Wie es Thema scho verrotet, wird sa si jetza um mein Opa (väterlicherseits) und seine Gschichtln drahn de er ma oft erzöht hot. Kenntat vielleicht fia einige a wengl emotional werdn. Oiso entschuidig i mi glei moi fois iagandwer a feichts Gsicht griang suitat.I start des gaunze moi mit ana allgemeinen Frog aun eich olle: Wer vo eich hot no an Opa? Hot er eich scho iagandwaun amoi Gschichtn aus sein Lem dazöht? Bekaunntlicherweise is zwischn Enkerl und Opa immer a große Zeitlücke, in dera Zeit passiert sehr vü und ma erlebt umso mehr. Durch suiche Geschichten vom Opa kau ma sehr vü lernen, obs es glaubts oda ned.Mochts moi bitte olle eichare Augn zua und denkts aun eichan Opa und aun iagandwos wos er eich amoi dazöht hot....schene Erinnerung, egal worums geht, oda? Mir gehts zumindest so, obwuih er scho laung neama lebt. Mir wird imma wieda woam ums Herz wenn i aun mein Großvoda denk.Mei Opa is am 14.04.1910 aufd Wöd kumman, in an Laund des uns ollen fremd vorkumman darad. In der Monarchie Österreich-Ungarn, a Vielvölkerstaat mit mehr ois 50 Millionen Einwohnern und sehr vülen Minderheiten. Tschechen, Slowaken, Ungarn, Polen, Rumäner, Slawen etc... und heitzutog reng si die Leid auf wenn in Wien ana ned deitsch red - ihr hobts jo olle ka Auhnung!  Er is oiso mittn in die Monarchie geborn woan, no dazua in Wien - des Zentrum der Macht. Do woa da Sitz des Kaisers, zu dem Zeitpunkt übrigens Kaiser Franz Josef I. seit 62 Joahr (!!!) am Thron - 3 Generationen laung hom die Leid den gleichen Kaiser ghobt.Scho allanig des woan genug Gründe um mi fia Geschichte zu faszinieren. Er hot ma oft erzöht wias in da Monarchie woa, obwuih a nur die ersten 8 Joahr seines Lebens darin glebt hot – 1916 hot a si es Begräbnis vom Kaiser Franz Josef augschaut, weu da Trauerzug durch die Stodt zong is. Schlussendlich is 1918 die Monarchie aufglöst woan und da Kaiser Karl hot obdaunken miasn.Sei Kindheit hot er zeitgleich mitn 1. Wötkriag ghobt - vo 1914 bis 1918. Er söwa hot ma gsogd, dass er den ned so wirklich mitgriagt hot, owa sei Papa, oiso mei Uropa, woa sehr laung weg. Der woa nämlich Gebirgsjäger, im ersten Wötkriag so guat wie a Todesurteil. Owa er hots üwalebt. Jeder der Gschichtln vo seine Großötan kennt, wird automatisch wissn, dass i jetza locker 2 Wochn schreim miasat, damit i die wichtigsten Erzählungen beinander hob - desweng grenz i des ois auf a anziges Thema ein.Mei Opa im zweitn Wötkriag!Wir schreim es Joahr 1938, 20 Joahr nochm 1. Wötkriag, Österreich gehts echt beschissen. Die Wirtschoft is schwoch, die Leid san olle oam, ma hot ned wirklich wos zum Essn und es san unzöhlige Leid oaweitslos - a mei Opa.Auf amoi kummt da Hitler noch Österreich und verkündet den Aunschluss vo Österreich aun Deitschlaund:"Burli du musst da vorstöhn, i woa domois 28 Joahr oid. I hob dei Oma grod kennenglernt und wir hom owa ned heiraten und a ka Familie gründen kennan weu ma afoch ka Geld ghobt hom. I wuitat jo oaweitn, des wuitn wir olle. Owa niemand vo uns hot a Oaweit griagt, egal wos du gmocht host.Daun is da Hitler mit seine Leid kumman und vo an Tog aufn aundan hom wir olle Oaweitsstellen griagt. No dazua sehr guad bezoiht, wir hom uns auf amoi ois leistn kennan wos ma uns immer erhofft hom. Owa i hob den Frieden ned getraut. Die meistn Leid hom den Duifi sogor ois Erlöser betrochtet weu er in da ärgsten Not kumman is und ois zum aunscheinand Guadn draht hot. Mir woa der no nie geheuer, owa i hob mi trotzdem üwa mein Beruf und des Göd gfreit, weu dei Oma und i uns endlich wos aufbaun hom kennan."Mei Opa is afoch so vo an Tog aufn aundan Flugzeigmechaniker woan, obwuih er aus heitiger Sicht üwahaupt kane Vorkenntnisse ghobt hot - egal, wo a Wille is, is auch a weg.Erm woa vo Aufaung au klor, dass do aufgrüstet wird und boid da große Knoi kumman wird. Des woa daun im September 1939 da Foi, wia die Deitschn Polen augriffn und somit den zweiten Weltkrieg ausglöst hom - laut mein Opa (und a mei Meinung!) "ans der greßtn Menschenverbrechen wos jemois stottgfundn hot!""Wir hom uns domois no im Frühling unsa Grundstückl kaft und mitn Hausbaun augfaungan. Nur dei Großonkl und i, domois host kane Baufirmen ghobt de du da hergruafn host. Wir hom ois söwa baut - vom Kölla aushem bis zum letztn Dochziagl. Und nembei muast a no oaweitn. Egal wie schlecht es dir moi geh wird, denk imma drau: Du lebst in ana guadn Zeit, dir gehts guad und du host dei Lebn söwa in da Haund. Vagiss des ned, du bist dei eigener Herr!"Im September 1940 is daun a mei Opa in die Front einberufn woan. Kurz davor is es Haus fertig woan und mei Oma hot fortan allanig lem miasn."I woa vo Aufaung au gengan Hitler und des gaunze Nazi Regime, owa wos sui i tuan wenn mi de obhuin und zum Kriagsdienst huin? Wenn i verweigert hättat, daun warads ma wie dem Jägerstätter gaungan und de hättn ma afoch mein Schädl obgschlong oda mi daschossn. Und i wuitat dei Oma ned allanig lossn. I hob ihr domois vasprochn: Egal wos passiert, i wia wieda zruck kumman. Und danoch wean ma glicklich bis zu unsan letztn Atemzug sei, a Famülie hom, glückliche Ötan sei und daun zuaschaun wie ma Großötan wean und unsere Enkeln imma greßa wean. Und wiast siechst hob i mei Versprechen ghoitn, olladings woa des ois aundare ois leicht.Wir san glei moi noch Griechenlaund kumman und do is ärger zuagaungan ois des vielleicht iagandwer mitgriagt hot. In meina erstn Wochn hob i glei moi a Feuertauf griagt, weu ma in an Bombenhagel einekumman san. Zu ana Zeit wo fias Deitsche Reich no ois glatt grennt is und wir aungeblich unbesiegboa woan - bei dem Bombenhagl homma gnua Leid valorn. Kaunst da du vorstöhn wia des is, wennst lauter tote Männer aus da Linie zahst, die zerfetztn Körper siechst und dir kloa wird: Der is tot. Aus, vorbei. Und dir kauns in a boa Sekundn a so geh wennst ned aufpasst."In Griechenlaund is trotzdem bei weitem ned so oag zuagaungan wie aun aundaren Orten. Im Februar 1943 hot mei Opa daun zum Heimaturlaub wieda hamreisn diafn. I was jetza ehrlich ned wie laung, owa i glaub bis Ende März/Aufaung Aprü woa er bei da Oma und da restlichn Famülie.Danoch is a aun die Ostfront kumman. Sei "Glick" woa, dass er ned noch Russlaund, sundan zur skandinavischen Seitn kommandiert woan is."Stöh da des amoi vor Burli, du bist in Griechnlaund und host so um die 30 Grad. Daun kummst do noch Finnlaund auffe und auf amoi hots a wieda 30 Grad - nur mit an Minus davor. 30 Grad Minus, wasd wie koit, dass do wird? Wennst jemois draußn speust und du faungst zum Zittern au weu da koit is, daun merk da ans: Du wasd goaned wos richtige Kälte is. Und glaub mas, des wüsd ned erfoahrn. Des wünsch i a niemandn.Wir hom duatn an Nohkaumpf Unterricht griagt, weu die Russen darin aungeblich unschlogboa woan. Und generell die Taktik homma total vabessern miasn, wir woan do in ana aundan Wöt.I hob ma fest vorgnumman, dass i niemois an Menschen töten werd. Weu wos hot ma der Mensch dau? Warum sui i eam erschiaßn? Nur weu er ana aundaren Nation augheat? In Griechenlaund hob i nie wen umbrocht, nur a boa Leichn beerdigt.Bis i noch Finnlaund kumman bin. Und glaub mas, i bin ned stuiz drauf. Mi verfuigt des bis heite und i wia nie driwa hinwegkumman. Owa du denkst in suichn Situationen gaunz aundas. Auf amoi wird es Feuer eröffnet, unzöhlige Leid schiasn auf di und du kummst imma nur a boa Millimeter dem Tod vorbei. Do hob i daun natialich zruckgschossn, i wuitat ned steam. I hob deina Oma wos vasprochn und i wuit ned in an fremdn Laund vagrom wean.Amoi hob i 20 Russn auf an Schlog umbrocht, weu i beim MG woa. Hätt i ned gschossn, daun hättn meine Kamerodn und mi umbrocht. Jeden anzelnen Schuss bereu i heite no, owa i wuitat a ned steam. Es tuat ma so lad, i wü goaned wissn wie vü Famülien i zerstört hob. Fois du jemois an Kriag miterlebn muast, daun tua ma an Gfoin: Druck di, waunda aus oda vasteck di iagandwo, owa ziag ned in den Kriag. Des is ned wert!"

------------------------------------

Fortsetzung folgt, wenn da Wunsch dazu besteht.