Aufgrund vieler Wünsche gibts hier die Fortsetzung vo Teil 1. Logischerweise miasts den vorher lesen um eich auszukennen. Fortsetzung folgt wenns wuits.

---------------------------

Iagandwaun amoi hom da Roman und i die Hittn staubgsaugt, weu ma am Vortog a wengl a Feier ghobt hom und dementsprechend hots ausgschaut. Auf amoi hot da Roman a Spritzn gfundn. Wir hom uns afoch nur augschaut und sofuat gwusst vo wem de is und wos damit gmocht woan is.

Es woa wie wennst a Foitür unta mir aufgmocht host. Heroin, da Geri is auf Heroin, er is da Nodl vafoin. Des wos ma si imma gschworn hom zu vermeidn, is jetza bittare Wirklichkeit woan. Und kana vo uns wuitats woahr hom, ned amoi er söwa.

I wia nie vagessn wie er an dem Tog hamkumman is. Da Roman, da Güsi, da Peda und i san in da Kuchl gstaundn, ois die Tia aufgaungan und da Geri einakumman is.

Geri: „Nau wos is los, schauts olle drei ois hättats die Scheißerei. Hot da Güsi kocht oda wos?“

I: „Na“

Geri: „Wos na?“

I: „Ka Scheißerei und er hot ned kocht. Sog Geri, wüsd du uns vielleicht iagandwos song?“

Geri: „Wosn?“

I: „Denk noch“

Geri: „Wos sui der  Scheiß? Wuits mi vaorschn oda wos, leckts mi am Oasch und lossts mi in Ruah!“

I: „Wos wüsdn leicht jetza mochn? Die im Zimma eisperrn und da an Schuss gem?“

Auf amoi is a mittn in da Bewegung stehbliem wie a Statue und hot si gaunz laungsaum zu mir draht mit an Blick der so vü wie „Woher wasd du des?“ ghaßn hot. Daun hot a glei glocht und gfrogt, wie i auf den Bledsinn kumm.

I hob die Spritzn aussaghuit und gsogd.

I: „Ka Auhnung, vielleicht weu des unta deina Baunk gleng is? Sicha, dassd uns no imma nix song wüsd?“

Geri: „De is ned vo mir, de hot wahrscheinlich irgendwer aundara einazaht. Owa i greif sowos ned au, des wasd guad gnua Fraunz.“

I: „Do bin i ma neama so sicher. Zag ma moi deine Händ, tua die Ärmeln auffe.“

Geri: „Wos? Warum? Wieso wüsd meine Händ sehng?“

Roman: „Es is sauhaß draußn und du rennst mit an Pulli harum. Warum? Wüsd die Einstichstöhn vadeckn?“

Auf amoi is da Geri auszuckt und hot ihn Roman augschrian. „HOT IAGANDWER NOCH DEINA MEINUNG GFROGT, HA? SAUTROTTL DU DEPPATA, HOIT DI GOSCHN UND SCHAU DASSD WEIDAKUMMST, OASCHLOCH DEPPATS! NUR SCHEISSE REDN KENNTS ES, MEHR NED!“

Do is da Güsi (unsa Viech) zu eam higaungan, hot a wengl mit eam graft, eam aufn Bodn druckt und eam daun den Ärmel auffezong. Ma hot eindeitig die Einstichstöhn erkennan kennan.

Des Gefühl wos i empfundn hob, kau ma ned beschreim. A Mischung aus Enttäuschung und Fossungslosigkeit. I wuitat ned woahr hom wos si do grod vor meine Augn obgspüt hot und auf obsehbare Weise obspün wird. Da Geri is a nur regungslos am Bodn gleng und hot realisiert, dass sei Tarnung aufgflong is. Er is aufgstaundn, hot prowiat zum Lochn und hot augfaungan zu beschwichtigen (typische Reaktion eines Süchtigen!).

Geri: „He Leidln glaubts ma, des is nix. Es is nix schlimmes, i hobs a boa moi probiert und jo, i hob glaubt i prowias afoch moi. I bin ned obhängig und so weit wirds ned kumman. Ihr wissts, dass i eich ned auliag. Fraunz, du kennst mi, es is wirklich nix.“

I hob eam ausdrucklos augschaut und hob so an heftigen Zorn in mir auflodern gspiat. Fia mi woa kloa, dass i do ausse und moi a Rundn geh muas. Owa davor hob i eam no auntwortn miasn.

I: „I hob di moi kennt Geri. Owa so wias ausschaut is des scho a Randl her. Du host di vaändert und zwoa zum Negativen. Des wasd genauso guat wie i und olle aundan do im Raum. Und wasd wos? Du bist a scheiß Oaschloch und a Trottl sundagleichn. I glaub da ned wos du do grod gsogd host, de Nodl is da vamutlich scho wichtiger ois wir olle do. Wasd wos? Geh scheißn!“

Daun hob i meine Tschick und mei Gödbörsl ghuit, mi in mei Staummpub ghuckt und mein Zurn mit Alkohol bekämpft. Danoch bin i in Proda gaungan – ka Aungst, nur in Vagnügungspark, ned aufn Stern. I wuitat des afoch ned woahr hom.

I hob einige Leid weng dem Heroin varreckn gsehng – des gleiche sui jetza mein bestn Freind, mein Bruada vo da aundan Muada, passiern? Na, sicha ned.

Vo do aun woa ma kloa, dass i dageng wos tuan muas. Und wauns ma die Freindschoft kostet, i wia sei Lem rettn und ned zualossn, dass er vor die Hund geht.

An Tog späda homma si olle in unsara Hittn zaumgsetzt und aufn Geri eigredt. Wir hom eam sofuat zu an Entzug grotn, scheißegal ob er si jetza ois obhängig oda ned eistuft. Hauptsoch er is weg vo dem Gift. Owa es san die typischen Ausredn in dem Foi kumman. „Brauch i ned“, „i bin jo ned süchtig“, „Leidln ihr üwatreibts“, „mir passiert jo eh nix“, „so tiaf bin i no ned gsunkn“ etc…

Erst nochdem i eam droht hob, dass i seinen Ötan Bescheid sog, hot a eigwilligt. Seine Ötan wuitat er nämlich üwahaupt ned entteischn und Aungst mochn wuitat er eana emfois ned.

I woa froh, dass ma des beendet hom bevors richtig schlimm woan is. Owa do homma uns leida geirrt, weu da Geri hot den Entzugsaunlauf nochm 3. Besuch obbrochn. Des homma leida erst a Randl späda erfoahrn, da Geri hot uns nämlich sehr guat wos vorteischt, sodass ma kan Verdocht gschöpft hom. A mit die Heroin Injektionen woa er a wengl kreativ und hot sis do eineghaut wo mas ned siecht wenn mas ned was und genau hischaut. Scheiße grennt, vadaummt scheiße sogoa.

Ende Aprü bzw. Aufaung Mai is daun richtig schlimm woan mit eam. Er hot so richtig scheiße ausgschaut, hot gstunkn, unrasierts Gsicht, woa scho ewig neama auf da Uni (wir hom do grod nemsbei studiert) und auf unsre Baustön homma eam a scho neama gsehng. Er hot si in sein eiganen Schutzpaunza vakrochn und in seina Scheinwelt weidaglebt. Es Heroin hot mittlerweule komplett Besitz vo eam ergriffn. Ma hot üwahaupt ned mit eam redn kennan, do hättast wirklich scho Gewalt aunwendn miasn. Und ned amoi des hot wos ghuifn.

Oiso bin i zu seinen Ötan gaungan, hob eana die Koatn aufn Tisch glegt und üwan Geri sein körperlichn, seelischen Verfall und seina Drogensucht berichtet.

De san natialich komplett aus eanaren Wuikn gfoin und wuitn ma ned glaum. Olladings homs gwusst, dass i eana niemois a Lügnmärchen auftischn darad, scho goaned bei so an Thema. Desweng hom sa si sofuat mit eam in Vabindung gsetzt und eam zur Rede gstöht.

Kennts eich vurstöhn, dass da Geri ois aundare ois begeistert vo mir woa. Owa wia gsogd, i wuitat eam um jedn Preis vo dem Gift wegbringan, a wenn danoch unsre Freindschoft fian Oasch is. Mir woa liawa, dass a weidalebt und auf mi scheißt aunstott elendig zu varreckn.

-----------------------

Fortsetzung folgt bei genügend Interesse.