Mit diesem Beitrog, teile i an Auszug aus mein Buach "Gschichtln aus mein Lem" (erhältlich im Buchhandel & auf Amazon) und möchte gleichzeitig a Beispiel aun olle Menschen geben, dass DIE HÄNDE WEG VON DROGEN lossn suin!

I woa söwa moi jung, i hob a einiges prowiat, owa es is unnedig, kostet vadaummt vü Göd, kau Freundschaften zerstören und dir den frühen Tod bescheren. Desweng mecht i eich jetza wos über meinen besten Freund, den Geri, erzöhn.

---------

Live fast, die young – lebe schnell, sterbe jung!

Der Spruch woa domois a inoffizielles Motto vo einigen Leid de in die 70er Joahr glebt hom. Zu denan hom da Geri und i a dazuagheat. Da Spruch woa eigantlich nur a aundare Form wia der heitige YOLO Schas. Ma lebt nur amoi, desweng sui ma sei Lem komplett genießen und jedn Tog so lem ois warads dei letzter. Und des hom da Geri und i seitn Saundkaustn au gmocht.

Wir san sprichwörtlich im Saundkostn miteinaunda groß woan. Daunk eam hob i die Mundoat blitzschnö glernt und daunk  mir is er in da Schui nie huckn bliem. Wir woan wia Briada, des hom ned nur unsare Ötan gsogd, sundan a die Lehrer und aundare Leid de uns iagandwoher kennt hom.

In die 70er Joahr homma unsare Jugend erlebt, wir woan junge Rebelln und hom sie nix song lossn. Frei nochm Motto „Frechheit siegt“! Natialich homma trotzdem imma Respekt vor unsaren Mitmenschen ghobt, owa aufgfiahrt homma si trotzdem wia die Lausbuam ausm Lehrbuach.

In da Hauptschui homma moi es Radl vo unsan Musiklehrer aufm Schuidachl vasteckt. Des host wundasche vo da Stroßn aus gsehng und etliche Leid hom auffegschaut. Da Lehrer söwa hots natialich ned so supa gfundn, auf des Dachl is jo kana freiwüllig kreut außa wir zwa.

Während da Schuimess (domois no verpflichtend – Gehirnwäsche und so) woa moi a Schweigeminute und wos mocht da Geri? Hot afoch amoi vule Kanon an aufgschissn, dass die gaunze Kirchn vibriert hot. Olle hom eam fia de Aktion gfeiert, sogoa die Lehrer hom si obeckt, nur da Pforra is si a wengl vaorscht vorkumman.

Oda wia ma es erste Joahr auf da Baustö ghacklt hom und a aundara Oaweita uns dauand zur Sau gmocht hot weu a schlecht drauf woa. Soboid a in da Mittogspause eigschlofn hot, hom da Geri und i a wengl Zement in an Kübl eineglaht und daun sein rechtn Haxn eineglegt. Der woa wirklich ois aundare ois begeistert wia a aufgwocht is, owa he – leg di niemois mit die schrecklichen Zwillinge au, so san ma nämlich meistens gnaunnt woan.

Wir hom wirklich ois miteinaunda gmocht. Bis auf scheißen, vegln und suiche Sochn hoit, owa des is jo hoffantlich eh kloa.

Noch da Schui homma beide beim gleichn Unternehmen ghacklt und woan gemeinsaum schnö wia Flugzeig. Je mehr ma ghacklt hom, desto mehr is uns zoiht woan. Dementsprechend vü Göd homma kasiert. Und vo dem Göd homma uns daun a sehr aunsähnliches Leben fia unsa domoliges Oita leistn kennan.

Jeden Freitog und Saumstog samma furtgaungan und hom es Nochtlem vo Wien aufn Kopf gstöht. Wir woan ned die Schirchstn und hom vü Göd ghobt – somit woan ma schomoi a Magnet fia die Madln, do homma nix dageng ghobt. Da Geri hot domois so sche gsogd: „Wir san Kleschn Magnetn“ – i hoff, dass jeda was wos damit gmant is.

Beim Fuatgeh is imma zuagaungan, hawedere. Owa mehr Einzelheiten weads im Kapitel mit da Liebe erfoahrn. I varrot amoi so vü – ihr werds eifasüchtig sei, wenns des ned dalebt hobts. Oame Hund.

70er Joahr, scheiß auf ois, Sex, Drugs & Rock’n’Roll – wir lem nur amoi und genießen es bis neama geht. Unsa Motto woa: „Mei Lem, mei Soch, Mei Problem!“

Niemois hättat i ma docht, dass uns genau de Lebenseinstöllung fost die Freindschoft und im Endeffekt eam es Lem kosten wird…

Eich foit vielleicht auf, dass i sehr oft „dir“, „wir“, „du“ etc… und ned afoch „Geri“ schreib. Owa ihr kennts eich wirklich ned vorstöhn wie guat wir miteinaunda auskumman san, und no weniger vorstöhn kennts eich wie sehr er ma föht…

Im Thema mit da Musik hob i bereits erwähnt, dass wir domois mit Drogen in Kontakt kumman san. Des is a weidahin so bliem, olladings woan ma nie obhängig. Wir homs afoch nur gnumman, damit ma unsre Gaude hom. Ma kau jetza song: „Jo sicha woats obhängig, ihr hobts jo es Valaungan danoch ghobt bla bla bla“ – jo, i hob sehr oft es Verlaungan noch a bissl Speed ghobt und dazua steh i a total. Owa waun is ned gnumman hätt, daun warad a nix passiert, körperlich hom wir üwahaupt nix ghobt. Wir hom si afoch moi wos einegschossn damit ma wieda munter, leistungfähiger, besser drauf, oda afoch nur entspaunnt san.

Da Geri und i hom vadaummt vü Sochn ausprowiat, owa ans homma uns imma vorgnumman: KEINE NADEL!

Heroin is pures Gift, do is gscheida wennst vorher Rotzngift zum Fruahstuck frisst – wahrscheinlich ned so giftig. Und wir hom einige Leid vor die Hund geh gsehng, weus da Nodl vafoin san. Desweng homma uns gschworn, dass ma nie so tiaf sinkn wean. Illegale Substanzen sche und guat, owa umbringan wuitn ma uns ned.

Wenn ma fuatgaungan san homma uns oft davor scho a wengl Speed eineghaut, damit ma total munter und vulla Energie san. Hot domois perfekt funktioniert wennst da Weiwa aufreissn wuitast. Und wennst um 2 in da Fruah scho hoiwat eischlofst, daun host hoit a wengl Ecstasy gnumman – scho host bis zur Sperrstund durchtaunzt und wennst a Madl hamzaht host, daun is de aufjednfoi glicklich und zufriedn wieda hamgaungan und woa fia die nächsten Wochn befriedigt. Wenn ma afoch obschoitn wuitn, daun homma entweda an Ofn graucht oda a bissl Mandrax gschluckt. Mandrax wird den meistn vo eich nix mehr song. Des san Tabletten und wirken eigantlich fost gleich wie Cannabis, nur no stärker. Und Nebenwirkungen host aungeblich ah, vo denan hom wir olladings nie wos mitgriagt. Meistens woan ma total entspaunnt und hom wundasche gschlofn. Solaungst es ned üwatreibst und mit nix aundan kombinierst, hot a ned wirklich wos passiern kennan. Olladings woan wir scho a wengl obgehärtet, zu suiche Sochn wie Mandrax und Marihuana hob i erst griffn, nochdem i scho Koks, LSD, Speed und aundare kraunkn Substanzen prowiat hob.

Bei der Gelegnheit mechat i nomoi ausdrücklich erwähnan: HÄNDE WEG VON DROGEN! Greifts den Scheiß ned au! Des is ois aundare ois gsund, ihr runierts eichan Körper, gebts unnedig Göd aus und vascheißts es eich mit eichan Freindeskreis und da Famülie.

Domois host no hoibwechs guadn Stoff griagt fia dei Göd, owa heitzutog san die sogenaunntn „Drogen“ nix aundas ois a chemischer Obfoi. Wie gsogd, maunchmoi warad es Rotzngift gscheida, vü Untaschied warad eigantlich eh ned vorhaundn.

Des gaunze hot 1979 augfaungan, do homma hin und wieder bei Konzerten oder aun an Wochnend moi wos gnumman. Owa regelmäßig Drogen konsumiert homma erst, nochdem mei 2jährige Beziehung mit da vermeintlichen Traumfrau in Oasch gaungan is. Kurz davor hot a ihn Geri sei Freindin eam stehlossn. Am Aufaung homma si mit Alkohol getröstet, sehr vü Alkohol. Owa es hot ned laung dauat, bis ma die euphorisierende Trostmethode vom Speed liawa ghobt hom. Immawieda samma die Worte vom Lemmy durchn Kopf gaungan – „I’m a Speedfreak“ – und iagandwie wuitat i a so sei wie er, i wuitat genauso vü Madln ozahn wie er und desweng hob i mi wui indirekt in des Speed vaschossn waun i untawegs woa.

Des haßt jetza natialich ned, dass ma jedes Wochnend total auf Drogn woan. Wir san a sehr oft afoch so unta die Leid gaungan und hom uns afoch augsoffn. De Soch mitn Alk is jedoch a ned die Gscheidaste, owa des muas i jo glauwi ned erwähnan. Bissl Jägermasta nochtrinkn und ois is geheilt, die beste Medizin da Wöd wirds scho richten. Klana Schenklklopfer nemsbei.

Im Spätherbst 1984 hot si da Geri vaändet ghobt. Er woa imma sötener auf da Oaweit und imma total genervt. Zu der Zeit homma grod in ana WG mit a boa aundare Freind glebt, kana vo uns hot si erklärn kennan wos los is.

I persönlich hob glaubt, dass a Gödprobleme hot und vielleicht spüsüchtig woan is. Es Göd dafia homma jo ghobt. Meine Güte, i warad so froh, waun wirklich des da Grund gwen warad…

Iagandwaun amoi hom da Roman und i die Hittn staubgsaugt, weu ma am Vortog a wengl a Feier ghobt hom und dementsprechend hots ausgschaut. Auf amoi hot da Roman a Spritzn gfundn. Wir hom uns afoch nur augschaut und sofuat gwusst vo wem de is und wos damit gmocht woan is.

Es woa wie wennst a Foitür unta mir aufgmocht host. Heroin, da Geri is auf Heroin, er is da Nodl vafoin. Des wos ma si imma gschworn hom zu vermeidn, is jetza bittare Wirklichkeit woan. Und kana vo uns wuitats woahr hom, ned amoi er söwa.

I wia nie vagessn wie er an dem Tog hamkumman is. Da Roman, da Güsi, da Peda und i san in da Kuchl gstaundn, ois die Tia aufgaungan und da Geri einakumman is.

---------

Fortsetzung folgt wenn da Wunsch dazu besteht.