Ende Aprü bzw. Aufaung Mai is daun richtig schlimm woan mit eam. Er hot so richtig scheiße ausgschaut, hot gstunkn, unrasierts Gsicht, woa scho ewig neama auf da Uni (wir hom do grod nemsbei studiert) und auf unsre Baustön homma eam a scho neama gsehng. Er hot si in sein eiganen Schutzpaunza vakrochn und in seina Scheinwelt weidaglebt. Es Heroin hot mittlerweule komplett Besitz vo eam ergriffn. Ma hot üwahaupt ned mit eam redn kennan, do hättast wirklich scho Gewalt aunwendn miasn. Und ned amoi des hot wos ghuifn.

Oiso bin i zu seinen Ötan gaungan, hob eana die Koatn aufn Tisch glegt und üwan Geri sein körperlichn, seelischen Verfall und seina Drogensucht berichtet.

De san natialich komplett aus eanaren Wuikn gfoin und wuitn ma ned glaum. Olladings homs gwusst, dass i eana niemois a Lügnmärchen auftischn darad, scho goaned bei so an Thema. Desweng hom sa si sofuat mit eam in Vabindung gsetzt und eam zur Rede gstöht.

Kennts eich vurstöhn, dass da Geri ois aundare ois begeistert vo mir woa. Owa wia gsogd, i wuitat eam um jedn Preis vo dem Gift wegbringan, a wenn danoch unsre Freindschoft fian Oasch is. Mir woa liawa, dass a weidalebt und auf mi scheißt aunstott elendig zu varreckn.

Nochdem er bei seine Ötan woa, homma uns zuföllig am Schwednplotz troffn. Do is die Lage daun total eskaliert. Er hot mi gsehng, is total auszuckt, hot harumgschrian und mi niedakeift.

Geri: „Du scheiß Oaschloch du deppates, wos foit dir eigantlich ei dassd zu meine Ötan gehst und eana des sogst? DES GEHT DI AN VADAUMMTN SCHEISSDRECK AU DU DRECKSAU! MISCH DI NED IN MEI LEM EI!“

I: „Waun i mi ned eimischn darad, daun darasd schnölla varreckn oisd schaun kaunst! Glaub mas, du wirst ma no daunkboa sei!“

Geri: „HOIT DI GOSCHN, DU BIST A SCHEISSKIND A DEPPATS. I HOB DOCHT WIR SAN HAWARA, OWA DU BIST NUR A FOISCHE SAU, MEHR NED!“

I: „Pass liawa auf wosd sogst, deine Spritzn lossn die ned amoi mehr gscheid denkn!“

Geri: „Pass liawa auf wos du sogst, sunst hau i da ane eine dass dei Goschn in dei scheiß Mutterlaund fliagt du scheiß Tschusch!“ – do hot a die Grenz üwaschrittn.

I: „Na kumm her wennst di traust, hau ma ane eine. Kumm, do schlog her, i woat!“

Mittlaweule hom scho olle Leid hergschaut und a klane Menschentraube hot si um uns herum gebüdet.

Geri: „Wenn i da ane einehau bist hinig, i bring di um!“

I: „TRAU DI DOCH DU TROTTL DU DEPPATA, SCHEISS JUNKIE, SCHAU MOI DASSD MIT DEIN LEM KLOA KUMMST, DU GRIAGST JO GOANIX MEHR AUFD REIH!“

Geri: „DES NIMMST SOFUAT ZRUCK!“

I: „NA! Schau di doch amoi au, dei komplette Haund is vulla blauer Fleckn vo deine scheiß Heroinspritzn. Steh doch zu deina Drogensucht du Dodl. NA KUMM, ZAG DASSD EIER HOST UND ZAG DEINE ÄRMELN MOI DENAN LEID DE DO OLLE SO GSCHISSN ZUASCHAUN!“

ZACK – nochdem i des gsogd hob, is da Geri auf mi zuaghupft und hot ma an Kinnhockn gem, dass i moi kurz die gaunze Müchstroßn gsehng hob. So schnö hot a goaned schaun kenna, do hob i eam scho an schenan rechtn Hockn zruckgem, dass eam doppelt und dreifoch aufgstöht hot. Er is glei wieda aufd Haxn gwen und hot auf mi eitretn. I hob mitn Haxn ausghuit, geng seine Bana tretn und eam ausgheblt sodass a den Wiener Bodn geküsst hot. 1 Sekundn späda samma beide schowieda gstaundn und er hot ma mit vulla Wucht aufd Nosn troschn, i hob die Knochn richtig brechn gheat. Ohne nochzudenkn hob i eam emfois a kerzngrode ind Goschn ghaut und scho is a Zauhn aus sein Mund gflong.

Daun samma voreinaunda gstaundn. Beide homma bliat wia die Drecksauna, mei Lippn woa aufgsprungan und die Nosn woa brochn und hot dementsprechend ausgschaut. Da Geri hot a aufgschürftes Gsicht ghobt, woa um an Zauhn leichter und es Bluat is aus seina Goschn grunnan. Er woa a bissl außer Atem und is wieda zu Bodn gaungan, do hob i daun meine vernichtenden Worte gsprochn.

„So weit hots oiso kumman miasn. Schau di moi im Spiagl au, foist des üwahaupt no schoffst. Weit host es brocht du Trottl, sogoa schlong mias ma si scho. Owa wasd wos? Scheiß drauf! I scheiß drauf! Und zwoa auf di. Du kaunst mi moi richtig kreizweis, i wuitat dir nur höfn weu du mei besta Freind und wie a Bruada fia mi bist. Owa waun da des scheiß Heroin wichtiga is, daun bleib bei dem Scheiß und schau zua wiasd damit kloa kummst. Wir wissen beide wo des enden wird. Mi kaunst vagessn, bin jo eh nur a deppats Scheißkind, a Tschusch und a foische Sau. Schens Lem no, wobei i des bei dir scho fia unmeglich hoit. Mi wirst neama sehng, i schleich mi aus da Hittn und hau mi zu meine Ötan, vielleicht schau i a in mei scheiß Mutterlaund, jednfois vaschwind i aus dein Lem. Leck mi am Oasch, seawas.“

Daun hob i mi umdraht, hob eam am Bodn lieng lossn, hob die Leid gfrogt warums so deppat schaun, bin in die nächste Stroßnbauhn eigstieng und moi a Runde gfoahrn um an kloaren Schädl zu bekumman.

I hob ausgschaut wie da ärgste Psycho. Dreckiges, zarrissenes, bluatvaschmiertes Gwaund, a Nosn so fett wia da Bud Spencer und a Gsicht wie wenn mi a Auto zaumgfiahrt hätt. So bin i in da Bim gsessn und hob gengan Schmerz und geng die Tränen aukämpft. Letzteren Kaumpf hob i olladings valorn.

Es woa ned da körperliche Schmerz der mi zum Plärrn brocht hot, den hob i goaned gspiat. Es woa da seelische Schmerz. Mei bester Freind der wia a Bruada fia mi woa, hot auf mi gschissn und si mit mir gschlong – so weit is no nie davor kumman, scho goaned zu so bluatign Sochn wie heite. Und die Umstände, dass is ned schoff eam vom Heroin wegzubringan, hom ma den Rest gem. I hob nämlich genau gwusst wo des endet.

I hob mi moi zruckziang, erhuin und saummeln miasn, damit i wieda Kroft fia de gaunze Soch hob. Zwischnzeitlich hob i ghofft, dass seine Ötan mehr Erfuig beim Geri hom.

Und des homs tatsächlich ghobt!

2 Tog späda (i hob seit dem Vorfoi bei meine Ötan im Haus gschlofn, weu i ned mitn Geri unta an Dachl sei wuitat) is da Geri auf amoi in mein Zimma gstaundn, hot plärrt, si tausendmoi entschuidigt, mi umoamt, mir ind Aung gschaut und gsogd: „Fraunz du host recht, i muas wos mochn. Owa i schoff de scheiß Entzugskur ned, de Entzugserscheinungen san afoch zu schlimm und de Ersotzsochn san a Schas de i no weniger vatrog und mi no hiniga mochn.“

I: „Und wie stöhst da des daun vor dassd do wegkummst?“

Geri: „A koita Entzug. Des geht nur mit eichra Hüfe. Sperrts mi im Kölla vo da Hittn ei. I deaf wirklich ka Chance hom do aussezukumman. I hob ka Auhnung wie laung des dauat und ob i des aushoit, owa i ziag des durch. Tuats ma nur an Gfoin: Soboid is aunscheinend üwastaundn hob lossts mi bitte no a boa Tog länga drinnan. Sicher is sicher, i geh do nur total clean aussa. Haund drauf!“

Und so hommas tatsächlich gmocht.

Da Güsi, da Peda, da Roman, da Geri und i hom gemeinsaum den komplettn Kölla vo unsan Haus (Jo es woa a Haus) umbaut.

Jedes Fenster homma doppelt und dreifoch zuagnoglt, sicherheitshoiwa homma sogoa Beton dazuagem. Es is ois ausm Kölla entfernt woan und damit man i wirklich ALLES! Jedes anzelne Regal, da Kühschraunk, die Huizscheitln, olle Kisten etc… sogoa die Laumpn homma komplett entfernt.

Am Schluss woa da Kölla nix weida ois a rechteckiger Raum in dem nix vorhaundn woa außa a glotta Bodn, glotte Wänd und a glotte Deckn. Kane Meglichkeitn si zu valetzn oda im schlimmstn Foi sogoa umzubringan. Und der Raum woa ausbruchssicherer ois Guantanamo.

Die Köllatia woa da anzige Schwochpunkt, desweng homma uns glei moi a neiche kaft. Ned amoi Chuck Norris oda da Petutschnig Hons aus Schlatzing waradn do durchkumman. De Tia woa die anzige Vabindung vom Haus zum Kölla.

In den Raum söwa san daun no a Matrotzn und zwa Kübeln owekumman. A Kübel zum Eineprunzn, da aundare zum Einescheißn. Wir hom uns drauf geeinigt, dass jedn Toga ana vo uns einegeht, die Kübeln huit, reinigt und wieda zruckstöht. Gleiches Szenario beim Essen. Ana bringts eine, die restlichen Leid (in dem Foi woans 3) stengan vor da Tia und vahindan, dass da Geri ausbricht.

I woa imma derjenige der einegaungan is zu eam, des hob i freiwüllig gmocht weu i ma docht hob, dass is eam schuidig bin und eam zag, dass i eam sicher ned hängan loss.

Da koite Entzug hot begonnan. Und ans sog i eich, die Hölle (wenns den Märchenort wirklich gem darad) warad a Kinderspüplotz dageng gwen.....

------------------

Aus Gründen der Textlänge, findet der Teil hier sei Ende. Wenn genügend Interesse besteht, wirds in a boa Tog a Fortsetzung geben.