Mei Arbeitswoche is zum Glick oft kurz. Des haßt, i hob meistens am Freitog frei. So auch letzte Wochn. De Freizeit hob i dazua gnutzt, dass i moi wieda an Sprung zur Vawaundtschoft noch Ungarn schau – Oma (jo, de lebt no, na sie is neama jung, jo sie is gsund) & Co. Besuchen. Weu mei Onkel, der lustigerweise einige Joahr jünger is ois i, hot Geburtstog gfeiert.

Oiso hob i mi in meinen heißgeliebten Audi A5 (scho a geiles Gefährt, bist deppat) eineghuckt und bin Richtung alte Heimat gfoahrn. Bekanntlicherweise bin i jo in Ungarn geboren und hob die ersten 4 Jahre meines Lebens am Hof vo die Großötan vabrocht.

Endlich bin i duat aukumman. A boa weitere Gäste, de olle zur Famülie ghean, woan scho do. I bin wieder moi herzlich Willkommen geworden, die ungarische Gastfreundschaft is jo international bekaunnt. Des ständige Umdenken auf die ungarische Sproch is am Aufaung a bissl komisch, owa noch ana guadn hoibn Stund red i schowieda wie gschmiert.

Apropo schmieren: Natialich fliaßt Alkohol auf so ana Geburtstogsparty. Und ned grod wenig, hawedere….

Es schene bei suiche Feiern is, dassd immer die „next generation“ siehst – oiso die jüngsten Kinder vo unsara Famülie. Mei Oma hot 19 Enkelkinder und etliche Urenkerl. Sehr sche auzuschauen, wenn die ötaren Leid drinnan huckn und wos trangln, während die klanaren Kinder draußen Fuaßboi oda mit die Hund spün. Erinnert mi imma an mei Kindheit. I bin froh, dass de ned olle aun den elektronischen Geräten kleben, do würd ma sehr vü vapassn.

Owa wurscht, kumma zum Hauptthema vo dem Blog:

Noch an Randl bin i mit a boa ötaren Vawaundtn ind Garage gaungan, wo a großer Tischtennis Tisch steht. I bin ned grod da Beste in dem Sport, owa a ned grod da Schlechteste. Owa wenn ma um Göd spün würden, daun hätt i a klans Problem….

Iagandwaun hot da klane Tibi (ungarischer Spitzname fia Tibor) die Tia aufgrissn und gfrogt, ob sie wer vo uns oide Leid auf a Skateboard Rennen eilossn wü.

Natialich wuit ma eana a Freid mochn, desweng samma olle mitgaungan. Bei da Einfoahrt zu unsarem Hof geht’s a wengl bergob, oiso es is a schena Hügel auf dem die Stroßn do owegeht. Wia i kla woa, bin i do es erste moi auf „Ski“ gstaundn – afoch zwa Huizbrettln mit an Gummizug. Oiso es is ned wirklich a floche Stroßn.

Mei Onkl hot augfaungan und is gleichzeitig (zwa Skateboards woan vorhaundn) mit ana meina Großcousinen owegfoahrn. Der hot auf dem Brettl ned steh kennan und hot desweng valorn. Natialich is a dementsprechend vo uns und den Kindern vaorscht woan.

Wer im Glashaus huckt, suitat ned mit Stanan werfen. A ned, waun a no vorm Glashaus steht.

Desweng hob i die Oarschkoatn zong und hob ois nächster startn miasn. Gengan Tibi, de klane Krätzn (lieb gmant, er is a klasse Kerl).

No brav gegenseitig austacheln und scho is losgaungan.

Nebnbei muas i erwähnan, dass meine Skatboard Erfoahrungen sehr minimal san. Mei Hund hot Skateboard foahrn kennan, ohne Scheiß – owa sogoa der woa bei weitem besser ois i.

Oiso hob i moi gscheid mitn Haxn autaucht, damit i an guadn Schwung zaumgriag. Da Tibi woa auf gleicha Höhe wie i, desweng hob i mi no mehr Gas gem. Endlich hob i eam üwahuit, do mocht si des Körpergewicht oiso doch bezahlt. Und es geht scho bergob.

Uije, des wird owa schnö. Gleichgewicht hoitn Fraunz, Gleichgewicht hoitn!

Bist deppat, des is ois aundare ois leicht, mi beidlts durch wie a Banane im Mixer. I woa no imma vorm Tibi, wenn a nur minimal. Hob i mi scho a wengl gfreit ghobt. Do hot mi der klane Dreck üwahuit, weu a, wie aufd Ski, ind Hocke gaungan und beschleunigt hot.

Na woate, des kau i ah, hob i ma docht und des gleiche mochn wuin.

Was wer wie ma bei an Skateboard lenkt? Theoretisch hob is a gwusst, praktisch hob is üwahaupt ned kennan.

Des deppate Brettl zum Eiern augfaungan und i hob mitn Körper herumgwocklt ois warad i da Michael Jackson in seinen besten Zeitn, nur auf zu vü Beruhigungstablettn vamischt mit a wengl Speed oda sowos in da Oat. Bremsen hob i a ned kennan und da scheiß Hügel wuit afoch ned floch werdn.

Auf amoi siech i do nur mehr des Auto vo mein Onkl. Wos parkt der Trottl sei Auto a so weit vuan.

Ka Chance mehr zu bremsen, wos sui i jetza nur mochn? Hüft ois nix mehr, i muas springan.

ZACK, BUMM, BÄNG!

I bin grod no vorm Auto owaghupft, olladings hob i so vü Schwung drauf ghobt, dass mi erst des Auto gstoppt hot. Mit mein rechtn Knia hob i es linke Vorderlicht in die ewigen Jagdgründe gschickt. Durch die Wucht vom Aufprall, hots mi seitlich aufd Motorhaum auffeghaut und mitn Haxn hob i daun iagandwie den Seitenspiagl no davogfetzt, sodass a zum Fliang begonnen hot. Mei Nosn hot die Windschutzscheim geküsst, zum Glick woa die Scheim stärker, owa leida mei Nosn schwächer. Danoch bin i mitn Ruckn am Bodn aufklescht (Autsch) und mit die Fuaßsohlen am Autolack entlanggschliffn – a boa Krotza woan die Folge, weu a boa klane Stana in da Sohle gsteckt san.

Mit an eleganten owa ungewollten Rückwärts-Purzelbaum, hob i den Highsider endlich beendet. A kurze Hosn hob i aughobt, mei Knia woa daunk de Glosscheim offn und die Bluatsuppn is grunnan. Mei Haxn hot wehtau, weu der scheiß Spiagl hoibwechs stabil woa – Betonung auf „woa“, mei Haxn woa stärker. Mei Nosn hot wieda wos vom Michael Jackosn ghobt, olladings mehr negativ ois positiv. Und a do is die Bluatsuppn grunnan. Daunk meinem Gwicht hot ma a da Ruckn dezent wehtau.

Und scho san olle um mi herum gstaundn, olle hom gfrogt ob ma eh nix passiert is – du na gö, des is nur a Lippenstift der ma aus da Haut tropft. Owa do host ka Zeit zum Jammern, oiso muast lässig reagiern.

Desweng bin i aufgstaundn, hob glocht, gschaut ob no olle Zähnt do san und gsogd, dass ois in Uadnung is, i jetza owa unbedingt an Palinka brauch – offiziell zum Saufn, inoffiziell um davor die Wunden am Knie zu desinfizieren.

Gesagt getan – so san wir oidn Leid wieda drinnan ghuckt, hom gsoffn (i hob ma nebenbei Eis aufd Nosn glegt) und festgstöt, dass wir eindeitig zu oid fia den Scheiß san. Und olle woan froh, dass ned so ehrgeizig bei an Wettkaumpf san wia i. Im Skiurlaub hob i jo a schomoi so an Scheiß zaumbrocht, des is owa ned so glimpflich ausgaungan. Des Kapitel findets owa in mein Buach.

Desweng hob i im vorigen Sotz a kurze Schleichwerbung fia mei Biachl gmocht – kafts es bitte, weu demnächst wird a Rechnung vo da Werkstott kumman, weu i den Schodn am Auto vom Onkl zoihn muas… :)

Wos lern ma draus? Loss die jungan Kids in Ruah, du bist a oide Dreckschleida de afoch ned eisehng wü, dass de grauen Hoa wirklich vom etwas höheren Alter kumman und du afoch neama da Jingste bist.

Owa ois hoib so wüd, Kraunknstaund hob i ned braucht weu i eh grod Urlaub hob. Und des AC/DC Konzert am Donnerstog loss i ma a ned entgeh.

Mittlerweule hob i eh kane Schmerzn mehr, die Nochwirkungen vom Rausch san a bissl schlimmer gwen….

Ein Hoch auf die Familie.

Und wie woa eicha Wochnende?