Letztens hob i Berichte aus meina Zeit ois Lehrer zum Thema Mobbing in der Schule gepostet. Daraufhin hob i auf Facebook unzöhlige berührende Nochrichten vo Schülern erhoitn, de moi sogenannte „Mobbingopfer“ woan und teuweise bis heite darunter leiden. Ma muas si moi vorstön, wos fia schlimme psychische Schäden des bei jemanden aunrichten kau, der grod in die Pubertät kummt und vo sein 12. – 16. Lebensjoahr jeden Tog bis aufs Tiafste niedagmocht wird.

Ana hot ma gschriebn: „Mir wärs lieber gewesen, wenn die mich stattdessen verprügelt hätten. Schläge tun bei weitem nicht so sehr weh wie Worte.“

Und do hots ma ehrlich gsogd ois zaumdraht. Weu der Bua recht ghobt hot. Warum muss es soweit kumman? Warum wird dagegen nix unternumman? I hob imma gschaut, dass i mit olla Kroft gegen dieses Mobbing vorgeh und hobs a imma gschofft – owa san olle Lehrer so? Leider nein!

Deswegen mei Frage um de sich mei heitiger Blog draht: Wos können Lehrer gegen Mobbing unternehmen?

Einiges, wenns mi frogts! Es is jo ned so, dassd ois Lehrer a stiller Zuschauer bist, den des ois nix augeht. Sicher, einige Lehrkräfte gibts de afoch song, dass des ned eana Problem is und sie nix damit zu tuan hom. Oder, dass olle jo oid genug san um eanare persönlichen Probleme selbst und untereinander zu lösen.

Aun de Lehrer de si do jetza augsprochn fühln: Wo san eichare pädagogischen Kompetenzen? Meiner Meinung noch hobts ihr de iagandwo aubaut, vorausgesetzt ihr hobts iagandwaun iagandwos punkto Pädagogik glernt! Weu so kummt ma des ned vor. Wenn i sowos hea, daun schließ i draus, dass es sich um an unfähigen, inkompetenten und no dazua ängstlichen Trottel haundelt, der nur wegen zwei Gründen Lehrer woan is: Juli und August!

Es würd scho so vü höfn, wenn die Lehrer mit den Schülern des Thema ausprechen und daun entsprechend agieren. Ois Lehrer huckst afoch am längeren Arm und in suichen Fällen warads Zeit, dass ma des ausnutzt! I hob so vü unnötige Scheiße mit mein Eingreifen verhindern kennan und i glaub, dass ma de Schüler des bis heite daunkboa san. Bei mir hots sowos ned gem, wenn daun nur kurz und do hots daun Granada gspüt!

A weitere Vorgehensweise warad, dass die Lehrer untereinaunda im Lehrerzimmer üwa suiche Vorfälle sprechen. Tuans jo ned, do wü kana offen dazua steh, dass in seina Klass Probleme gibt. Warum auch immer, eppa scheißn sa si olle vor Konsequenzen au. Oiso loss ma liawa die betroffenen Schüler leiden, hauptsoch i söbst griag kan  Auschiss vom Direktor wenn i frog wos i tuan sui.

Do gengan ma die Kabeln auf!

Mi hot söwa moi a Kollege gfrogt, warum i ma des üwahaupt autua und wichtige Unterrichtsstunden opfere um mit meinen Schülern afoch zu reden und amoi sogoa a Freistund vo meinen Schülern und mir ausfoin zu lossn, um a spontan einberufene Sozialstunde (i hob im letzten Mobbing-Blog darüber berichtet) zu hoitn.

Mei Auntwort woa: „Weu ma meine Schüler ned egal san, wos ma vo dir aunscheinend ned behauptn kau, sunst würdest es gleiche mochn!“

Kollege: „Des stimmt ned, sie san ma ned scheißegal, owa i wü hoit ned mei Freizeit fia suiche Klanigkeiten opfern!“

I: „Klanigkeiten nennst du des? Vasetz di moi in die Lage vo an betroffenen Schüler der jeden Tog bis aufs Bluat beleidigt und vielleicht sogoa gschlong wird. Wie fühlt si des au, leiwaund? Wasd wos des fia psychische Probleme herbeiruafn kau? Und wie darasd du reagieren, wenns deina Tochter so geht und si Hüfe bei dir suacht? Jauckst sie weg und sogst ihr ah, dass di mit suichn Klanigkeiten allanig lossn suit?“

Daun hot a nix mehr gsogd und is gaunz kla woan, da Herr Kollege!

Meina Meinung noch gibt’s afoch vü zu wenig konsequente Lehrer. Die meisten schauen afoch weg, weu sa si ned mit den Problemen auseinandersetzen kennan. Wahrscheinlich weus ned wissen wies reagiern suin. Owa Hauptsoch sich söbst ois „Lehrer“ bezeichnan – „Voglscheichn“ triffts do no eher! A Frechheit is des!

Da Fisch faungt obn au zu stinken! Und „oben“ is in dem Foi da Lehrer! Wenn der Scheiße baut und ned schaut, dass es Klima in da Klass in Ordnung is, daun kummts zu suichn deppatn Aktionen wie Mobbing.

Es is oiso im Endeffekt die Schuid des Lehrers! Weu iagandwaun griagt a mit, dass do wos ned stimmt. Und wenn a daun no imma nix unternimmt und die Lage unter Kontrolle bringt, daun gheat de Person ned in an Lehrerposten, sundan zum AMS!

Wie stehts ihr zu dem Thema? Hobts a aundare Meinung? Teilts es mit uns, bin scho gspaunnt.