Wir schreim die erste Juli Woche des Jahres 1978. Mittlerweile bin i ausm Koma aufgewacht und wia immer munterer. Eigantlich komisch, i hob mehr ois 3 Wochen laung gschlofn und woa trotzdem hundsmiad. Ziemlich schiach iagandwie.

Am zweiten Tog meiner Wachphase wuitat i moi aufsteh und a bissl spazieren geh. Des hom mir die Ärzte jedoch strikt verboten. I muas liegen bleiben, meinen Körper komplett schonen und deaf nix mochn, weu ma no schaun muas ob eh ois in Ordnung is bei mir.Oida, wos wuits es vo mir? I bin munter, mir is fad, i wü spazieren und ane rauchn geh. Wos sui bei mir ned in Ordnung sei? Oiso hob i gwoat, bis die wichtigen Leid wieder aus mein Zimmer draußn woan, hob ma wieder moi die gaunzn Nodln ausm Körper zong (es hot wieder sehr weh getan) und wuitat a Runde geh. Nochm ersten Schritt bin i umgflogn und am Bodn glaundet. Guad, mei Gleichgewichtssinn woa somit ois aundare ois in Ordnung. Und scho san wieder die Schwestern und da Orzt einagrennt und wieder moi hob i Auschiss griagt. Woa ma eh wurscht, wos wuins ma scho groß tuan? Sie miasn mi gsund pflegn, obs wuin oda ned. I muas erwähnan, dass mei Hirn zu der Zeit a komplett deppat woa.

I hob hin und wieder sowos wie Halluzinationen griagt. In mein Hirn hot sie a Tagtraum obgspüt und kurz danoch bin i aus diesen Gedanken grissn woan, hob jedoch ned checkt, dass i scho wieder in da Realität bin. So woa des übrigens ah, wie mei Chef vorbeikumman is um sie üwa mein Gesundheitszustand zu erkundigen und um mi zu besuchen.

I hob grod an so an schenan Traum ghobt. I woa auf an weißen Saundstraund und woa vo lauter fesche Madln umgeben. Daun is da Chef ins Zimmer kumman, i hob eam augschaut und woa in Gedaunkn no am Straund und hob eppa glaubt, dass des a Dodl is der ma die Madln ausspannen wü.

„Schleich di, schau dassd weidakummst du Oarschloch!“ – des hob i gsogd. Is ned grod es beste wos ma seinem Chef song kau. Olladings hot mei Erinnerungsvermögen auch Aussetzer ghobt, vo dem Ereignis hob i nämlich erst beim zweiten Besuch vom Chef erfoahrn. Wir homs beide lustig gfundn, wobei i im ersten Moment fost a braune Hosn griagt hob.

Noch ana Zeit is moi wieder mei Mama vorbeikumman und hot ma endlich moi an Spiagl gem. I wuitat mi dauand im Spiagl sehng, weu ma mei Schädl so groß vorkumman is, owa die Schwestern wuitn ma kan gem. Aus gutem Grund…

Bist du deppat, i hob in den Spiagl gschaut und mi schowieda fost augschissn.

Des wos i do gsehng hob, hot neama vü mit mir zu tuan ghobt. Es woa ois iagandwie augschwuin, vü greßa und laungzogana ois wos sei suitat. Zumindest hots so gwirkt. Mei gaunzes Gsicht woa zwetschkenblau, lila und a wengl grünlich. Nur auf da Seitn hot ma a wengl normale Hautfarbe sehng kennan. Leck mi in Oarsch, i hob richtig Scheiße ausgschaut! Ma hot gmerkt, dass ma a wengl wos schlimmeres ois a Nasenbeinbruch gschehng is.

Guat, den Schock hob i moi verdaut. Iagandwaun hot da Oberarzt daun wieder moi a Gespräch mit mir ghobt. Er hot ma ned garantieren kennan, dass mei Gleichgewichtssinn wieder normal wird. Des haßt, i warad fian Rest meines Lebens immer aufd Pappm gflong – um es kurz zu beschreiben. Fia mi woa des natialich a Schock, weu wos suitat i daun hackln? I hättat eppa sowos ähnliches wie da Stephen Hawking mochn kennan, owa des is aufd Dauer jo a fad – desweng woa i nur a boa Joahr Lehrer und bin danoch wieder aufm Bau zruck, owa des is a aundare Gschicht.

Noch ana ewig laungen Zeit, hob i endlich wieder ham diafn. Die Fuaßboi WM hob i a verpasst, des is ma fost am meistn am Oarsch gaungan. 3:2 geng Deitschlaund, das Wunder von Cordoba – tuat ma Lad, do woa i im Koma und iagandwo zischen hier und irgendwo.

Daham woa i natialich im Kraunknstaund, ned fia a boa Wochn, sundan fia a boa Monate (es woan 8 Monate, nur so nembei). Mei Mama woa gaunz streng. Da Fraunz deaf ned aussegeh, nur in Begleitung und er deaf ned weit geh. Eam kau jo wos passiern. Ma muas auf eam aufpassn. Mei Voda woa do a bissl gmiatlicha. Loss eam aussegeh waun a wü, er was scho wos a tuat. Geh ausse und foi ned nieder.

Desweng hob i moi die Gunster der Stunde genutzt ois die Mama hackln und da Papa daham woa. I bin aussegaungan zur Garage, hob mei Radl aussaghuit und bin a boa Rundn im Kras gfoahrn. Wie da greßte Dodl, owa es hot funktioniert. Leiwaund, wos moch i jetza? I foahr zum Wirten umd Eckn, wo i immer Koartn gspüt hob (jo, in dem Oita scho!). Davor hob i ma no a Pudlhaum und a Sunnanbrün aufgsetzt, i hob nämlich no immer wie a Ochtl Butter bei 30 Grad ausgschaut.

Do bin i oiso beim Wirtn gsessn, mit an Glasl Wossa und meinen Koartn in da Haund. Und jedes moi hob i valorn. Mei Göd is immer weniger woan und i hobs ma ned erklärn kennan. Meine Koartn woan guat, owa iagandwie hot da Gegner immer gwusst wos i mochn wü. Mir is des scho am Oarsch gaungan und i hob glaubt, des is a Schodn vom Unfoi und mei Hirn is afoch neama des wos woa. I wuitat mi scho damit obfindn, dass i a Denkstörung hätte – ois ma eigfoin is, dass i Dodl jo die wunderschene Sunnanbrün no obn hob.

Der deppate Gegner hättat des ruhig song kennan, desweng hot a olle meine Koartn gsehng. So a Oarsch! Duat bin i laung neama higaungan.

I bin wieder komplett gsund woan, ma sicht nur a gaunz a klana Narbe in mein Gsicht de nedmoi wirklich auffoit. Richtig lässig. Kane gesundheitlichen Schäden, goanix! I erfreu mi bester Gesundheit und kau meiner Glücksgöttin, meinen Kollegen und natialich dem Ärzteteam vo Haus aus danken. Ohne denen warad i heite sicher ned do. Und wenn scho, daun warad i sicher ned so guat beinaunda wie jetza. Herrlich, es Lem is sche! Ich liebe es.

Übrigens: Wos i no liebe, is oaweiten. I steh mas auf mein Job. Desweng woa i total froh, ois i noch 8 Monaten endlich wieder aufd Baustö foahrn hob kennan. Des Gefühl kau i eich ned beschreim, es woa schena ois Sex. Leider woa hoit mei Gleichgewicht no gaunz minimal beeinträchtigt, sowos geht hoit leider ned vo jetzt auf jetzt fuat, des hot scho a Joahr dauert.

I hob grod an Ziaglsta gnumman und wuit eam a boa Meter weida ummetrogn, ois i umgnickt und am Bodn gflong bin. Da Kopf is ned amoi am Bodn aukumman, es is goanix passiert. Owa dafia hob i ma an meinem ersten Oaweitstog noch 8 Monaten glei moi es Seitenbandl beim Knechl grissn und hob wieder moi in Kraunknstaund miasn.

Bist deppat, da Chef woa haß. :)