Wer schauts grod ned? Den Eurovision Song Contest! I woa gezwungenermaßen auch dazua verdammt, dass i ma des auschau.

I wuitat ma an schenan Obend mochn. A Frau hob i kane, samma froh. A Freindin bzw. a Gspusi zurzeit a ned – des is bitter, hin und wieder hätt i nix geng an haßn Beischlof ohne Verpflichtungen.

Oiso hob i den Weg der einsamen Männer eigschlong: Eine ins Stamm Pub auf a boa guade Bier, Shots und guade Musik.

Do da nächste Schock: Des Pub is guat besucht, wie so oft am Wochnende, owa lustigerweise homs den Fernseher aufdraht und zang bahoat den Song Contest.

Normalerweise mochns nur Ausnahmen bei wichtigen Fuaßboispielen. Champions League, Wödmasterschoft & Co.

Heite homs hoit des Gedüdel im ORF 1 aufdraht.

Bledaweise woan a olle no total ruhig und hom gaunz gespannt den Songs gelauscht. I was ned, homma grod Fosching oda bin i im foischn Füm? Egal, da Mensch geht mit da Masse und weu i ka Oarschloch bin, hob i a afoch moi die Show genossen.

Und ans muas ma Österreich lossn: Wir kennan ned vü, meistens geht eh ois schief (Seawas Werner), owa den ESC zu veranstalten homs wirklich guat gmocht. Üwa die Wurscht kau ma denkn wos ma wü, die Mirjam is a vadaummt schoafe Kotz (schreib mi au und gib ma dei Nummer, i zag da wo da Bartl den Most huit), die Kiesbauer hot heite gewirkt ois hättats a Verstopfung und gleichzeitig Durchfoi – und wer woa eigantlich die vierte Moderatorin? Kummt ma ned bekaunnt vor, no nie gsehng. Wurscht, darad i a ned vo da Bettkauntn steßn (deafst ma a dei Nummer gem).

Die Bühne! Ziemlich lässiges Teu, Hut ab, des muas i eana lossn. Die größte LED Leinwand aller Zeiten? Kau i ma ehrlich gsogd ned vurstön, owa loss ma eana moi die Freid. Wird scho passn.

Die Effekte san jedenfois a Haumma gwen! Vor ollem beim Auftritt vo Schweden woa i a wengl begeistert – obwuih a teuweise a wengl zu laungsaum mit seinen Bewegungen woa. Kau ma verzeihen, de Hundling san sicha sehr nervös. Verständlich.

Ajo, do woa jo da Auftritt vo Österreich.

I kenn die Makemakes seids im Joahr 2013 die Vorband vo Bon Jovi in da Krieau woan. Hom ma domois scho taugt, weus eigantlich olle a Charisma ausstroihn. Und genau des brauchst in da Musikbranche. Und des Liad vo eana taugt ma extrem. Muas i ehrlicherweise gestehn. Normalerweise bin i jo Fan vo hoatn Rock ‘N‘ Roll, owa hin und wieder is a Ballade a wos schens – siehe den Song „1916“ vo Motörhead. Des is wie beim Sex – wennst gaunze Zeit nur vuigas und schnö schnö gibst, daun wird’s da iagandwaun zu deppat.

Vastehts wos i man?

Die Italiener hob i ma no augschaut (geniale Stimmen, owa des Liad – najo…) und daun hob i mi Richtung Heimat bewegt. Leichtes Damenspitzerl, Autofoahrn deaf i a nimma – hoch leben die Öffis.

Jetza kumm i ham, huck mi aufs Gewisse um an Bruada obzuseilen und geh nebenbei mitn Smartphone auf Facebook. Wie gsogd, da Mensch schwimmt mit da Masse – aufs Smartphone und Facebook bezong, ned aufs Ergebnis vom Obseilen!

Und do les i a boa Statusnochrichten, dass wir Österreicher an heftigen Oarschtritt griang. A geh, waun griang ma des ned? Griaß di Werner, doppelt hält besser.

Noch kurzem Studium der Lage hob i festgstöt, dass wir Österreicher im Voting mit 0 Punkten am letzten Plotz lieng – gleich auf mit Deitschlaund. Österreich und Deitschlaund vereint? Na bumm, des wuin ma bitte nie wieder. Owa einigen darad des sicha taung. Seawas Heinzi, ois kloa? Who the f*ck is Heinzi? Taxifoahra, Putzkraft, Schulwart, MA48 Mitarbeiter oder vielleicht sogoa a Politiker? Wer was des scho, i ned.

Na ehrlich jetza, de Bewertung is scheiße! Null Punkte hom sie die Makemakes ned vadient, de hom a schens Liad gschriem, instrumental sans in Ordnung und da Sänger hot an super Job obgliefert. Und daun griangs so an Aufwärtshockn ind Goschn, do kaunst jo nur K.O. umfliang. Do scheiß i drauf. Richtiger Motivationskiller fia die Band und sowos find i scheiße.

Najo, owa song ma hoit des wos uns Österreicher bei großen Veraunstoitungen immer tröstet: Dabei sein ist alles! Außer bei ana WM, do scheiterts immer aun uns söbst – owa fiad nächste schauts guat aus. Juhu, Ausscheiden in da Gruppenphase <3

Liebe Organisatoren, ihr hobts an wundaschenen Event mit ana grenzgenialen Bühne aufd Reihe gstöt, die Stimmung in da Halle woa a super, jeder is angefeuert woan und die Vorschau bei jedem Act woa a guat durchdacht mit den einzelnen Aufgobn. Herrlich, i bereus ned wirklich, dass i ma des augschaut hob. Olladings darad i 100 aundare Sochn finden, de i ma liawa augschaut hättat. Life is a b*tch, gö?

Und zum Voting? Do san a boa Hurnkinda dabei! Seawas Herbert.

Leidln, i wünsch eich a guads Nächtle. Regts eich wengan Ergebnis ned auf und mochts eich bitte ned gengseitig des Leben schwa – ihr üwalebts es sowieso ned.

PS: I mog des Blogbüdl, do schaut die Conchita so weiblich aus.