In meina Zeit ois Lehrer hob i sehr vüle Gsichter kennenglernt. Schüler, Eltern, Kollegen, Personal etc… und i bin jedem gleich umgaungan. Respektvoll, humorvoll, ernst und wenns drauf aukumman is, daun hob i vadaummt zornig sei kennan. Des is bei folgendem Thema da Foi gwen. Traurig, dass so weit kumman hot miasn.

I bin grod aus ana Klass aussagaungan und hob mi aufm Weg zum Lehrerzimmer gmocht. Am Weg durthi is ma da Vater vo an Schüler ausm Turnunterricht entgegen kumman. Er hot genau auf mi zugesteuert und i hob scho gewusst, dass der aunscheinend wos mit mir zu bereden hot. Nie im Leben hätt i ma vorgstöht, dass i fuigande Sätze glei hören würd.

I: „Grüßi Herr Wagner (Name geändert), wos kaun i für…“ – WUSCH!

Ohne Vorwarnung hot ma der Vater vom Schüler, sei Name woa Michi, an Steßa gem, dass mi ausghom hot. Glei danoch hob i no an Steßa dafaungan, dass i zu Boden gaungan bin.

Hr. Wagner: „DU OARSCH HOST MEIN SOHN FOST UMBROCHT!“

I bin aufgsprungan, sicherheitshoiwa in a Kaumpfhaltung und hob glaubt i tram.

I: „Herr Wagner, um Himmels Wün, beruhign Sa si bitte! Wos song si do? Wos sui i ihrn Buam bitte tau hom? I kenn mi goaned aus wos si wuin!“

Hr. Wagner: „JETZT HOST DIE HOSEN VUI DU BLEDA OARSCH! MEIN BUAM HOST A WOARME UND UNFÄHIGE DRECKSAU GSCHIMPFT, DER ES ZU NIX IM LEM BRINGAN WIRD!“

I: „Bitte wos? Sans ma ned bes, owa i glaub Sie hom a wengl an Vogl! Sowos hob i nie gsogd und sowos würd i nie sogn! Wer behauptet den Schas, des wü i jetza gern wissen!“

Do hob i den Michi erblickt, der hot sie a bissl weiter hinten im Gaung aufghoitn. I hob sein Voda goaned beochtet, bin zum Michi higaungan, hob eam augschaut und gfrogt: „Michi, i was wirklich ned wos passiert is, owa sog ma jetza bitte wie dei Papa auf de damische Behauptung kummt, dass i sowos  schlimmes zu dir gsogd hob!“

Hr. Wagner: „SCHLEICHN SA SIE VO MEIN SOHN UND….“

I: „SIE HOM JETZA SENDEPAUSE, HOMMA SI? SUNST SCHIAB I IHNA A ANE AU! Beruhign Sa si, wir werden des glei in Ruhe klären!“

Am Gaung is scho stü woan, in den Klassentüren host lauter Schädln gsehng, weu die Schüler natialich neigierig woan san. Ned nur die Schüler, i woa a scho gaunz neigierig.

Michi: „Am Freitag in Turnen….da haben Sie das angeblich gesagt.“

I: „Angeblich? Des haßt du host mi ned persönlich gheat, hättat mi a sehr gwundat. Oiso, wer hot dir den Scheiß dazöht?“

Michi: „Da Mathias, der Philipp und der Daniel. Die vaorschen mich immer und haben gsagd, dass i unnötig bin und nix erreichen werd im Leben. I hab des verneint, und dann habens gsagd, dass sogar Sie behaupten, dass ich a woame unfähige Drecksau bin. Das geht scho seit Monatn so und am Freitag wars so schlimm, dass ich am Abend das gmacht hab.“ – do hot er sein Ärmel auffezong und i hob die Wunden bei die Pulsadern gsehng. Der Bua wuitat si umbringan!

I hob glaubt i tram, meine Augn waradn ma fost aus den Höhlen ausseghupft. So eine Scheiße verbreiten Schüler in mein Nauman? Bist du deppat, in mir hot a Vulkan zum Brodeln augfaungan der grod in ana extrem heftigen Explosion ind Höhe gschossn is. Wos warad passiert, wenn der Schüler gstoam warad? Daun hätt ers tau, weu a glaubt hot, dass sogoa i scho gegen eam mobben tua. I hob glaubt i vagiss mi.

Gaunz laungsaum hob i mi zum Michi sein Papa draht und gsogd: „Do homs es jetza, i hob goanix gsogd! Owa ka Aungst, i bin jetza genau so haß wie Sie Herr Wagner. I hui de hoibstorkn Hansln jetzt her. Sie woatn bitte mitn Michi vorm Direktorenzimmer, i bin glei do.“

Bist narrisch i woa grantig. No immer hom einige Schüler aus da Tür aussegschaut.

„HOBTS IHR NIX ZUM LERNAN? Zruck auf eichre Plätze, sofuat!“

I hob in den zweiten Stock auffemiasn um die betroffenen Schüler zu stellen. De hom grod a Englisch Schularbeit gschriem, leider bei ana Kollegin, sunst hätt i de Mobberei vielleicht scho friacha entdeckt.

Tür aufgrissn, olle schrecken hoch und i hob einebrüllt: „MATHIAS, PHILIPP UND DANIEL, AUFSTEH UND MITKUMMAN, SOFUAT!“

Kollegin: „Ähm Verzeihung, aber wir schreiben gerade eine Schularbeit.“

I: „DES IS MA GROD SOWOS VON WURSCHT FRAU KOLLEGIN! Und fia de drei Schüler is des a scho egal. De diafn schomoi eanare Sochn eipockn, weus heit no vo da Schui fliang! Ois weitere erklär i Ihnan im Lehrerzimmer! Und mochn Sa sie kane Sorgn, beim Daniel was i, dass er an Fünfer schreiben wird. Den Schummelzettl vom Mathias siech i vo do wundersche in seinem Bankfach und da Philipp hot sei gaunze linke Haund augschmiert. Dreimal Nicht Genügend, Sie brauchn sich ned bei mir zu bedaunkn. AUFSTEH, MITKUMMAN!“ – de hom si scho hoiwat augschissn und san gaunz zitternd herkumman. So san ma daun Richtung Lehrerzimmer gaungan.

Auf den Stiang, hot mi da Mathias gfrogt, wos leicht los is. I hob mi sehr zaumreissn miasn, desweng hob i eam ned amoi augschaut und ka Auntwort gem. Afoch weidagaungan, des hot die Lage no mehr verschlimmert.

Wias den Michi mit sein Papa gsehng hom, homs hoffantlich checkt worums geht. Auf amoi hom sa si gegenseitig augschaut und hom fost a nosse Hosn griagt.

Da Direktor woa ned do, desweng woan daun nur die drei Hansln, da Michi mit sein Papa und i im Direktorenzimmer. In ana Reih hom sie die drei Kasperln aufstöhn diafn, jeder mit so an Kapperl aufm Schädl.

I: „So Michi, dazöh bitte nomoi wos am Freitag vorgfoin is. Genau so wie du es mir vorher gschildert host“ – gesagt getan. Und scho is losgaungan. Da Mathias hot seine Händ in die Hosentoschn vagrobn und zum Stänkern augfaungan.

Mathias: „Das stimmt goaned, was redest du du blede Krätzn du behinderte….“

I: „HOIT DEIN MUND DU GFRASTSACKL! UND NIMM DIE HÄND AUS DA HOSNTOSCHN WENN I MIT DIR RED! UND JETZA TUATS OLLE DE DEPPATN KAPPERL OWA, HOMMA SI?“ – gesagt getan, olle drei homs aufn Bodn gschaut.

I: „I frog nur amoi: Wer vo eich drei gibt zua, dass ihr eam so a Scheiße in mein Nauman gsogd hobts?“

Do is beim Daniel gaunz laungsaum die Haund auffegaungan. Da Philipp hot scho plärrt ois bei eam a die Haund auffegaungan is. I hob mi vorm Mathias higstöht und gfrogt: „Und du? Host du des a gsogd?“

Mathias: „….Ja. Aber es is ja so, er is a scheiß Schwuchtel und Sie werdn ma do zustimmen, hab i recht? Deswegen hab ichs gesagt. Kann ja nicht wissen, dass er sich wirklich umbringen wollt der Trottel.“

Jetzt woa es Fassl vui. I hob mi zum Michi sein Papa umdraht und eam gfrogt: „Herr Wagner, kennan Sie sich moi bitte umdrahn?“ – er hot si scho auskennt und hots gmocht.

ZACK – do hot da Mathias a Watschn vo mir gfaungt, dass erm moi um 180°C draht hot. In dem Moment hob i olle meine pädagogischen Pflichten vergessen, es is fia mi a empfindliche Grenze üwaschritten woan.

I: „Es reicht! Damit bist zu weit gaungan Burschi! Und ihr zwa ah, denkts ihr eigantlich mit wos ihr do augrichtet hobts? Da Michi hot si fost umbrocht! Und jeder hättat daun glaubt, dass des weng mir woa! Owa do geht’s jetza ned um mi sundan  um a Menschenleben. IS EICH DES VADAUMMT NOMOI BEWUSST? Des is ned cool, des is afoch abartig!“

Mathias (weinend): „Das mit da Watschn werd ich da Polizei melden!“

I: „Ka Problem, de verständige i nämlich jetzt sofuat, weu eicha Verhoitn zur Anzeige gebrocht wird. Es is scho schlimm, wenn a anzelne Person so a Scheiße dazöht. Owa wenn daun no weitere aufspringan und des unterstützen, daun is des afoch nur mehr a Sauerei. Desweng wia i jetza a eichre Ötan auruafn und an blauen Briaf ausstellen!“

Daniel: „Wos? Na bitte ned, i hab scho zwei blaue Briefe. Da Philipp und da Mathias auch. Herr Professor bitte ned, wir fliegn sunst vo da Schui.“

I hob mit die Schuitan und Augenbrauen zuckt und gsogd: „Tjo Daniel, daun würd i moi song, dass ihr gaunz schnö eichre Sochn zaumpockts. Weu des is mir sowos von wurscht obs ihr vo da Schui fliagts. Söwa Schuid, ihr hättats eich ned so auffiahrn miasn, dass zu zwei blauen Briafn und zum jetzigen Verweis saumt Aunzeige kummt. Des Gespräch is beendet, geht’s ma aus den Augen!“

Eine Stunde späda woa die Polizei do und es is tatsächlich zu ana Aunzeige kumman. Da Michi hot 500€ Schmerzensgöd griagt und die drei Burschn hom Sozialstunden leisten miasn (sie woan 16 Joahr oid). Und i bin zu mein Wort gstaundn, sie san olle drei am gleichen Tog vo da Schui gflong! I hob an sehr laungan Geduldsfaden, owa do hob i ka Pardon kennt. De woan bei mir unten durch und somit is ma ned schwa gfoin, den Verweis in die Wege zu leiten.

I bin übrigens a ehrlicher Mensch, desweng hob i dem Polizisten, der die Aunzeige aufgnumman hot, gsogd, dass i dem Mathias a Watschn gem hob.

Die Folgen vo dera Watschn? A Schulterzucker vom Kiwarant und folgende Aussage: „I persönlich hätt do glauwi vü schlimmer reagiert!“

So ähnlich woan a die Reaktionen vo die aundan Lehrer und sogoa vo die Ötan aus da Klass, weus deswegen a Elternkonferenz gem hot. Da Großteu der Schüler und Ötan woan froh, dass da Klassen Tyrann, da Mathias, neama bei eana woa. Weu der hot scho davor extrem vü Scheiße baut und vüle Schüler psychisch valetzt.

I hob die Klass leider nur in Turnen ghobt und zwamoi ois Supplierung in Englisch, sunst hätt i do vielleicht scho friacha wos mochn kennan.