Gestern woa i ana vo tausenden Leuten, de si am Red Bull Ring zum AC/DC Konzert troffn hom. In dem Blog mechat i des gaunze a wengl Revue passiern lossn und mei eigene Meinung niederschreiben.

Mei Eindruck vom Konzert: Super, leiwaund! Hob olladings scho bessere Konzerte dalebt.

Vo da Organisation her woas wirklich perfekt, wenn ma jetza bedenkt, dass mehr ois 100.000 Leid duatn woan. I bin zmittog weggfoahrn, und woa um hoiwa 2 scho am Parkplotz. Kurz nochm Semmering bin i mit 160 in a Radar gfoahrn, des geht ma dezent am Oarsch, owa wurscht, dafia kennan die Organisatoren nix.

I woa ned allanig untawegs, da Peda und da Thomas san mitgfoahrn. Männerausflug ahoi. Noch an kurzn Kolonnenverkehr samma am Parkplotz aukumman, hom a Bier aufgmocht und hom unsare Nochboarn gsehng. Tiroler Kennzeichn, stön bahoat a Pavillon am Parkplotz auf, da Grüller woa eigschoit und gsoffn homs a scho. Mit de homma si glei moi augfreindet.

I bin im 80er Jahre Look gaungan – oiso Jeans Jackn mit aufgstickte Sochn. Da Ruckn woa mit an fettn Motörhead Motiv zuapickt. Fia des hom mi die Tiroler (und zwa Vorarlberger) glei gfeiert. Noch kurzen sprachlichen Differenzen (vasteh amoi an Vorarlberger, bist deppat….) homma scho a boa Biertschis kippt und woan guat drauf. Do hot auf amoi ana de Frog gstöt, de i seit a boa Joahr imma öfters hea.

(Tiroler Dialekt): „Heast, bischtu nit do Fraunz va Fesbukcchhh?“

Do hob i a wengl lochn miasn, meine Begleiter homs a gmocht und i hob nur „Des was ma ned so genau“ gsogd. Und scho is losgaungan,  da Schnops is ghuit woan. Iagandwie woan de vo mir fost mehr begeistert ois vo AC/DC. Komisch….

Noch an Randl samma daun endlich moi zum Eigaung kumman, olle drei schwer bedient und guat drauf. Einerennan in Wavebreaker, Platzl sichern und waaarten. 5einhoib Stunden um genau zu sei! Und do faungt da erste Minuspunkt au.

Kurz noch 18 Uhr hot die erste Vorband gspüt, bis dohi bist ghuckt, host graucht und gsoffn. Zache Partie, entweder huckst di hi, dir schlofn die Haxn ei, rauchst dei Tschickpackl aus und intensivierst deinen Rausch. Oda du gehst schlofn und hoffst, dass da kana aufs Gsicht steigt. Wie gsogd, sehr zache Aungelegnheit.

Weu ma scho vom Saufen reden: Es hot am gaunzn Gelände ka Bier gem. Nur so a göbes Prunzwossa mit Kohlensäure namens Ottakringer. Mit dem wosch i ma ned amoi die Fiaß. Owa jetza kummt die Härte: 1 Liter Bier hot 12 Euro gekostet mit Becherpfand! A hoiba Liter sogoa 7 Euro! Wos isn des?

Die greßte Frechheit is owa, dass es Wossa (!!!) genau gleich vü kostet hot! 1 Liter Wossa um 12 Euro! Do san a boa Hurnkinda dabei!

Im Zuschauerbereich san imma Bierverkäufer durchgaungan und hom es Geschäft eanares Lebens gmocht. Wossa hot kana vakauft! Do woan einige klane Kinder aunwesend, de sicha ka „Bier“ saufn wuitn. Und koit woas a ned, do braucht ma Wossa. Owa des is ned austeut woan, do host zum nächstn Standl kreun miasn und host froh sei kennan, wennst wieda zu deine Leid gfundn host. Danoch woast jednfois a oame Sau und des is a Frechheit! Normalerweise suitns Leitungswossa aubieten und zwar Gratis! Oda hoit um an humanen Preis, song ma hoit amoi 2€ da hoibe Liter – daun waradn weniger Leid zaumbrochn!

Die erste Vorband woa vo Soizburg, juhu, wos heimisches. Leider hot ma die Musikrichtung üwahaupt ned taugt, woa so a melodiöser Pop. Owa he, sie hom eanare Gaude ghobt und hom vor uandlich vü Leid spün diafn – find i super und i gfrei mi fia eana, desweng hob i a applaudiert. Imma fair bleim!

Die zweite Vorband, Vintage Trouble, woa a geiler Scheiß. Da schwoaze Sänger is ogaungan wie a Zapfal im Oarsch und hot Stimmung gmocht, ois waradn sie die Headliner. Perfekt, so stö i ma des vor.

Wieder woatn, owa nur 45 Minuten. Endlich geht’s los, des Intro Video vo AC/DC beginnt. A Meteorit schlogt ei, auf da Bühne gibt’s Explosionen und die oidn Rocker san auf da Bühne.

Owa des Wort „oid“ is do fost a wengl unpassend. Da Brian Johnson, weit üwa 60, hot wieda moi gsungan wie früher. Mi wundats, dass der nie Hoisweh noch an Gig hot. Die Liada hom si olle perfekt aughuacht, teuweise natialich a wengl aundast wie in die ötaren Zeit, owa he – mochts ihr des amoi mit dem Oita. I wia im Dezember 53 und warad froh, wenn die Knia vom Angus Young hättat.

Üwan Angus kau ma eh nix song außer: Wahnsinn! Der fetzt a Solo nochm aundaren hi und spüt amoi 20 Minuten am Stickl wie a notgeiler Hawara beim Glory Hole. Hut ab, Hut ab.

Hin und wieda hot a technische Probleme mit die Gitarren ghobt, owa des is ned sei Schuid, die Liada hot er perfekt gspüt. A boa Fehlgriffe passiern imma, vor ollem wennst so schnölle Sochn wie Thunderstruck owaspüst – spüts es söwa vor so vielen Leid und daun red ma weida.

Es woan 2 Stunden a richtig fette Ladung vo geilem Rock ‘n‘ Roll! AC/DC san ane der wenigen Bands bei de ma song kau, dass daunk eana no a wengl a Hoffnung fiad Musik herrscht, in der mittlerweule ois vo da Elektronik dominiert wird. Motörhead und AC/DC, solaungs de no gibt, solaung wird’s a den Rock no gem!

Des Hamfoahrn woa a ned so zach wie befürchtet, i bin relativ schnö vom Parkplotz aussekumman und im Ort und da Autobauhn woa daun a kurzer Stau, owa sunst is ois perfekt gwen. Respekt aun die Exekutive, ihr hobts an super Job gmocht! Bravo! I hob mit an stundenlaungan Aufenthoit am Parkplotz grechnet, owa dem woa ned so. Do suitn si a boa Organisatoren a Beispü nehman – i sog nur Magna Racino 2008 bei Bon Jovi. Kopfschuss!

Fazit: I hea nix mehr, außer des extrem laute Piepsen vom Tinnitus auf beiden Ohren und i bereus üwahaupt ned. Woa a gelungene Veranstaltung mit a boa Schönheitsfehlern, owa iagandwie kau is a vasteh, dass ma den Einloss friacha mochn muas wenn üwa 100.000 Leid kumman. De kaunst ned 2 Stundn vor Spübeginn einelossn, sunst host sowos wie bei da Loveparade mit ana Massenpanik und des wü wirklich niemand!

In diesem Sinne: For those about to rock, we salute you!