Tag 2 vo da Skiwochn mit meina Klass am Nossföd. Die Streiche zwischen Schülern und Herrn Professor Fraunz gengan in die nächste Runde.

Die erste Nocht beschreib i mit einem Wort: Heiß!

Na, damit is nix sexuelles gmeint!

Die Heizung in unsara Unterkunft woa hinig. Sie is 24 Stundn am Tog durchgehend grennt. Ka Problem, drahst hoit afoch den Heizkörper ob.

Tjo – bledaweise woan de so modern, dass de Hundling a Fußbodenheizung ghobt hom. In jedem Zimmer. I hätt ma um 23 Uhr a Eierspeis am Zimmerbodn mochn kennan, zumindest hot sa si so augfüht.

Wos mocht Mann oiso in diesem Falle? Ma schloft afoch mit offenem Fenster und offener Terrassentür. Hot fost jeder gmocht, die Madln woan eh olle im oberen Stock und hom getrennte Balkone ghobt, somit hot sie da Pädagoge ka Aungst üwa nächtliche Orgien unter Schülern mochn miasn.

Owa wie gsogd – i woa im Erdgeschoss und hob a Terrasse ghobt. Genauso wia die Lausbuam de mi a boa Stunden davor mit Schnee zubetoniert hom.

Am nächsten Tog woch i auf. Irgendwie is ma koit, irgendwie is ma haß. Minusgrade außerhalb des Zimmers, Wüstentemperaturen am Fuaßboden. Die Terrassentür und die Fenster woan natialich üwad Nocht offn, sunst warad i krepiert.

Aufsteh, auziang, prunzn geh. I bin so a Mensch, der immer nochm Fruahstuck Zähne putzen geht – i hob moi a Mohnweckerl in da Fruah gessn, bin hackln gaungan und danoch ausglocht woan, weu i schwoaze Zähnt hob. Da Mohn pickt wirklich aun die ungünstigsten Stellen (im Mund).

Oiso bin i mit an schönen out of bed look in den Frühstückssaal gaungan. Mit an freindlichen Grinser hob i die aunwesenden Schüler griaßt.

Und scho hot da Lochkraumpf begunnan.

Warum? I hob a Hose und a Leiwal au. Hosntial is zua, die Anakonda guat vasteckt, des schlimmste somit verhindert. Augschissn hob i mi a ned. Warum lochn de oiso so?

Beim Frühstücksbuffet hom mi die Servicemitarbeiter a ziemlich deppat augschaut. Ois darad i im Haubenlokal noch an Kübel zum Einespeim valaungan.

Guat, iagandwos passt ned. Vielleicht hob i mei Frisur im Schlof zu an Heckspoiler gmocht? Des wird’s sei, ois ehemaliger Bauhackler interessiert mi mei Spiegelbüd natialich ned vü und desweng hob i a ned in den besagten Spiegel geblickt. Welch fataler Fehler….

Zum Lehrertisch ghuckt. Lehrer schaun mi au, a Kollegin spuckt vor lauter Lochn ihrn Orangensoft üwa ihr Teller, da Kollege schüttet si sein Kaffee üwas Leiwal und schreit danoch weus weh tuat. Und die fescheste Kollegin hot sie Händ vors Gsicht gschlong und mi augschaut ois warad i da Tod hechstpersönlich.

I: „Ok, iagandwos stimmt aunscheinend ned mit mir. Sogts ma bitte wos los is und warum olle üwa mi lochn?“

Die fesche Kollegin hot ihren Schminkspiagl ausm Haundtascherl (braucht ma jo beim Fruahstuck auf ana Skiwoche) aussazaht und mir hinghoitn. Und i hob den Grund fian Lochkraumpf entdeckt.

Die Gfrastsackln vo Burschen san in da Nocht in mei Zimmer kumman und hom mei Gsicht mit Edding und Lippenstift bearbeitet. I hob ausgschaut wie a schlechtbezoihte Hua vom Prodastern, de fia a Haund voll Saund jeden deiner Wünsche erfüllt. Bist deppat, i hob mi geniert. Und gleichzeitig hob i zum Lochn aufaungan miasn. I bin aufgstaundn, zum Burschntisch gaungan de si scho olle hoiwat auprunzt hom vor Lochn, mi üwan Tisch drübergebeugt, eana extra no a Bussi gedeutet und daun gsogd:„Des wird a Nochspü hom. Des is ka Warnung, des is a Drohung!“

Erster Skitag: I leite die erste Gruppe der Skifoahra. Oiso de, de am besten foahrn kennan. Und a boa Snowboarder, de gern schnölla foahrn würden. Natürlich woan olle Burschn ausm besagten Zimmer in meina Gruppe.

An hob i moi wundasche eigstaubt und zum Schneemau gmocht. An aundaren hob i genau vorm hinsetzen beim Sessellift die Bindung vom Ski aufgmocht. Bledaweise samma dadurch beide umgflong – Domino Effekt.

Ana vo die Snowboarder is mit mir am Schlepplift gfoahrn – bei da Höfte der Liftstrecke hob i eam „unabsichtlich“ ausseghaut, in dem i gniaßt und mi dabei so ind Knia sinken hob lossn, dass eam sozusogn ausghobn hot. Ziemlich lustig auzuschaun. Leida homma daun auf eam woatn miasn, des hob i ned bedacht. Wenigstens is dabei a Rauchpause aussagsprungan.

Und fian Letzten, sozusong da Rudelsführer, hob i ma wos gaunz spezielles ausdocht.

Zweite Nocht.

Gleiches Szenario, Heizung rennt wie varruckt und jeder schloft mit offenen Fenstern und Balkon- bzw. Terrassentüren. Außa da Professor Fraunz, der hot ois zuagmocht und is bis hoiwa 1 im Gemeinschaftsraum mit die aundan Lehrer gsessn.

Danoch hob i den Spieß umdraht.

Gaunz leise hob i die Terrassentür aufgmocht und bin zum Zimmer vo die Burschn gschlichn. De hom natialich die Terrassntia offnlossn, suiche Vuipfostn. Noch dem Schmäh in da Nocht hättns denken miasn, dass a Retourkutschn kummt.

I hob a Schneeschaufel mitghobt. Praktischerweise woan no imma mehr ois 40cm Schnee im Goartn.

Oiso gaunz vü Schnee auf die Schaufel auflodn, gaaaanz leise die Tür aufmochn und ins Zimmer schleichn. De Hund hom gschnorcht wie die Wödmasta und gfeut hots wia in an Hühnerstoi – jojo, die Jugend hoit, wir woan ned aundast :-P

Mei letztes Opfer hot zum Glick im unteren Stockbett in da Mitte vom Zimmer gschlofn.

ZACK!

Mit der gelernten Hand eines Maurers hob i eam den gaunzn Schnee vo da Schaufel wundasche üwas Gsicht und dem restlichen Bett drüwaghaut. Der is so schnö aufgsprungan, dass a si gleid en Schädl beim oberen Bett aughaut hot. Es hot a bissl dauert, bis a checkt hot wos los is. Daun hot a mi mit an breitn Grinser und da Schaufel steh gsehng.

I hob eam aufd Schuita klopft und gsogd

„Jetzt samma quitt! Und ob jetzt güt folgende Regel: Des Zimmer is tabu! Glaubts mas Burschn, ihr gwinnts den Kriag geng mi sicha ned. Guade Nocht, schau dassd ned noss wirst.“

Und weg woa i.

In dem Zimmer hots zum Glick no a freies Bett gem, sunst hätt i des eh ned gmocht, des warad zu gemein gwen. Am nächsten Tog woa i ois ana der ersten im Frühstücksraum und hob aufn Luki (des Schneeopfer) gwoat – wir hom si gengseitig mit an Lochkraumpf begrüßt.

Genau deshoib hob i diese Klasse, mei sogenannte Schatziklasse, so sehr geliebt. Weu ma si, wenns passt hot, auffiahrn hom kennan ois waradn ma die besten Freind. Und trotzdem woa die Respektgrenze Lehrer-Schüler vorhanden.

Es geht no weida, wir san jetzt erst am dritten Tog aukumman und der hot do erst augfaungan.

Fortsetzung folgt!