Es is bekannt, dass i a Randl ois Lehrer aktiv woa. A boa moi hob i a ois Klassenvorstand agieren diafn.

Kennts eich vuastön wias do zuagaungan is.

Am Montag is in da ersten Stund nix gmocht woan, in da Mittogspause hot jeder a Bier trinken diafn und zwa Leid san zum Eikaufn auserkoren woan. Am Nochmittog is daun da Trichter dazuakumman und es Besäufnis woa perfekt.

Na Spaß, bin jo ned deppat.

Es hot an guadn Grund ghobt, warum i ois Lehrer ghacklt hob. I wuit meinen Schülern wos beibringen, sie aufn Ernst des Lebens vorbereiten.

Owa natialich gheat hin und wieder a bissl a Gaude ins Schulleben. Speziell bei Ausflügen aller Art. Unter anderem bei unsra Skiwochn aufs Nassfeld – mei erste mehrtägige Exkursion ois Lehrer. Na bumm, i woa genau so gspaunnt wie die Schüler.

Wir san am Sunntog um 8 Uhr in da Früh weggfoahrn. Am Vortog bin i a wengl fuatgaungan und erst um 6e in da Fruah hamkumman. Oiso gaunz schnö den Koffer pockn, Ski schnappen und auf geht’s.

Am Freitog hot mei Klass no a Englisch Schularbeit bei mir ghobt. I hob eana gsogd, dass die Noten auf da Hinfahrt erfoahrn. Na rotets moi wer drauf vagessn hot und desweng im Bus die Korrektur mochn hot diafn? Richtig, ich! Do schaust Herr Häupl, a Lehrer da am Sunntog „hacklt“ ;)

Jedenfois woa i hoit dementsprechend restfett. Owa ka Aungst, so is so ziemlich jeden meiner Schüler gaungan. Einige woan eh scho über 16, a boa jedoch no ned. Owa wen interessiert des scho? Wir san friacha a scho mit 14 fuatgaungan, oiso bin i da Letzte der si aufregt.

Bevor ma üwahaupt kärntnerischen Boden betreten hom, woa i mit da Korrektur fertig. Kane Fünfer, super, besser geht’s ned. I woa stuiz auf meine Kids und hob des glei moi üwas Mikrophon durchgsogd – danoch bin i vo olle ausglocht woan, weu mei Stimm „wie die Bonnie Tyler“ klingt. Ja, i hob eich a gern ghobt.

Hoteleinzug!

I hob a Einzelzimmer ghobt, ziemlicher Luxus wenn zwa männliche und zwa weibliche Lehrer (wir woan zwei große Klassen) dabei san. Laung hots ned dauert, do wuitat i scho ane rauchn geh. Hob jo a wundaschene Terrassn ghobt und woa mit den Schülern auf ana Ebene. Na supa, des kau lustig werdn.

Draußn gstaundn, wer hot wui sei Feuerzeug daham lieng lossn? Richtig, da Fraunz!

Owa do hots scho so noch Tschick grochn, oiso hot do aunscheinend wer die gleiche Idee ghobt wia i. Bin oiso ums Eck gaungan und wen siech i do? Drei meiner Schüler, nur Burschn und olle drei no 15 Joahr oid. Somit herrscht Nikotinverbot. Wer si ned drau hoit, der griegt an Blauen Brief. Bei drei blauen Briefen fliagst vo da Schui.

Na bist narrisch, denan Burschn is glei moi es Gsicht eigschlofn und se san kasweiß woan. Owa wie gsogd, i bin a leiwaunda Lehrer.

„Oiso wirklich, ihr wissts, dass i nur a boa Schritt entfernt mei Zimmer hob und ihr wuits grod do hamlich rauchn? Is des eicha Ernst? Des riach i sogoa waun i vaschnupft bin. Mochts eich kane Sorgn, i wuit ma nur a Feuer schnorrn. Gebts ma gach a Flammal. I hob eich ned gsehng und ihr hobts mi ned gsehng!“

Fois si jetza wer aufreng wü: Wuits ihr am ersten Tog vo da Skiwoche Blaue Briefe aussprechen (austeun kaunst es erst in da Schui) und den Betreffenden die Woche vasauen? Nur weus graucht hom? Wos sowieso gmocht hättn, wenns moi allanig im Lift oda sunst wo gwen waradn? Sads ma ned hab, owa des is lächerlich.

Am ersten Tog samma ned auf die Pisten gaungan, weus scho Nochmittog woa wia ma eitroffn san. Tjo, daun is richtig losgaungan.

I was ned warum, owa aus iagandan Grund hom meine Schüler und i uns gegenseitig sehr gerne Streiche aller Art gspüt. Wennst in die Klass kummst und vo ollen Seiten mit Luftschlangen Sprays bombardiert wirst, daun is des anaseits grauslich owa aundaraseits wieda lustig. I hob zumindest driwa lochn kennan. Wenns da olladings auf die Sessellehne an Kaugummi picken und du dir damit dei Sakko vasaust, daun geht des scho a wengl zu weit. Trotzdem hob i fost 10 Minutn braucht, bis i die Ursache fia den Lachkrampf in da Klasse entdeckt hob.

Und jo, auf da Skiwochn woas ned aundas, do woas eher heftiger. 6 Tage lang Tag und Nacht mit den Lehrern unter an Dachl. Wecha Schüler do ned auf blede Gedaunkn kummt, der hot a wengl wos foisch gmocht.

Am Abend bin i es erste moi zum Streichopfer woan.

I bin grod auf da Terrassen gstaundn, hob wieder moi ane graucht (mittlerweile scho a Feuerzeug besorgt) und a wengl nochdocht. Es hot vadaummt stoak gschniebn und im Goatn san mehr ois 40cm Schnee gleng. Herrlich.

Auf amoi hea i nur mehr „He, Herr Professor?“, owa do woas scho zu spät zum Reagieren.

ZACK, ZACK, ZACK ZACK, ZACK, ZACK

So schnö hob i goaned schaun kennan, do bin i mit Schneebällen beworfen woan. Und jeder Anzelne hot mi im Gfries troffn. Na woatets nur, jetza sans zu weit gaungan. Die Tschick hob i wegghaut und i bin eana nochgrennt. De Beidln san olle um die Eckn grennt  und i natialich blindlinks noch.

DOING!

Is allen Ernstes a aundara Klassenkamerad bei da Eckn mit an großn Gymnastikball ausm hoteleigenen Turnsaal gstaundn und mir entgegenghupft. Na bist narrisch, i hob obghom wie a Flugzeig und bin wundasche im Tiafschnee glaundet. Mit Schlapfen, Jean und kurzem Shirt – wuit jo nur a kurze Rauchpause mochn. Die Schüler san olle bei da Eckn gstaundn und hom eana Lem neama dazaht vor lauter lochn. Mir is ned aundast gaungan,  hob nedmoi aufsteh kennan und hob vor lauter Lochn scho hoiwat plärrt.

Ma muas neidlos anerkennen: Des homs vadaummt guat geplant und no genialer umgesetzt! Mir warad olladings liawa gwen, wenns den aundan Lehrer ois Opfer fia den Streich ausgsuacht hättn, owa der Hund hot jo im 1. Stock gwohnt, oiso hob i die Oarschkoartn zong.

Danoch bin i zu die Burschn higaungan, hob eana mei Anerkennung ausgsprochn, weidaglocht, ane graucht mit eana und schlussendlich den Oarsch mitn Gymnastikball in den Schnee ghaut und eigriem. Wos olladings a Schneeballschlacht ausglöst hot. Und rotets amoi wer des Opfer vo allen war? Richtig, ich.

Wos lernt ma draus? Die Schularbeitn suitat ma erst auf da Heimfahrt korrigieren, daun host nämli bis am Schluss a Ass im Ärmel.

Owa des woa jo erst da erste Tog, es is jo no vü lustiger woan. Des schreib i olladings a aundares moi, weu i ned wü, dass der Blog so laung wird.

I hoff, dass genau so herzhoft lochn hobts miasn wie i. Suiche Ereignisse san die schensten Erinnerungen im Leben eines Lehrers.

Wenn des Interesse besteht, daun schreib i gern Fortsetzungen zu dem Thema.