Jo, ihr lests richtig. I woa amoi dem Tod näher ois dem Leben. I warad im zarten Oita vo 5 Joahr fost gstoam.

Es woa Sommer und i woa grod amoi seit einem Jahr in Österreich – bin jo in Ungarn geboren und kurze Zeit aufgwochsn.

Wie so oft samma mit da Famülie ins südliche Niederösterreich aufs Laund gfoahrn und hom Bekaunnte besucht. I kau mi aun den Tog no gaunz genau erinnern. Es woa haß, brennhaß! Mit Sicherheit um einiges mehr ois 30 Grad.

Wir san bei unseren Bekaunntn gsessn und die Tochter vo eana, die Hilda, woa scho 20 Joahr oid. Ihr woa genauso haß wie mir und sie hot gsogd, dass sa si mit Freundinnen im Naturbad in da Nähe trifft. Netterweise hots gfrogt, ob i mitkumman wü, weu den oidn Leid beim Trotschn zuahuachn is jo wirklich ned so spaunnend.

Meine Ötan homs erlaubt und vo beiden hob i no die Aunweisung bekommen, ned zu weit ins Wossa zu geh. Und wenn i weida eine wü, daun auf kan Foi allanig! Damit is ma merk, hots ma mei Mama nomoi in Ungarisch eitrichtert, obwuih i die Mundoat eh scho besser ois es Ungarische beherrscht hob.

Wir hom uns oiso am Weg ins Naturbod gmocht und do hot die Hilda ihre Freindinnen gfundn. Des woan genau suiche Trotschtanten wie bei die Bekaunntn im Goatn. Meine Güte woa des fad, am Aufaung homs ma no durch meine schenan Hoa gstreichelt und mit mir begeistert gredet, owa danoch homs glauwi üwa Hawara zu trotschn begunnan und i woa uninteressant.

Und mir woa no imma haß!

Oiso bin i zum Wossa gaungan, hob meine Schuach auszong und bin gaaanz langsam noch vorne gaungan. Do hots kane Stiegen, Geländer oder ähnliches gem, sundan afoch nur a Schräge wo ma einegeh hot miasn. Und do woas daun boid tiaf.

I bin bis zu die Knechln im Wossa gstaundn und hob ma docht, dass i sicha no a bissl weida vor geh kau. Do is daun passiert.

Der Untergrund woa total rutschig, desweng hots mi ausghom und i bin am Oarsch glaundet. Aufgrund der Schräglage, bin i weida ins Wossa grutscht. I wuitat aufsteh, bin dabei owa imma weida ins Becken einetriem. So Schas, i sogs eich.

Wos sui i tuan? Es san so vü Leid do, do kau i ned afoch um Hüfe schrein. Außadem schimpft die Hilda daun sicha mit mir. Na, bin a starker Bub und kum do aus eigener Kroft aussa.

De Gedaunkn san mir durchn Schädl gschossn, owa i hobs afoch ned gschofft. Stottdessn bin i imma weida weg vom Ufer getrieben. Eh total laungsaum, owa so kla wia i domois woa, woa des a vadaummt weiter Weg.

I hob kan Untergrund mehr! Meine Haxn finden neama zum Bodn. Vadaummt wos moch i? Schnö mit die Haxn und Händ iagandwie straumpln, da Kopf muas oben bleim.

Mei Kopf sinkt immer weida owe, mit Mühe kau i no mein Mund und mei Nosn üwa Wossn hoitn. Bis de a unter Wossa woan.

I wuitat schrein, HÜFE, gaunz laut. Owa mehr ois „HÜÜÜÜ“ hob i neama aussabrocht, weu i scho unta Wossa woa.

Imma wieda hob is prowiat. „HÜÜÜÜÜÜ! HÜÜÜÜ!!! HÜÜ!!“

I woa vielleicht 10cm unter Wossa, mehr ned. Die Sunn hot wundasche gscheint, i hobs gaunz kloa durchs Wossa gsehng.

Iagandwaun hob i des „HÜÜÜ“ a neama aussabrocht, weu ma da Sauerstoff gföht hot. Plötzlich hots in mein Schädl so richtig schirch zum Piepsen augfaungt und mei Sichtföd is total verzerrt woan. Ois hättat i an Vuirausch biblischen Ausmaßes.

Meine Händ und Haxn hob i neama beweng kennan, mei gaunzer Körper woa wie gelähmt. I kau mi no erinnern, wie i mein Mund neama zuamochn hob kennan und mir des Wossa aunschließend laungsaum owa sicha den Rachen owegrunnan is. Meine Augn woan offn, mei Mund ah und i hob nix mehr mochn kennan. Des Piepen is lauter woan, unheimlich laut, und vor mein Augen hom si Sochn wie bei an LSD Trip obgspüt. Auf amoi hob i neama des Licht vo da Sonne gsehng, sundan an laungan Tunnel. Es woa eher des Rohr vo an Staubsauger, owa gaunz am Ende hob i des Licht vo da Sonne no gsehng. I hob regelrecht migriagt, wia si des vor mir zusammenkomprimiert hot.

I bin in den Tunnel laungsaum owa sicha hineingeglitten und des Licht vo da Sonne is größer und intensiver woan. Mir is auf amoi total woam und des Piepen im Schädl is vü angenehmer gwesn.

Es hot ma gfoin, wirklich, es woa total sche. I woa scho imma vo Musik begeistert, desweng hots ma extrem taugt, wia auf amoi im Hintergrund a Liad vo die Beatles gheat hob. Ironischerweise woas der Song „Help!“ – zu der Zeit mei Lieblingsliad, obwuih mei Englisch no in den Kinderschuhen woa.

I hob domois scho a wengl längere Hoa ghobt. Zu dem Zeitpunkt, wo mei gaunzer Körper wie gelähmt woa, hom sie meine Hoa aufgstöt und de boa Zentimeter üwa die Wossafläche erreicht. Bledaweise kau ma üwa die Hoa ned atmen.

Währenddessen im Staubsaugerrohr: I woa scho weit in dem Tunnel drinnen und es immer schöner woan. Auf da Seitn san Bilder vo meiner Famülie ghängt und a bissl weiter vor hob i meine drei Hunde vom Hof meiner Großeltern in Ungarn gsehng. Jetzt woa i total glicklich, endlich siech i meine Schätze wieder. I bin zu eana hingrennt, so schnö wie i kennan hob.

Und genau in dem Moment hom mi de Beidln ausm Wossa aussazaht, weus mi bemerkt hom. Vastehts mi ned foisch, i bin eana ewig daunkboa, owa wie so vieles in meinem Leben nimm i a dieses Ereignis mit Humor. I woa so glicklich und auf amoi is ois Scheiße woan.

I hob gaunz schirche Schmerzen bei den Rippen ghobt und mitgriagt, dass iagandwer gaunz fest drauf einhaut. Meine Augn san aufgaungan, gaunz vaschwumman hob i an Mau mit an Vollbart gsehng, der auf meine Rippen eidroschn hot. Nebenbei hot a Frau die gaunze Zeit in meinen Mund eineblosn. Hui, de woa fesch, domois hob i ma olladings nur docht: „Pfui, de schmust mit mir“ – Kinder hoit.

Iagandwaun hob i die Worte „Er is wieda do!“ gheat. Gaunz laungsaum hom mi meine Lebensretter aufgsetzt. Und scho is die Speiberei losgaungan. I hob no nie in mein Lem so vü Wossa gsoffn, des hot natialich ois wieda ausse miasn. Bist deppat, des woa schirch…. Owa i hob mi dafaungan! Noch 1 Stund oda so is ma wieder hoibwechs guat gaungan.

Domois woa des no aundast, do is ned glei da Hubschrauber oda die Rettung kumman. I bin wiederbelebt woan, glücklicherweise vo an Arzt der grod im Bod woa, hob a boa Schluck Rotwein fian Kreislauf trinken miasn (Ka Witz!) und gaunze Zeit gratis Eis griagt.

A boa Stund späda bin i mit da Hilda wieda hamgaungan. De woa natialich fertig mit de Nerven, de hots beim Hamgeh no grissn, weus nervlich so im Oarsch woa. Logisch, i woa des Gfrastsackl wos afoch ins Wossa gaungan is, owa sie hätt trotzdem den Aunschiss nochher kassiert und ewig Schuldgefühle ghobt. Desweng bin i froh, dass i an dem Tog wieder unter die Lebenden kumman bin, sunst hätt die Hilda ihr Leben laung Schuldgefühle ghobt. I was wirklich ned wie laung i weg woa, jednfois woa bei mir ois aus und i woa klinisch tot.

Da Orzt hot meinen Ötan gsogd, dass auf mi schauen suitn, weus sei kau, dass mei Hirn neama so oaweitet wies sei suitat, weu da Sauerstoff gföht hot. Zwecks Konzentrationsschwäche etc… weu normalerweise wird ma daun, auf guat deitsch gsogd, „dümmer“ noch so an Vorfall.

Bei mir woa lustigerweise genau des Gegenteil da Foi. I bin vü gscheida, aktiver und lernfähiger gwoan. Des Umdenken vo Ungarisch auf Mundoat und daun auf Hochdeutsch hot ma üwahaupt kane Probleme mehr bereitet. Ka owa auch a Zufoi gwen sei, wer was des scho?

Die Person de mi ausm Wossa zong hot, woa a junge Frau de mit ihrer Tochter im Bod woa. Sie hot meine Hoa auf da Oberfläche und daun mei Gsicht unter da Oberfläche gsehng. Ohne Nochzudenken is aufgsprungan, ins Wossa ghupft, hot gschrian und mi so schnö wie meglich aussazaht. Im Gsicht woa i scho a wengl blau.

Dieser Frau verdanke i mei Leben! Ohne ihr darad i jetza ned do huckn und diese Zeilen schreiben.

Vor a boa Joahr woa i bei an Feuerwehrball in dera besagten Gegend, weu i bis heite oft duathi foahr und vüle Freind duat hob. Und duat hob is daun gsehng: Des Gsicht! Es hot sofuat Klick in mein Schädl gwusst und i hob gwusst, dass des mei Lebensretterin is.

Bei da Bar hob is daun augsprochn, obs vor ungefähr 40 Joahr moi an klanan Buam im Bod des Leben grettet hot. Sie hot sofuat Jo gsogd, i hob vor lauter Daunkboarkeit zum Plärrn augfaungan, ihr gsogd, dass des i woa und sie daun gaunz fest umarmt. Sie hot daun a zum Plärrn augfaungt, weus es goaned dazaht hot.

Daun homma augfaungt gemeinsaum wos zu trinken. Bist deppat, i sogs eich, des woa a Rausch….. :)