Seit meiner Jugend bin i a Fan vo Audi und hob seitdem nur Autos dieser Marke ghobt. Bis heite ziagt sich diese Liebe hin und es wird wui no einige Jahrzehnte so weitergehen. Zurzeit hob i an oidn 80er Audi (mei sogenannte „Winterbitch“). Mei Sommerauto woa bis vor a boa Monaten a schena Audi A4 Kombi.
Wie wir Männer hoit so san, wird’s irgendwaun Zeit fia a neiches Auto. Da 80er Audi kummt ned weg, der bleibt bei mir! Owa a neiches Sommerauto muas her. Gesagt getan.
Seit einigen Monaten bin i nun stolzer Besitzer eines neichn 2014er Audi A5. Um es genau zu song is a Audi A5 SB 3,0 TDI quattro Sport DPF S-Tronic – i hoff i hob nix vagessn. 245 PS unterm Oarsch und des gaunze mit Automatikschaltung – mei erstes Auto ohne manueller Schaltung. Am Aufaung ungewohnt, mittlerweule owa a richtiger Luxus.
Genug mit der Angeberei, kumman ma zum eigentlichen Thema. Warum woas a Unglück?
I hob ma des gute Stück frisch vom Händler gekauft, es woan kane 50 Kilometer drauf und natialich wuitns glei a boa Freind vo mir sehng – Männer unter sich hoit. Neiche fetzige Autos san interessanter ois nockate Weiwa.
A Freind vo mir is Kiwara. Mit dem hob i daun beschlossen, dass ma des Baby auf da Autobauhn testen. Und zwoa richtig, vo Wien bis Wiener Neistodt und wieder retour. Des gaunze natialich mit Vuigas, desweng homma gwoat bis mittn aufd Nocht. Und jo, i woa nüchtern, da Hari woa scho a wengl lustig drauf. Egal, weiter im Text.
Wir zischen oiso in Wien auf die Autobauhn auffe, so guat wie überhaupt ka Verkehr. Traumhoft! Noch da SCS bin i daun einegstieng. 130 km/h, 160 km/h, 180 km/h, 200 km/h, 220 km/h – die Gschwindigkeit is auffegschossn und wir hom an bratn Grinser ghobt.
Bis blitzt hot!
Kennt wer des Radar bei Baden in Fahrtrichtung Wiener Neistodt auf da A2? I eigantlich ah, nur do hob i komplett drauf vagessn.
„Vadaummte Scheiße Hari, wos tua i jetzt? Des woan weit mehr ois 200 Km/h, de nehman ma ned nur mein Fürherschein weg, sundan a mein Schädl und verschiffen eam noch Madagaskar.“
Hari: „Scheiß di ned au, des moch ma scho. I hüf da a bissl.“
Na der hot guat reden der Mau…..
Noch einigen bangen Wochen Wartezeit is daun a Briaf kumman. I wuitat eam jo goaned aufmochn. Mi hots eigantlich gwundert, dass ma de no gschriem hom. Bei der Gschwindigkeit hättn de eigantlich am nächsten Tog vor meina Tia steh miasn und des Karterl kassiern. Owa wurscht, samma moi a wengl froh.
Und do is wirklich drinnan gstaundn. Aufgrund „erheblicher Geschwindigkeitsüberschreitung“ wird ma mei Schein auf unbestimmte Zeit obgnumman. I suitat mi sofuat bei da BH mödn. Komisch, warum schreim ma de wirklich an Briaf? Kau ma ned vorstön, dass des normal bei eana is.
Gach zum Handy griffn und ihn Hari augruafn.
„Seawas, die Strof is kumman. Da Schein is weg schreims ma.“
Hari: „De san lustig. Moch an Einspruch. Wenns wieder schreim – wieder Einspruch! Gaunze Zeit! Wirst sehng, des kaunst sehr owedruckn. I ruaf duatn moi au und tua eigreifn.“
Gesagt getan – Einspruch is gmocht woan. Da Hari hot sein Kiwaraposten gnutzt, duatn augruafn und gsogd, dass er mit woar und i nur so schnö drau woa, weu er die Scheißerei griagt und so schnö wie meglich auf a Klo miasn hot. Und wer scheißt scho gern in a Auto? No dazua in a fremdes und a hoaneiches? Eben, niemand!
Insgesaumt hob i drei Einsprüche gmocht, bis die endgültige Strof kumman is. 320 Euro Strof hob i letztendlich zoihn miasn. Fia 228 km/h und damit fost 100 km/h zu vü is des eigantlich sehr akzeptabel und extrem billig.
So schnö kau die Freude am neichn Auto zu an Fiasko wean. Natialich hob i moi wieder es Glick auf meina Seitn ghobt, aundare Leid ziang do sicher dreimoi die Oarschkoartn ohne Rückgaberecht.
Owa es hüft ois nix, meine Damen und Herren, in dieser Welt muast afoch mit Freinderlwirtschoft hackln. Daun lebt sa si nämlich vü leichter. Glaubts an oidn Mau.
Ajo, foahrts bitte ned zu schnö. Des is ned wert, des Göd kennts vü besser auleng. Zum Beispü beim Fuatgeh oda so. Don’t drink and drive.
