Gestern am Obend hob i an Blog zum Thema „Mobbing in der Schule“ veröffentlicht, wo es darum ging, dass a ehemoliger Schüler vo mir Selbstmord begehen wuitat und si scho die Pulsadern aufgeschnitten hot. Da Auslöser dafür, war langes Mobbing wos an einem Freitag im Turnunterricht seinen traurigen Höhepunkt gfundn hot. Drei Schüler hom behauptet, dass ICH (ois Lehrer) aungeblich gsogd hättat, dass der Michi (des sogenannte Mobbingopfer) a „woarme Drecksau“ is der es zu nix im Leben bringen wird.

Die Aussage und der Glaube, dass i persönlich sowos gegen eam gsogd hob (wos ned stimmt), hot eam den letzten Lebensmut geraubt, weshoib er den Suizidversuch unternommen hot.

Am Montog drauf is mi sei Papa augflong und hot si neama unter Kontrolle ghobt – verständlich! Nur i hob üwahaupt ned durchblickt. Noch an kurzen Wortwechsel mitn Michi woa die Sachlage klar, i bin söwa auf 180 gwen und hob mir die drei Schüler herghuit. Im Direktorenzimmer hommas zu Rede gestellt, olle drei woan geständig und ana hot no a sehr tiafe Mödung ausseghaut, warum er behauptet hot, dass i des gsogd hättat. Und er hot weiterhin vor meinen und den Augen vom Michi sein Papa den Michi bis aufs Tiafste gschimpft – daraufhin hob i eam a Watschn gem!

Des woa olles aundare ois pädagogisch wertvoll vo mir, olladings san mir do die Sicherungen durchgebrannt. Owa i kaun eich beruhigen, i hob eam weder wos brochn, Zähnt ausgschlong oda sunst irgendwos! Schmerzen hot er nochher a kane ghobt, weu i hob trotz ollem Rücksprache mit eam ghoitn – woa a notwendig.

Zum Kern meines Statements: Einige Personen sehng in diesem Blog einen Aufruf bzw. eine Verherrlichung für Gewalt gegen Kinder. Tuat ma Lad, owa wos rennt do foisch bei eich? I bin a friedlebender Mensch und GEGEN GEWALT! Des hob i meinen Schülern a immer mitgem und i hob olle Probleme in meinen Klassen mit Kommunikation aus dem Weg geräumt – desweng hots bei mir imma a Klassengemeinschaft gem, vo der die meisten nur geträumt hom! I woa a der sogenannte „Lehrersprecher“ (oiso der Vertreter der Lehrer im Schulgemeinschaftsausschuss) und somit a das Sprachrohr bei Problemen im Lehrkörper, und i (wir) hom alle Probleme immer nur durch Reden aus der Wöd gschofft. Egal obs jetza Mobbing, organisatorische Probleme etc… woan. Bis auf diesen an Vorfoi hob i ka anziges Moi die Haund oda sunst iagandwos gegen meine Schüler, Kollegen, Freunde etc… erhoben!

Übrigens woa da Mathias zu dem Zeitpunkt 16 Joahr oid, meines Erachtens nach kein Kind. Somit versteh i ned, wie ma auf Gewaltverherrlichung gegen KINDER kummt. Owa egal ob Kind, Jugendlich, Erwachsen oder Gebrechlich, ma suit generell ned hinhauen.

Deswegen empfind i des ois a bodenlose Frechheit, dass mi a boa Personen ois an gewaltverherrlichenden Tyrannen darstellen. Der bin i nämlich ned!

Und es is a gschrieben woan, dass der schlimmste Mobber sicher söwa schlimme Probleme ghobt hot und desweng so worden is. Do muas i Ihnen leider widersprechen,  i hobs nämlich hautnah mitbekommen, Sie nicht! Der besagte Haupttäter is des Kind vo zwa Anwälten, hot zu sein 17. Geburtstog an neichn Audi A5 bekumman, hot in da Schui imma mit sein sehr hochn Taschengeld geprahlt und davo, dass daham an eigenen Gärtner, Swimming-Pool, Teich etc… hom. Da i beide Elternteile kenn, kau i des a bestätigen. Und trotzdem hot er seinen ersten blauen Brief bekommen, weu er an Mitschüler a fettes Cut ins Gsicht ghaut hot. Den zweiten hot er griagt, weu er ana Klassenkameradin den Zopf vo den Haaren (de SEHR LAUNG woan) obgschnitten und ausm Fenster gworfen hot. Und da dritte woa wegen dem Mobben. Er hättat scho 3moi vo da Schui fliang kennan, owa sei Klassenvorstaund wuitat des verhindern und hot hundert zweite Chancen vergeben. Ich nicht!

Und jo, seine Ötan hom si immer Zeit gnumman fia eam. Während den Ferien sans immer auf exklusive Urlaubsreisen gflong (Seychellen & Co.) und er is a unter der Schule oft freigestellt wordn, weus an Kurzurlaub gmocht hom.

Schlussendlich hom a boa Leid aufgschrian, weu i gschrieben hob, dass i mei Verhalten nicht bereue. Jo, tuat ma Lad, i bin hoit a ned perfekt und hob Fehler. Was ned, ob des bei Ihnen aundas is und Sie die Perfektion im Menschenkörper san. Wenn jo: Herzlichen Glückwunsch!

Der überwiegende Großteil der Leser hot verstaundn, dass mein Blog KEIN AUFRUF ZUR GEWALT war! Owa a boa Fische taunzn hoit immer aus der Reihe und des is a total legitim. Des gibt hoit daun Konflikte und Konflikte san zum Lösen da – des würd i gerne mit diesem Statement erreichen.

I bin a Mensch, der si ka Blatt vor den Mund nimmt und vo seiner Meinungsfreiheit Gebrauch nimmt. Leider erregt des bei einigen Leuten a wengl an Speibfaktor. Desweng wia i in nächster Zeit gaunz genau aufpassn, wos i schreib.

Einige Leid hom a gschriem, dass i eine Vorbildrolle inne hab, weu mir sehr vüle Fans auf Facebook & Co. folgen. Tut mir Leid, owa des is eure Sicht. I persönlich siech mi ned ois Vorbild, i bin so wie ich bin. I hob meine Föhler und des is guat so, weu sie mochn mi zu mich selbst.

Jeder Mensch sucht sich selbst aus in welche Rolle er schlüpft!

Desweng stimm i eich in dem Punkt mit der Vorbildrolle NICHT zu.

Und trotzdem möchte i folgendes erwähnen wos i a meinen Schülern und ollen aundan Menschen mitgebe:

Gewalt ist KEINE Lösung! Die beste und effektivste Waffe sind ruhige Worte! Gebt eurem Gegenüber keine Angriffsfläche und macht euch nicht selbst das Leben schwer, es bringt sich nichts!

A punkto Notwehr finde ich, dass Gewalt ned der beste Ausweg is. Am besten is, wenn ma bei suichen Konflikten wo Gewalt ins Spiel kummt, sich afoch umdreht und wegrennt!

Jeder vermiedener Kampf ist ein gewonnener Kampf!

Wer meine vorherigen Blogs gelesen hot, der suitat wissen, dass i a friedlebender Mensch bin, der glücklich durchs Leben geht und am glicklichsten is, wenn sei Umfeld genauso happy is. I schreib jeden Tog auf Facebook mit unzöhligen Menschen de mir ihre Probleme anvertrauen, und de san ned harmlos. I nimm ma fia jeden Anzelnen Zeit um zuzuhören und mit Rat und Tat zur Seite zu stehen.

Somit bitte ich euch, dass ihr ned glei wegen einer Aktion in an Blog a komplett falsches Büd vo mir ausmoits und des so in die Wöt hinaustrogts. Des find i nämlich ned OK. Danke!

I persönlich finds hoit nur sehr schade, dass sich bei mein Blog ois nur um die Aktion mit da Watschn draht hot und die Hauptperson selbst, da Michi, total in den Hintergrund geraten is. A trauriges Beispiel, dass dem Täter und anderen Personen mehr Aufmerksamkeit zuteil kummt, ois demjenigen der sie am meisten braucht – nämlich des Opfer!

I hoff, dass i mit dem Statement a wengl Klarheit in des Gaunze brocht hob und warad daunkboa, wenn ma dieses Kriegsbeil wieder mit Erde zuschütten könnten, damits neama des Tageslicht erblickt und wir uns olle lieb hobn können.

Danke!