Bei meinem Blog zum Life Ball hob i kurz angedeutet, dass ana meina besten Freunde söbst an AIDS gstoam is. Desweng mechat i eich jetza gern mehr vo eam dazöhn, damit ihr mitgriagts wie schlimm de Kraunkheit wirklich is!

Die nächsten Zeilen san a Auszug aus meinem Buch "Gschichtln aus mein Lem", erschienen im Dezember 2015. Fois wer mehr lesen und des Werk bestellen wü - http://www.amazon.de/Gschichtln-aus-mein-Lem-Internet-Erfolg/dp/3990011162/ref=sr_1_1?ie=UTF8&qid=1424694448&sr=8-1&keywords=Fraunz

Auf gehts, wir reisen 30 Joahr in der Zeit zruck.

--------------------------------------------------------------------

Zuerst muas i moi erwähnan: Da Roman woa NICHT schwul! Im Gengteu, der Hund hot ois gvegelt wos weiblich woa und bei 3 ned aufm Bam kreut is. Der hot sogoa mehr Weiwa wie i ghobt und des hot wos ghaßn (bissl augem deaf ma jo trotzdem imma!)1985 is da Rock Hudson, a berühmter Schauspieler, aun AIDS gstoam. Des Ereignis und des Mega Konzert Live Aid hom die Kraunkheit so richtig bekaunnt gmocht. Es hot imma ghaßn "Waaaah a Schwulenseuche, nur Woame griang des, die Oaschgficktn varreckn olle" bla bla bla - owa jeda mit a bissl an Hirn hot natialich gwusst, dass des KEINE "Schwulenseuche" is, sundan a Kraunkheit de JEDA griang kau - i sog moi nur Ryan White (googlets den Nauman wenns damit nix aufaungan kennts)I waß neama genau waun des woa, owa iagandwaun Ende 1985 herum hot da Roman imma eftas mit so klane Leck-mi-in-Oasch Kraunkheitn zu tuan ghobt - oiso Verkühlungen und der gaunze Schas. Er is vü ärger beinaunda gwen ois jeder aundara, der jetza a Verkühlung oder ähnliches dawischt hot. I hob vor a boa Joahr die Schweinegripp ghobt - woa übrigens die aungenehmste Gripp de i jemois ghobt hob – und sogoa do woa i bei weitem bessa beinaunda ois da Roman wia a mit an Huastn kämpft hot. Kana hot gwusst warum er in letzta Zeit so kraunkheitsaunfällig und obgschlogn woa. Wir san a domois no durchd Wötgschicht greist und vo an Konzert zum aundan gfoahrn. So wie friacha, olladings hot da Geri leider gföht, weu a scho verstorben woa. Owa da Roman hot daun a boa moi ned mitfoahrn kennan, weu a dauand kraunk woa. Und des hot wos ghaßn, weu unsa Motto woa so vü wie „Wir steam auf da Bühne!“ Iagandwaun is a daun a boa moi zum Oazt gaungan weu a an Ausschlog und a Schwellung auf da Haund ghobt hot de ned weggaungan is. Und wie a amoi zruckkumman is woan wir olle daham in da WG und hom auf eam gwoatet. Wir wuitn nämlich zu an Party Wochnend noch München aufbrechn. Er is einakumman, total weißes Gsicht und leere Augen – ois aundare ois a guads Zeichn. Natialich wuit ma sofuat wissn wos los is, er hot uns owa ignoriert, is zum Kühlschraunk gaungan, hot a Whisky Floschn aufgmocht und fost des hoiwate Zeig in an Zug oweghaut. Des hätt i ned amoi in meine besten Zeitn gschofft oda a nur prowiat.Daun hot a die Floschn obgstöht, grülpst, uns augschaut, glocht und gsogd:"Leidln, i bin am Varreckn. Da Orzt hot mi komplett untasuacht und jetzt herrscht Gewissheit: I hob den HIV Scheiß. HIV positiv, leider hob i es Pech, dass die Kraunkheit scho komplett ausbrochn is. Mit aundaren Wortn: I hob AIDS"Totenstille

I hob den Roman guat gnua kennt um zu wissn, dass des ka Schmäh woa."I wü ka Mitleid oda so, i wü mei Lem so laung wie meglich genießn, weu sovü Zeit wia i wahrscheinlich eh ned hom. I hob a Leben zu lem und des tua i jetza vadaummt nomoi bis zum letztn Tog!"Wos wüsd do drauf song? "Jo, des wird scho wieda“? Domois woa die Diagnose "HIV Positiv" a Todesurteil, vor ollem fia die klanan Bürger de ned des Vermögen hom um si die teuren Medikamente zu kafn. Und bei eam woa die Diagnose scho „AIDS“. Oiso woa er eh scho zum Tode verurteilt. Komischerweise wuit a kane Medikamente de ma ois HIV bzw. AIDS Patient griagt hot. Er hot si mit Vitamine vuipumpt, Hanfpaste gschluckt und mit Marihuana eigraucht, dass as hoibwechs ertrogn hot kennan. Wir hom eam lossn - i man, wos wüsd mochn? Wüsd eam wos vabieten? Er wuitat sei Leben genießn und des homma eam lossn. Und aun Vitaminen und Marihuana is a ned wirklich wos Oages drau. Außadem is Hanfpaste um etliches effektiver in da Krebsbekämpfung ois a Chemotherapie, wuit i nur moi erwähnen. Schene Griaß aun die Pharmaindustrie, i hoss eich. Wir san no auf einige Konzerte mit eam gfoahrn, des geplante Partywochnend homma olladings ausfoin lossn. I erinner mi do no gaunz guat auns Queen Konzert 1986 in da Wiener Stadthalle. Wir woan relativ weit vurn bei da Bühne und hom die Band fost vor unsara Nosn ghobt. Außadem hob i 1 Joahr davor mitn Geri eigschlong wia ma uns gschworn hom, dass ma si Queen live auschaun miasn soboids noch Wien kumman. Und jo, aun dem Tog hob i mei Wort ghoitn, bin higaungan und woa begeistert.Da Roman hot do scho a Zeit laung vo seina Kraunkheit Bescheid gwusst und daun hot a uns augschaut und gfrogt:"Glaubts hots er a scho?" und hot aufn Freddie Mercury (da Sänger vo Queen) deit. Der woa bekaunntlich schwul und hot des vadaummt nomoi richtig ausgelebt. Der is vor uns herumgrennt, herumghupft und hot gsungan ois darad sei Lem davo obhängan - und jo, a er hot AIDS griagt und is drau gstoam. Iagandwie griag i heit no Ganslhaut waun i aun des denk.

Da Roman hot gwusst, dass sei Uhr am Ticken is und neama laung braucht bevors fertig is. Kana vo uns wuitats realisieren, owa wir hom eam ned mehr ois 1 Joahr gem. Olladings hot er uns vom Gengteu üwazeigt und launge Zeit hot ma ned moi wirklich wos vo seina Kraunkheit mitgriagt. Sei Söbstvasorgung mit Vitaminen und Gros woa do sicha vo storker Hüfe – Marihuana wird bekaunntlicherweise bei da Krebsbekämpfung eigsetzt und is wirksauma ois a Chemotherapie. Ändert leida nix drau, dass in da Öffentlichkeit vateufelt und schlecht gmocht wird. Owa des gheat do jetza ned her.Ende 1988 is mitn Roman uandlich bergob gaungan. Es hot si generell kana docht, dass ers üwahaupt so laung aushoit. Wir hom jo insgeheim scho olle auf so a Wunder gehofft und dass ma vielleicht a Heilung fia de Kraunkheit entdeckt. Leider ois vergeblich.

Ob 1988 woas daun wia wennst an Hebel bei eam umglegt host.Zeascht hot er amoi extrem vü obgnumman. Er is vo Tog zu Tog dünner woan. Dementsprechend hom eam die Kräfte valossn. Im Juni samma moi draußn ghuckt und es woa vadaummt haß. I woa nur in da kurzn Hosn draußn und hob mei Leiwal auszong....da Roman hot a launge Hosn, Pulli, Mauntel, Schal und Handschuach aughobt - erm woa scheißkoit! Und es woa ka schena Aunblick mehr. Sei Gsicht woa total eigfoin und du host die Knochn im Gsicht scho richtig gsehng - des woa sozusong nur mehr Haut und Knochn. Wie a magersüchtiger Marilyn Manson.Und Schmerzn hot a ghobt. Ma kau si des vielleicht ned vorstöhn, owa erm hots sogoa wehtau wenn a Kleidung aughobt hot. Unvorstöhboa oda?