Seit 30 Joahrn hackl i auf da Baustelle, mit 14 Joahrn hob i augfaungt mit da Lehre (Dezember Geburt, im Juli hot die Lehre begonnen). Zwischendurch hob i an mehrere Jahre dauernden Ausflug in die Schui gmocht und woa ois Lehrer tätig. Woa a schöne Obwechslung und a Bereicherung fias Lem, owa mei Traumberuf is und bleibt die Baustö. Glauben ma vüle ned, is owa so.

Jedenfois gibt’s die sogenannte Maurerkrankheit. Auf guat deitsch – iagandwaun is dei Kreiz im Oarsch.

Aus diesem Grund hob i a scho locker mehr ois 10 Bandscheibenvofälle ghobt und bin a scho dreimoi desweng operiert woan. Fia mi is a Baundscheimvofoi ungefähr so schlimm, wie wenn sie wer beim Kochen einschneidet. Oiso hoib so wüd, bin hoit a bissl a zacher Fisch.

Ihr kennts eich vielleicht no üwa mei Gschichtl erinnern, wo ich vo mein Baundscheibenvorfall und der Blasenlähmung erzählt hob. Do woa i daun moi a Randl im Kraunkenhaus, kurz auf Reha und schlussendlich daham. Olladings hob i olle 10 Minuten (ka Lüge!) prunzen miasn wie a mongolische Berggoaß. Mei Blase hot wieder die Muskeln aufbauen miasn und glaubts mas – des tuat höllisch weh! Vo die Schmerzen im Kreiz wü i goaned reden. Dementsprechend laung woa i moi im Kraunkenstaund.

Irgendwaun bin i moi zum Arzt meines Vertrauens gaungan, der a guada Freind vo mir is, und hob eam meine Schmerzen geschildert. „Normale“ Heilungsschmerzen, damit muas i leben, owa er hot ma Schmerzmittel mitgem, de sehr stoark woan und de des gaunze erträglich mochn suitn.

„Owa Fraunz, denk bitte drau. Kein Schluck Alkohol solaung du de Tabletten nimmst!“

Jo, eh bei jedem Medikament so, owa i nimm jo so guat wie nie Medikamente. Egal, bin hamgfoahrn, hob ma sowos eineghaut und hob endlich moi schmerzfrei gehen und anschließend schlofn kennan. Mei, woa des sche, i kaus goaned beschreim. An Tog späda hob i Rasen gmäht und a bissl wos aun mein Auto gewerkt. No an Tog späda bin i mitn Radl gfoahrn. Es woa herrlich. Und i hob mi gaunz normal gfühlt, ned miad oda sunst iagandwos, afoch nur motiviert wieder gesund zu werden.

Am Wochenende drauf hot mi da Peda augruafn.

„Fraunz, wie schau ma aus, kummst aufn Fuaßboiplotz? Wir hom a Hobbyturnier und brauchatn an Schiri, spün wirst jo ned kennan, oda?“

I: „Najo, wenn i die Zähnt zaumbeiß kennt i sicha spün, owa daun kennt i hackln a geh. I schau vorbei, owa i was ned ob i üwahaupt den Schiri mochn kau. Moi schaun wos i aushoit.“

Ned amoi a Stund späda woa i am Fuaßboiplotz, hob ma di Schiripfeife umghängt und es erste Match pfiffen. Woa gaunz lässig, bei an Hobbymatch muast jo ned vü laufen. Meine Freind hom glei moi 3:0 gwunnan, besser hots goaned aufaungan kennan.

Regel Nummer 1 bei Turnieren vo Hobbymannschaften: Bier, Bier, Bier und dazu a Bier mit a bissl an Bier!

Nochm ersten Match samma bei da Schaunk gstaundn und i hob ma a klans Punti (Schleichwerbung) bestöt. Mei Gott na, de boa Schluck, de mochn jo nix aus. Bist deppat, des hot guat gschmeckt, i wuitat glei no mehr davo hom. Owa i hob mi zaumgrissn und kans mehr augriffn. A hoiwe Stund späda hob i es zweite Match pfiffen. Und die Odyssee hot wieder moi begonnen.

Wia i den Rasen betreten hob, is ma aufgfoin, dass da Rosn auf amoi total wach woa. Wie a Wolke. Und iagandwie wie a Trampolin. Bist deppat, des woa lässig. I bin a bissl ghupft um mi aufzuwärmen und hob mi gfühlt wie a Turner bei Olympia. ANPFIFFBist deppat, der Pfiff hot laung dauat, i wuitat goaneama aufhean. Danoch hot er in mein Schädl no so a schens Echo erzeugt. Huch, des woa geil. Glei nomoi pfeifen miasn. Und nomoi. Und nomoi und wieder und wieder und wieder. Die Spüler hom mi scho augschrian und des hot ma a vui taugt, weu des in mein Schädl so a geiles Klangmuster erzeugt hot.

I schwör, es woa wie auf an LSD Trip! Nur woa ma a wengl schlecht.

Ana vo die Spüler is herkumman und hot mi umsteßn. I bin wui glei am Bodn aufklescht, owa fia mi hot si des augfüht wie wenn i fliang tua. Wirklich, i hob glaubt i fliag grod üwan Fuaßboiplotz. Es hot si ois so real augfüht. I bin am Bodn gleng, hob glocht und gschrian.

De wean olle docht hom, dass i da greßte Vuitrottel bin der grod aus da Psychiatrie aussakumman is. Hot woahrscheinlich eh neama vü gföht.

Laungsaum owa sicha hom de olle checkt, dass mit mir iagandwos uandlich schief rennt. Warum lossn mi de ned afoch in Ruah? I wü meine Runden fliang, de suin si schleichn, stengan nur im Weg und hoitn mi fest. Es is immer mehr eskaliert. Auf amoi hob i an leichten Tunnelblick griagt und in den Augenwinkeln hot si ois zum Drahn begonnen. I hob Dinge gsehng de goaned do woan, unter aundarem Pluto vo Mickey Mouse – frogts mi bitte ned warum, i was söwa ned. I hob nur mehr aufn Aladin gwoat, damit a mi auf seinem Teppich mitnimmt und ind Wüste fliagt. Warad sicha geil gwen.

I: „Lossts mi aus! LOSSTS MI AUS! Bringts mi auf die Tangente, i kau fliang, i zag seich, i kau fliang! I spring vo dera scheiß Bruckn und wia üwa die Donau fliang.“

„Fraunz, beruhig di du Dodl, du kaunst ned fliang. Wennst owehupfst wirst am Bodn aufkleschn und di neama beweng.“

I: „Du kennst di ned aus, sei leise, wenn i unten aukumm passiert ma eh nix, i wia zruckgfedert wie a Gummiboin, so wie do grod. Bringts mi zur Bruckn, i zags eich!“

Des is ungefähr a hoiwe Stund so weida gaungan, bis mi da Peda hamgfiahrt hot. I bin auf da Rückbaunk glegn, auf mir san vier Hawara ghuckt und hom mi so guat wie möglich festghoitn. Hot funktioniert.

I bin in mei Haus einezaht woan, sie hom mi auf die Wohnzimmercouch ghaut (de übrigens sehr groß und bequem is meine Damen, miasts eich moi auschaun) und da Peda hot daweu mein Oarzt augruafn.

Bist deppat, der woa uandlich haß ois a mi gsehng hot. „Fraunz, i hob dir gsogd KEIN SCHLUCK ALKOHOL! Warum huachst ned auf mi? In de Tabletten is Morphium drinnan, stö da vor du hättast no mehr gsoffn. Meine Güte, eich kau ma nie wos recht mochn.“

Er hot ma die restlichen Tabletten weggnumman, ma iaganda Spritze gem und meine Halluzinationen hom noch ned amoi 10 Minuten aufgheat. Eigantlich schod, woa iagandwie scho a geiler Trip, des muas i ehrlich zuagem.

Owa danoch is ma dreckig gaungan, bist deppat. I hob nur mehr gschlofn und wuitat danoch neama vor die Haustia geh. Aus iagandan Grund hob i mi a bissl geniert und wuitat kane Leid treffen…. J

Owa he, die Tabletten woan weg und die Schmerzen lustigerweise a. De boa Tog auf Morphium hom si oiso wirklich auszoiht.

Oiso lossts eich trotzdem ans song: Egal ob Parkemet oder aundare damischen Medikamente – FINGER WEG VON ALKOHOL WENNS AUF TABLETTEN SADS!

Glaubts mas, des is ois aundare ois leiwaund, stöts eich vor ihr hupfts wirklich vo da Bruckn owe und kennts owa ned fliang. Na, des geht ois aundare ois guat aus.

Saufts liawa zwa oder drei Bier mehr, is gscheida.

In diesem Sinne: Schönes Wochenende!