I hoit mi bewusst aus politischen Themen ausse - weu i die Politik generell unfähig find, egal welche Foarb die Partei hot. Wenns jedoch um die Menschlichkeit geht, daun is es teuweise echt schwer, dass i mei Pappm hoit. Und des is jetza noch dem mehr ois tragischen Vorfall in Graz der Fall. Es is schwer die Pappm zu hoitn, desweng reiß is jetza auf!
A gewisse Person, dessen Name ich aufgrund meines ersten Satzes ned nennen mag, owa die meisten werden sicha wissen wenn i man, hot den Vorfoi - meiner Meinung noch offensichtlich - politisch instrumentalisiert und zu seinen Vorteilen genutzt. Blöderweise gibts hoit genug damische Fisch de sofort in de Angel einebeißn und jubelnd mitschreien.
Es is SCHEISSEGAL welche Nation diese Kreatur (i red vom Täter und sog bewusst ned Mensch, weu sei Tat is unter aller Sau!) woa - diese Tat vo eam is afoch unbeschreiblich schrecklich. Jemanden das Leben zu nehmen is es schlimmste wos ma nur tun kau! Es zarreisst ma wirklich es Herz wenn i drau denk, dass do so vü Menschen betroffen san - aktiv als auch passiv (Angehörige). Egal ob Österreicher, Bosnier, Russe, Chinese oder Eskimo - die Tat is des wos ma zu beklagen hot, ned die Herkunft hot.
"Eh kloa, a Ausländer, woa jo logisch, nur de baun scheiße!" - Stichwort Hitler, Fritzl, Priklopil, Unterweger, Fuchs. Kennts eich aus? Soviel dazu.
Schön, die Medien hom berichtet, dass der Täter a Bosnier woa. De gewisse Person hot des sofort aufgegriffen und fia sei Werbung missbraucht. Politisch gesehen a kluger Schachzug. Menschlich gesehen unter aller Sau! Des is meine Meinung und es is mir scheißegal wos ihr dazua sogts! Wenn des eure Angehörigen waradn de do getötet bzw. lebensgefährlich verletzt woan wären - hättats ihr ehrlich gsogd Lust, dass ihr so a politisches Statement lests? I ned! Mir warad vü liawa, wenn do Beileids- und Kraftwünsche kumman. Des braucht ma nämlich vü mehr. Und ned fia Werbung missbraucht wird.
Heite is auf seiner Seite a Klarstellung zu dem gaunzn gekommen. Anstott dass de Person schreibt, dass er leider pietätlos gehandelt hat, es ein Fehler woa und sich dafür ENTSCHULDIGT, deutet er mitn Finger auf andere und sogt "DE HOM DES GSCHRIEM UND DE DES UND DE WIEDERUM DES UND DE HOM NO DES ERWÄHNT UND DES OIS HOB NUR I ZITIERT, WEU I AUF DIE PRESSE VERTRAUT HOB"
Oida kumm, a afoches "ENTSCHULDIGUNG, DES WOA SCHEISSE VO MIR" hätt scho greicht!!!! Sowos tuat ma afoch ned politisch instrumentalisieren! Und wegen dem san a ned auf amoi olle Bosnier bzw. Österreicher mit Migrationshintergrund die Übeltäter. Siehe obrige Erwähnung mit Hitler & Co!
I bin wirklich auf 180 weu mi des so aufregt. Des geht afoch goaned, dass ma sowos tuat. Und daun kummt ned amoi a Entschuldigung. I bin so haß, dass i mi scho mehr oder weniger wiederhole, mei Schädl is üwahaupt ned klar weu ois vor Zorn raucht.
Jedenfalls mechat i no folgendes an diejenigen richten, de mi dafia jetza verteufeln wollen und meinen, dass de Person jo eh total recht hot: I bin söwa a Österreicher mit Migrationshintergrund, i bin mehr als froh in diesem schönen Laund zu leben. Owa genauso stolz bin i auf mei Mutterland Ungarn und die damit verbundene Abstammung. Wer oiso da Meinung is, dass de Ausländer schuid drau san und a Österreicher des nie gmocht hot und der besagte Politiker recht hot - entfernts mi bitte vo eichra Freindschoftsliste, blockierts mi auf Facebook und schauts mi nie wieder au! Bei sowos fühl i mi nämlich daun a persönlich angegriffen! Wie gsogd, die Herkunft sogt üwa so a Wahnsinnstat nix aus - zumindest in diesem Fall und i hoff, dass ma do jeder zustimmen wird.
Und zuletzt no kurze Worte an den Täter, obwuih er des eh nie lesen wird: Du bist des Allerletzte! I wünsch da, dass du ned in a Nervenklinik kummst (so wie is im Radio gheat hob - a Frechheit!), sundan lebenslang hinter Gitter kummst - do gheast nämlich hin!
I schließe diesen Beitrag mit meinen tiefsten und aufrichtigsten Beileid aun die Angehörigen der Opfer. Es is unbeschreiblich schlimm wos ihr zurzeit mitmachen müssts und i kau wirklich ned die richtigen Worte finden. Es tuat mir afoch nur unendlich Leid und i wünsch eich alle Kraft der Welt und so viel Unterstützung wie ihr nur finden kennts. Es is afoch grausam. Den Verletzten wünsch i beste und schnellste Besserung. I würd gern so viel mehr song, owa mir fehlen afoch die Worte.
Eigantlich wuitat i zu dem Vorfoi nix song, weu i eben ned die richtigen Worte dafür finde. Owa gewisse Ereignisse hom jetza des Fassl afoch zum Übergehen brocht. Es is wirklich schlimm wenn ma siecht zu wos die Spezies Mensch fähig is.
