Weu mei letzter Blog zwecks Mobbing in der Schule so guat aukumman is, moch i bei dem Thema weiter. Zur Erinnerung und fia de die es ned wissen: I woa a Randl ois Lehrer in ana höheren Fachschule aktiv und wias heitzutog in da Schui so is, gibt’s hier und do a boa Mobbingopfer. Üwa mei Erfahrung und mein Umgang mit dem Thema geht’s in diesen Blogs.

I woa Klassenvorstaund vo ana zweiten Klass und bin grod im Lehrerzimmer ghuckt, hob mein Kaffee trunken und mit an Kollegen a boa Schmähs gfiahrt. Auf amoi is die Tia aufgrissn woan, a Kollegin kummt in den Raum, haut ihre Sochn aufn Tisch, schaut mi au und sogt. „Fraunz, i kumm grod vo deina Klass und hoit des ned aus. De woan grod gaunze Zeit nur am Herumstreiten, i hob ned amoi mein Unterricht mochn kennan.“

I: „Wos? Warum streitns leicht? Host eana an deppatn Test higlegt?“

Sie: „Na üwahaupt ned, de gengan olle auf die Sonja los, des is neama normal. Des Madl is aus da Klass aussegrennt und hot plärrt wie am Spieß. De san so schiach zu ihr, des is nimma normal. Is da des no nie aufgfoin?“

In dem Moment hob i dreigschaut wie wenn ma wer an Kübel Eiswossa üwan Schädl glaht hätt. Mir is des nämli wirkli ned aufgfoin. Des muas erst seit kurzem so gaungan sei, i hob nämlich in mein Unterricht nix gmerkt.

I: „I geh glei auffe und klär des, de hom eh glei Freistund.“ (Die Stund warad erst in 5 Minuten aus gwen)

In suichn Momenten gengan dir ois Lehrer vüle Gedaunkn durchn Kopf. Seit waun is die Lage so? Warum is es so? Warum gengan so vüle auf eine Person los? Is sie söbst Schuid oda die aundaren? Wie find i die Beschuidigte Person aussa? Und wie sui i reagieren?

Im Endeffekt pass i mi daun imma auf die Situation au. Wenn die Schüler ruhig und sachlich san, daun bin i des ah. Wenns deppat wean, daun werd i a deppat und zag eana, dass i am längeren Ost huck. Leider hob i in dem Foi letzteres mochn miasn.

I bin grod ums Eck bogen, ois i scho die Sonja vor da Klass steh gsehng hob – total verplärrt und zittrig, weus so aufgewühlt woa.

I: „Sonja wos is passiert? Die Kollegin hot ma gsogd, dass grod olle auf di losgaunga san.“

Sonja: „D-d-die Nadine, s-s-sie macht mi so fertig.“

I: „Warum mocht sie des?“

Daraufhin hots mit die Schuitan zuckt und an heftigen Weinkraumpf griagt.

I: „Kumm, wir gengan in die Klass und klären des.“

I moch die Tür auf und scho hea i a Madlstimm: „SCHLEICH DI ENDLICH DU BLEDE FUNSN!“

I kumm mit an todernsten und extrem bösen Blick in die Klass eine und vor mir steht a extremst geschockte Nadine de auf amoi kurz vor an Herzinfarkt woa.

I: „Olle hinsetzen, sofuat!“

Ana vo die Burschn frogt: „Owa Herr Professor, wir hom glei Freistunde und…“

I: „I HOB GSOGD ES SUITS EICH HISETZEN!“

Ois woa stü und innerhoib vo 2 Sekunden woa jeder auf sein Plotz. Die Sonja is in da Tür stehbliem, i hob mi vor da Tafel groß gmocht und augfaungan. „I mechat jetzt wissen, wos do vorgfoin is und warum einige Leid wos gegn die Sonja hom. Ich höre?“

Kana sogt wos. Logisch, de hom fost olle die Hosen vui ghobt. Da leiwaunde Klassenvorstaund wirkt auf amoi so, ois kennt er olle umbringan.

„Nau, traut si kana wos song? Daun frog i di jetzt Sonja, wer is so gemein zu dir?“

Sonja: „Die Nadine.“

Nadine: „DU BLEDE SCHLAUMPN HEA AUF ZUM LIANG DU PICKELGFRIES!“

I: „Danke für die Bestätigung Nadine, somit warad moi geklärt wer die Antriebsfeder vo dem gaunzn is. Du deafst di jetzt getrost zrucklahnan, den Mund hoitn und schomoi nochdenken wie du deinen Ötan die Sachlage erklärst, weu de werden mit Sicherheit vo mir vorglodn. Übers weitere Strafmaß deafst moi a wengl nochdenken. Oiso Fräulein, Sendepause!

Sonja, wos hot die Nadine genau gmocht?“

Die Sonja hot ma nur ihr Handy (do hots no laung ka Smartphone gem) gem und a SMS zagt. Mir hots die Augenbrauen aufgstöht.

I: „Ok liebe Klasse, ich zitiere: Gesendet von Nadine NACHNAME am DATUM um 19:50 Uhr: Ferpis dich von unsera Schule. Keina mag dich du hessliches Kind. Du bist scheise und niemand kann dich leiden, jeda schimpft üba dich. Deine Eltan haben kein Geld und leben auf da Müllhalde. Wir hasen dich, schleich dich und kripier du hure oder wir stechn dich ab.“

I bin aufgstaundn und hob die Nadine mit an zornigen Blick gemustert, de hots scho grissen weus gwusst hot, dass im Oarsch is. „Liebe Nadine, do host di jo uandlich sche ausm Fenster glahnt. Dir is kloa, dass ma des zur Anzeige bringan und somit dei Leben versauen kann? Des liegt olladings ned in meina Haund, sundan in der vo da Sonja. I an ihrer Stelle würds mochn, owa i nötige niemanden dazu. Dadurch, dass es hier um die Schui geht, werd i ned afoch zuaschaun und deswegen dementsprechend handeln. De SMS wird dem Direktor zagt und daun kaunst da vo eam a no a schene Standpauke huin, die Rechtschreibföhla wird a glauwi a ned unkommentiert lossn. Außerdem werd i an blauen Brief ausstön lossn. Du host bereits an griagt, weusd am Heisl graucht host. Somit host den zweiten Briaf und brauchst nur mehr einen um vo da Schui verwiesen zu werden. Überleg schomoi wie du des deinen Eltern beibringst. Das Ausschließverfahren is somit eröffnet und i bin sicha da Letzte, der sich in dem Foi fia dich eisetzt! Do hob i ka Mitleid! Und jetzt geh ausse, du woatest vor da Tia auf mi!“

Die Nadine is aufgstaundn und plärrend aussegrennt. Söwa Schuid. Guad, somit hob i die Rudelsführerin dawischt, owa es woan jo mehrarei.

I: „Meine Lieben, i mochs eich jetzt leicht. I frog eich jetza nomoi, wer olla bei dera Hetzerei gegen die Sonja dabei woa. Wer si mödet, griagt den Auschiss den er verdient hot. Wer si ned mödet, wird trotzdem erwischt, i brauch dafia hechstns 5 Minuten. Und des haßt, ihr hobts mi in dem Foi auglong. Des haßt i wia jedem, der si ned mödet und danoch überführt wird, sofuat an blauen Briaf ausstön. Oiso – Freiwillige vor, wer dabei woa, der hebt die Haund!“

Noch und noch san die Händ laungsaum ind Höhe gaungan. Es woan sieben Madln und drei Burschn, mit da Nadine oiso elf Leute geng ein anziges Madl – sehr fair, wirklich!

„Danke, dass ihr eich gmödet hobts. Mittlerweile hot eichre Freistund begunnan und i nimm au, es wuin a boa vo eich ane Rauchen und zum Billa geh, hob i recht?“ – Zustimmung vo den meisten Schülern – „guad, daun woatets mitn Rauchen bis hamgeh diafts und dejenigen de wos vom Spar wuin, suin si bei die unschuidigen Mitschüler mödn, dass eich wos mitnehman. Ihr bleibts nämlich do und wir nutzen de Freistund um des ois auszusprechen. Wir nennan des afoch „Sozialstunde“ und dafia hobts am Freitog nur 5 stott 6 Stunden. Ihr kennts natialich a aufsteh und afoch in die Freistund geh, is eicha guades Recht, olladings wia i daun eichre Ötan auruafn und üwaleng ob i ned no mehr blaue Briaf schreiben suitat. Martin, sei so guat, geh zum Direktor owe und schick die Nadine auffa wenns fertig is, danke!“

Im Endeffekt san olle zehn Schüler in da Klass bliem und iagandwaun is daun a schwer verheulte Nadine no dazuakumman. Wir hom an Sesselkreis gmocht, die Sonja is neben mir gsessn und i hob noch und noch olle Gründe fia de Streiterei offenbart und in Ruhe ois mit eana ausdiskutiert.

Da Auslöser woa, dass die Nadine wos vom Manuel wuitat. Da Manuel hot olladings wos mit da Sonja am Rennan ghobt und des da Nadine auf a ned so Gentlemanmäßige Art und Weise beigebrocht – er hot die Sonja afoch vor ihren Augen niedergschmust. Aufgrund der rasenden Eifersucht de die Jugendlichen zu dieser Zeit hoit hom, is die Nadine auszuckt und wuitat da Sonja so guat wie meglich es Leben schwer mochn – wos a gschofft hot. Die Nadine hot a boa Madln auf ihra Seitn ghobt und die Sonja natialich ah. Ois die Nadine sie gschimpft und die Sonja sich gewehrt hot, san da Nadine ihre Madln aufn Zug aufgsprungan und hom die Sonja aufs Tiafste beschimpft, augspuckt und ghaut. Des is zwei Tage laung so gaungan und i hobs leider ned mitgriagt, weu i in de zwa Tog nur drei Unterrichtsstunden in meina Klass ghobt hob – zwa davo woan Turnen mit die Burschen.

Die Spitze des Eisbergs woa, ois die Sonja aufs Klo geflüchtet is, damits ihre Mama auruafn kau. Bevors die Nummer gwählt hot, hot die Nadine die Sonja mitn Klobesen ogschossn. Danoch hots an Nervenzusammenbruch ghobt, is zu spät in die Unterrichtseinheit der Kollegin kumman und auf die Frage wos passiert is, san die Madln wieder olle auf sie losgaungan. Die Kollegin hot fost 50 Minuten laung versucht, die Lage zu beruhigen, owa es is afoch ned gaungan. Schlussendlich hots mir mei Kollegin gsogd und i hob es Ruder üwanumman.

Nochdem ma die Freistunde und die darauffolgende Stunde zum ausdiskutieren verwendet hom, hom sie olle Täter bei da Sonja entschuidigt, sogoa die Nadine. Danoch hom si olle wieder hoibwechs guat vastaundn, die Wut vo da Nadine hot natialich a wengl länger gelodert, owa sie hot si nix mehr mochn traut, weu is sunst vo da Schui gschmissn hätt. Ihre Ötan hob i vorgeladen und a geschriebenes Protokoll der Vorfälle überreicht. De hots hoiwat aus den Wuikn gschmissn und woan sehr enttäuscht vo eanara Tochter, die Nadine söwa hot natialich extremst Aungst vor da Reaktion ihra Ötan ghobt. Owa gaunz ehrlich, des woa mir wurscht, sie is söwa Schuid gwen!

Schlussendlich homma si olle wieder zaumgerafft und die Klassengemeinschaft hot danoch wieder so funktioniert wies gheat. Und die Nadine hot si danoch so zaumgrissn, dass ned vo da Schui gflong und sogoa a braves Schuimädl woan is.

Ois Lehrer deafst du NIEMALS zuschauen wenn moi da Huat brennt. Du muast imma eigreifen bevors zu spät is, ma kau IMMER a Lösung finden. Maunchmoi muas ma hoit härter durchgreifn, so wie bei mir in dem Foi. Wenn des mehrare Lehrer mochn würden, daun würds weniger Mobbingopfer gem!

Gleiches Recht für alle!