Ich lebe! Jo, i bin wieda do. Meine Sochn san fost olle gwoschn, i bin 10moi geduscht und hoibwechs ausgschlofn. Und wieder hob i a legendäres Nova Rock hinter mi gebracht. Herrlich. In dem Blog wü i eich des gaunze Festival vo meina Sicht aus dazöhn.

Es woa recht lässig, wir san in olla Herrgottsfrüh aufgstaundn, hom des Auto eigräumt und san losgfoahrn. Ka Stau, ka Kolonne, goanix. Am Parkplotz woa sau vü frei und i hob nur 50 Meter zum „Willkommen“ Transparent ghobt. Wir woan sicha unta die ersten 2.000 Leid, recht gschmeidig.

Um 09:30 Uhr homs es Gelände geöffnet, obwohls erst für 12 Uhr angekündigt woa. Sau geil! Dadurch, dass i afoch links aun den Leid vorbeigaungan bin, woa i unter den ersten 50 Besuchern am Festivalgelände.

Und jährlich grüßt das Murmeltier: Einige Hundert Meter die Sochn zum Bandlzelt zahn, ois oblegen, ana passt auf, die aundan gengan durch und huin sie eana Bandl. Gelb-Rot woas dieses Jahr. Gfoit ma, muas i ehrlich zuagem.

Fertig, jetza haßts a guads Platzal finden. Es woa no fost ois frei, des woa sau geil.

Jägermasta Zöt homma scho gsehng und i bin scho duatn hizong. Mit ana Rodel is des ois recht leiwaund, do bist sehr schnöd rau. Des Geländekonzept woa a total neich, jetza host neama so weite Wege zwischen den Bühnen und dem Gelände. Es woa wirklich super. Danke Ewald, des woa wirklich genial umgesetzt.

Wir san daun genau zwischen Jägermasta Zöt und Bühnenbereich gleng. Zöt is gstaundn, Pavillons woan aufbaut. Oiso geht die Sauferei los. Glei moi den Trichter auspockt und zwa Bier oweghaut. Ma wü jo kane Gössnstich hom.

Gaunz schnö mit den Nochbarn augfreindet, des woa a uandliche Nationen- und Bundesländermischung. Hinter uns woan Südtiroler, neben uns Oberösterreicher und Steirer, vor uns woa a Gruppe vo 20 Bayern und die Nochbarsmadln woan aus Kärnten. Na hawedere, do is sprachlich gsehng uandlich zuagaungan. Denan Kärntner Madln hob i beim Zöt aufbaun höfn miasn, de hom des mit die Haring ned so gscheid gschofft. Es woan lauter Stana im Boden, des woa es anzig gschissane aun dem gaunzen. Tipp: Haringe SCHRÄG in den Boden schlong, daun gengans bei die Stana sche vorbei. Owa ihr suitats scho dickare Teule kafn, de dünnan wean jo sofuat hinig.

Am Donnerstog spüt no ka Band, do is ois wurscht. Desweng geht’s do rein ums saufen. Und hawedere, des hom wir und die Nochbarn zur Perfektion gmocht. Jägermeisterzöt woa a scho offen und i bin natialich glei higaungan.

Auf Facebook hob i aungekündigt, dass i duatn a boa moi sei wia. Owa i woa ned wirklich oft duatn, hob mi mehr ins Spritzer Standl verliebt. Ka Auhnung warum, eppa wia i schwul und oid.

Jednfois woa i im Jagi Zöt und noch an Randl is a Madl, die Nadine herkumman und hot gfrogt ob i wos zoih. I hob gfrogt warum i des tuan suitat und sie sogt: „I suach den Fraunz, owa i find eam afoch ned!“

I was ned, woa mei Strohhuat so schlimm, dass mi kana dakennt hot? Jednfois hob i ihr gsogd, dass moi wos saufn suitat, eppa siechts eam daun. Oiso hob is auf a boa Ampullen Jägermeister eiglond. Noch einigen Minuten hots es daun endlich checkt, dass mi scho gfunden hot. De hot si gfreit ois warad i a Rockstar, hot mi sehr gfreit owa iagandwie a verwundert. Jednfois hob i ihr daun a Autogramm auf die Brust gem miasn – ziemlich leiwaund, aun des kenntat mi gewöhnen.

Zwa Steirerbuam san daun a herkumman, leida was i neama eanare Nauman. De hom mi glei dakennt und mi auf etliche Runden eiglond. I woa eh scho bedient wie in Mayer sei Hund….owa wurscht, am ersten Tog geht’s jo um nix. De hom mi ausgfrogt ois warad i a Gottheit. Meine Güte, i hob nur a Facebook Seitn und poste maunchmoi a boa deppate Sochn wo i hoff, dass lustig san. Owa jo, woa sehr witzig.

Wie gsogd, i hob mi ins Spritzer Standl verliebt. Am ersten Tog bzw. da ersten Nocht hob i duatn weit mehr ois 100 Euro vasoffn, ein Liter Spritzer hot jo 9 Euro kostet. Und die Nocht is laung, oiso ned aufreng :-P

Wia die Sunn aufgaungan is, hob mi ausm Kerngelände gschlichn und mei Zöt gsuacht. Gach aufn Campingsessel ghuckt, an Ofn draht, graucht und mi aufs eischlofn gfreit. Owa de Wachn woa so lässig wie scho laung nimma. I hob mi im Sessel zruckglahnt, die Augen zuagmocht und hob zum Fliegen augfaungan. Herrliches Gefühl. Natialich hob i daun eigschlofn.

Aufgwocht bin i daun, weu da Thomas so vü glocht hot. I hob di Augn aufgmocht, wuit mi bewegen und es is ned gaungan. Tjo, desweng suitast niemois draußen schlofn wennst auf an Festival bist.

I woa vo oben bis unten mit Paunzertape auf meinem Campingsessel gefesselt. Meine Händ homs zaumbunden und total stoak zuapickt, des gleiche bei meine Haxn, nur dass de no beim Sesselhaxn zuwepickt hom. Mei Gsicht woa vo oben bis unten mit Edding vuigschmiert, i glaub i hob sieben Penisse im Gsicht ghobt. Mein Bort homs so verschönert, dass i wie die Conchita ausgschaut hob. Mei Bauch hot so ähnlich wie da Garfield ausgschaut. Auf mein Wadl is „Schluckspecht des Pfarrers“ gstaundn. Sehr einfoisreich, wirklich, i hob sehr vü glocht. Des man i ernst.

Najo, meine Leid und die Nochbarn hom mi daun moi befreien miasn. Laung hob i eh ned gschlofn, zwa Stundn oda so. Oiso wieda an Trichter her und gib eam.

Üwaspringan ma moi die Sauferei und gengan zu die Bands.

Leida was i neama so genau weche Band i ois erster gsehng hob. I glaub sehr stoak, dass Vinegar Hill woa und i ma des vom Spritzer Paradies aus augschaut hob. Danem woa a Halle mit an schenan Dachl, do hob i mi imma in Schodn eineglegt. Vo duat hob i ma a no Deathstars augschaut. Hob de Band ned kennt und i bin iagandwie a froh drüber. De schaun schirch aus, Pfui teifl….

Danoch hob i ma bei da Red Bull Stage Drescher augschaut! Herrlicher Scheiß, mit dem Quetschn Buam hob i nochher sogoa wos gsoffn. Der Hund woa fett und auf Aufriss aus, des hob i no ned dalebt haha super Bursch und a Serbe waun i mi recht erinnere. I mog eam.

Headliner am Freitag: Mötley Crüe! Und gleichzeitig a die greßte Entteischung vom Festival wenns mi frogts. Wie i den Sänger gsehng hob, hob i mi fost augspiem. Fett wie a Germknedl und auzong ois warad a dünn. Pfui Teifl, ned so sche. Daun homs beim Refrain immer es Bandl mitrennan lossn, es woa einiges aun Playback dabei. Da anzige der mi begeistert hot, woa eana Gitarrist. Owa des woas scho. Schod, hätt ma mehr vom Tommy Lee, der lebenden Drogenlegende erhofft.

Late Night? Scooter? Nicht gesehen, sowos schau i ma ned au. Egal ob lustig oda ned, i hob daweu die Nochbarn am Zötplotz obgfüllt mitn Trichter. De hom guad gschlofn.

Samstag: Turbobier woa so ziemlich ana der geilsten Acts de i je gsehng hob, zumindest vo da Gaude her. Kau i nur empfehlen.

Callejon und Asking Alexandria hob i zwar gsehng, i was neama wirklich wos. Warum nur?

Bei In Extremo woa i wieda vui dabei und hob mi gfreit, weu de Band afoch genial is. Leida is mei Kreislauf wenig da Hitz zaumbrochn und i bin moi zur Wossastö gaungan und hob mi bis aufd Nocht vo Wasser ernährt.

Bei den Toten Hosen hob i den Provokateur gmocht. Jeans Jacken mit lauter Böhse Onkelz (Erzfeinde) auzong und drunter no des Leiwal vom Hockenheimring. Gemma gemma.

Beim Lied Bonny & Clyde hot mi a aundara Hawara aufd Schuitan gnumman (Respekt, san 90 Kilo) und i hob mei Jacke afoch nur zur Bühne ghoitn wo wundersche „Gehasst, verdammt, vergöttert“ draufgstaundn is. Leider hots da Campino wui ned gsehng.

Wurscht, moch ma hoit an Crowdsurfer. Vor da Bühne hom mi die Securitys owezong und i hob mi genau mitn Ruckn zum Campino gstöt und aufn Schriftzug deit. Des muas a gsehng hom. Wenn ned – a wurscht, i woa befriedigt (ned foisch vasteh!)

Beim Spritzer Standl (wieder moi) hob i daun gheat, wie da Campino des nächste Lied an verstorbenen Biker Freund widmet, der a Woche davor gstoam is. Es Liad haßt „Nur zu Besuch“ – mir is sofuat die Ganslhaut aufgstieng, weus mei Lieblingsliad vo die Hosen is. Provokation hin oder her. Des Liad erinnert mi immer aun meine Freind de vü zu fruah gaungan san, aun meinen Großvoda und mein ungarischen Opa. Afoch aun olle de ma wichtig woan und neama do san. I hob den nächsten Spritzer ned bestön kennan, weu i afoch plärrt hob wie a Schlosshund. In dem Moment is a junge Frau (i schätz moi 20 Joahr) herkumman, hot a vui plärrt und glei gsogd: „Mah Fraunz, kumm her, i was wies da geht, mir fehlen a scho einige wichtige Menschen.“ – des gaunze Liad laung homma uns gegenseitig gestützt und gemeinsaum plärrt. Es is wirklich sche, wennst in suichn Momenten Leid gibt de dir Trost spenden. Und nebenbei hots mi a glei erkennt und anstott, dass sa si den Oarsch ausgfreit wie olle aundan, hots afoch mit mir getrauert. Dafia hob i ihr daun natialich wos zoiht und mit ihre Leid des restliche Konzert augschaut bis zum Late Night Act. Woan ziemlich gschmeidige Leid aus Baden.

Late Night Special – Wolfgang Ambros: Der Hund woa fett! Sowos geiles hob i sötn gsehng, ua gschmeidige Stimmung, super Liadln und sehr vü Spaß. De Mödungen wos der gschobn hot, bist deppat, i hob glaubt i stirb. Owa sehr guat gemeistert. Super Wuifal, bin stuiz auf di, host guad gmocht!

Sonntag: Frühschoppen und danoch Alkbottle. Die Bottlebuam san imma wieda a Traum. Schauts es eich au, ihr werdets es ned bereuen.

Danoch hob i mi fia mei persönliches Highlight bereit mochn miasn. Mei absolutes Vorbild is nämlich aufd Nocht auf da Bühne gstaundn. Der Typ wegen dem i bis heite sog, dass i mei Leben dem Rock’n’Roll widme. Wegen dem i heite, mit 52 Joahr, Single, ohne Kinder, stolz song kau, dass i mei Leben liebe und kan Tog und kans der unzähligen Konzerte vo eam und seina Band bereue.

Die Rede is vom Lemmy Kilmister und Motörhead. Es woa afoch wieda geil. Noch dem oagn Hurrikan (i sog bewusst Hurrikan!) der üwas Gelände zong is woa Motörhead genau des wos i braucht hob. Davor woa Five Finger Death Punch – geile Scheiße! Muas i nomoi sehng.

Da Lemmy wird boid 70 Joahr und rockt no imma die Scheiße aus seina Boss Gitarre aussa. Und Stimmung mocht a genauso. Es is afoch herrlich, i kau des Gefühl ned beschreim. Waun i Motörhead siech, daun bin i afoch glicklich. I bin wieda jung und denk aun die späten 70er Joahr zruck, wo i meine ersten Motörhead Konzerte erlebt hob. Mit meine besten Freind, wo einige leider neama am Leben san. In suichn Moment bin i afoch glicklich und zufrieden. Danke Lemmy, wir sehng uns sicha no a boa moi!

Danoch woa es Nova Rock fia mi musikalisch vorbei, i hob ois gsehng wos i wuin hob. I bin afoch ka Slipknot Fan, obwuih is ned schlecht find, es is afoch ned meins. Desweng hob i mi zum Plotz zruckghaut und gschaut wos da Sturm ausgerichtet hot.

Da Blog is leider scho vü zu laung und i kenntat theoretisch a Buach üwa dieses Nova Rock schreim. I wia desweng morgen an zweiten Teil schreim wo es üwa die Aktionen abseits da Bühne gehen wird. Kenntat lustig werdn, aundare Leid werdn den Schädl beidln und mi fia an Trottel hoitn. Egal, mei Lem, mei Problem. :)

Bis morgen.

Da Fraunz