und weniger spian ois mehr spian und varreckn. Nur a Tipp vo an oidn Mau.

Fois wer ned schlofn kau wenns laut is – nehmts eich Ohropax mit, aufd Nocht bricht immer die Hölle (oda da Rausch) aus und es is ziemlich laut. Desweng schlof i nur maximal 2 Stunden, mehr geht afoch ned.

Wettertechnisch wird’s ziemlich woam, oiso miasts eichre Getränke kühlen. Hierfür eignet si am besten Trockeneis. Kühlboxen san sche und guat, owa mei Oarschritzn darad genauso guat kühlen, oiso würd i mi mehr aufs Trockeneis konzentrieren.

Owa Vorsicht: Des Zeig is ka Spüzeig, des kau Verbrennungen (huacht si bled au, is owa so) verursochn wenn mas zu laung in da Haund hoit. Und bitte hauts es ned iagandan bsoffanen der schloft aufd Haut. Des mog zwar lustig sei, owa es is a richtig asozial. Tuat ziemlich weh. Schene Griaß aun des Oarschloch vom letzten Joahr, des Branding hob i heite no bei meinem linken Nippel.

Zweites paar Schuhe! Ma was nie wos passiert, do kau a zweite Garnitur ned schodn. I hob meine Springerstiefln (na, i bin ka Nazi) und mit de darad i sogoa den Wötuntagaung üwalem.

Sonnenbrille! An Huat, a Kappal, iagandwos fian Schädl hoit. Sunst hobts so an Sonnenstich wie i im Moment. Bin am See eigschlofn, i hob Schädlweh wie a Vuitrottl.

Halswehtabletten, am besten Tantum Verde. Der Staub und die Schreierei tuat die Atemwege extrem reizen und des tuat a bissl weh. Do wirken suiche Lutschtablettal wahre Wunder.

Fia die Empfindlichen: Nehmts eich Dünnschiss Tabletten mit. Biophlorin, Antibiophilus oda sowos in da Oat. Scheißerei is scheiße, desweng suitat mas schnö in Griff griang.

Und weu ma scho beim Stuhlieren san: MEIDETS DIE DIXI KLOS!!!! Es gibt beim Duschzelt fixe Standheisln mit Klospülung de olle 30minuten geputzt werden. Vü hygienischer und afoch vü aungenehmer, weu ma ned die Werke vo 100 aundaren Leid drinnan siecht. Vatrauts ma, i hob bis jetzt nur in jungfreiliche Heisln gekotet.

A Kanister warad a ned schlecht, damits eich vo da Wasserleitung gaunz vü Wossa mitnehman kennts. Zum Trinken, zum Obkühlen, fia die Katzenwäsche etc…

Gaunz wichtig no: An Haummer! Damits die Haring beim Zöt gscheid eineschlong kennts, ohne Haummer wiast do nämlich deppat und zornig. (Tipp: Die Heringe SCHRÄG eineschlong, daun ziangs sche bei die Stana vorbei. Wennst es grod einehaust, daun vabiagst es nur, es wird nix und es Zöt lernt fliang)

Und es Wichtigste zum Schluss: Geld!

Damit ma uns olle im Jägermasta Zöt auf a boa Saftal und an leiwaundn Rausch treffen kennan ;) see you there motherf*ckers.

In diesem Sinne: Schens Wochnend \m/

Fois wem no wos eigfoin is, daun suit as bitte in die Kommentare schreiben.