In den Nochrichten hot ma heite lesen kennan, dass a 16jähriger Bursch sei ehemalige Schule und damit a die Republik auf € 21.000,- Schmerzensgeld klagt.

Grund: Mobbing

Zurecht meiner Meinung noch. Mei Unterstützung hot der Bua. Wenn die Lehrkräfte tatsächlich so unfähig san, dass über an längeren Zeitraum a Schüler derart gemobbt wird (mit Müll beworfen, körperliche Gewalt, Psychoterror…) und si bei eam daun a großer seelischer Schmerz aunsaummeln kau, daun muas ma a Zeichen setzen. Und leider endet des hoit, wie in dem Foi, bei einer Klage.

Natialich mödn si jetza die Lehrer und song, dass eh eigriffn und ois vasucht hom, wos in eanara Macht gstaundn is. Tjo, darad i a song wenn i in den Nochrichten ois inkompetent hingstöt wia.

Einige vo eich werden vielleicht scho wissen, dass a Zeit laung ois Lehrer tätig woa. Und natialich hots des in meiner Klass a gem, olladings ned laung. I wü des kurz beschreiben:

I bin es erste moi Klassenverstaund in ana Fachschule. Die meisten Schüler woan 14 und 15 Joahr oid, a boa 16jährige hob i a dabeighobt de später eigstieng san. Noch ana Wochn hob i scho gmerkt, dass do iagandwos schief rennt. A Bua sitzt gaunz allanig in da zweiten Reih und unta da Stund, wenn i wos aufgschriem hob und mitn Ruckn zur Klass gstaundn bin, hot ma a boa Burschn imma lochn gheat. Und iagandwie san do imma mehr Papierkugal umman Plotz vo dem besagten Schüler glegn. I hob no nix gsogd, erst am nächsten Tog. I kumm vom Kopierraum zruck und auf amoi huckt da Stefan (Name geändert) am Plotz und plärrt, während die Burschn eam auslochn und die Madln so guat wie meglich wegschaun.

I: „Stefan, wos is gschehng?“

Bursch aus da letztn Reih (nenn ma eam Jürgen): „Goanix, der büdet si nur wos ei!“

I: „HOB I MIT DIR GREDT? DU REDST MI NED VO DA SEITN AU, HOMMA SI?“ (i hob scho gwusst, dass er iagandwos gmocht hot – Instinkt) „oiso Stefan, wos is los?“

Stefan (total verplärrt und mit versagender Stimme): „D-d-da Jürgen nimmt mir dauernd Sachen weg, schimpft mich und haut mich nach der Schule“

Jürgen: „DES STIMMT GOANED DU BEHINDERTA WOAMA, WOS REDST DU FIA AN SCHEISS?“

I (eiskoita Ton): „Jürgen, herkumman!“

Jürgen: „Warum?“I: „HERKUMMAN HOB I GSOGD!“

Mit eizoganen Kopf is a herkumman und hot si nehm mi zur Tofel gstöt.

I: „Sui i da ane einehaun?“

Jürgen (nervös, hot gezittert): „Des dürfens ned!“

I: „Und weida? Ma deaf a ned seine Mitschüler schlong und du mochst es trotzdem. Gib ma dei Skateboard!“

Jürgen: „Wieso wuin Sie mei Skateboard?“

I: „Du nimmst Sochn vo Mitschüler weg, oiso nimm i jetza a wos vo dir weg und schenks irgendan Kind!“

Jürgen: „Na, bitte ned. So war das ja ned gemeint, i hab eam alles zruckgeben.“

I: „Is ma wurscht, den Bledsinn losst bleim, sunst host die nächsten 3 Joahr ka Freid mit mir, homma si? Und i vasprichs da, i mochs da ois aundare ois leicht obwuih i mi no imma im erlaubten Bereich bewege! Geh zum Stefan und entschuidig di! Jetzt, vor olle Leid und i wü a ernsthofte Entschuidigung!“

Gesagt getan

I: „So Jürgen. Jetza mochst zur Strof 20 Liegestütz. Geht scho, owe und auf geht’s.“

Ohne Protest is a owegaungan und hot augfaungan. Und i hob a glei mit da Oarschlochort augfaungt.I: „Geh gscheid owe, des san Damenliegestütz de du mochst! Na, ned so, du suist Liegestütz mochn und ned den Bodn begatten! Jo des schaut scho guat aus, des woa die erste richtige Liegestütz (do hot a scho fost 10 gmocht). I zöh jetza jede richtige Liegestütz und erst bei 20 richtigen heast auf!“

Schlussendlich is a bei da 11. Zaumgaungan mit an hochroten Kopf und hot mi augschrian, dass a zum Direktor geht und eam sogt, dass i eam vor da gaunzn Klass ois Trottel dosteh loss und eam blamier.

I: „Guat Jürgen, foit da wos auf? Kaunst da jetza denken wie si da Stefan fühlt? Owa guat, dassd den Direktor augsprochn host. Du gehst jetzt nämlich owe zu eam und sogst, dass i di vor da gaunzn Klass bloßgstöht hob, weu du des gleiche mitn Stefan gmocht host. Und bitte sog eam glei, dassd den Stefan vor da gaunzn Klass „Behinderter Woama“ gschimpft host, mi darad interessiern wos da Direktor sogt (der woa nämlich schwul, owa des hom die Schüler ned gwusst). I kau gern mit eineschauen, weu i geh jetza sowieso ins Lehrerzimmer und ruaf deine Ötan au und erzöh eana vo deinen super Taten und dein erstaunlichen Wortschatz.“

Des woa es anzige Moi, dass i in meina Klass wegen Mobbing durchgriffen hob. Und obs ihr des glaubts oda ned, owa es hot kan  Mobbingvorfoi mehr in meina Klass gem, de Lektion fian Jürgen hot die gaunze Klass obgschreckt. Und es Beste: Da Jürgen und da Stefan san sogoa guade Freind woan. Des woa a lustiges Thema beim Schuiobschluss in da 3. Klass.

Wie san eichare Erfoahrungen mit Mobbing? Findets ihr, dass die Lehrer ned durchgriffn hom? Weu meiner Meinung noch kau ma den Scheiß beenden, wenn ma ois Lehrer afoch moi zagt wo da Bartl den Most herhuit. Daun is a Ruah, zumindest woas bei meina Klass und olle aundan de i suppliert hob wo Probleme auftreten san so.

Werde auch Du Teil unserer Community und nimm Kontakt zu Journalisten und anderen Usern auf. Registrier dich kostenlosund begeistere unsere Community mit deinen Kommentaren oder eigenen Texten/Blogbeiträgen.