A heikles Thema bei uns in Österreich. Wennst wos üwa die Toleranz sogst, daun bist entweder a linksextremistischer Fetischist oder a blauer Schlumpf. Meistens natialich auch a Nazi, eh kloa. Je nochdem ob ma si positiv oder negativ üwa die Toleranz äußert.

I bin a sehr toleranter Mensch, bin bis zu mein 4. Lebensjoahr in Ungarn aufgwochsn, daun noch Wien zur Famülie vo mein Voda "geflüchtet" (eiserner Vorhang und so) und hob innerhoib vo a boa Joahr 3 neiche Sprochn lernan miasn - Deutsch, Englisch und unsre schene Mundoat. Gaunz ehrlich, darad ma mir des ausehng? ;)

Toleranz bedeutet, dass ma si gegenseitig respektiert. Egal weche Hautforb, Religion, Nationalität, Kultur etc... du host. Und des moch i ah. I behaundl a Frau mit Kopftuch genau so wie a Frau ohne Kopftuch. An oidn Mau biet i mein Sitzplotz au, egal ob er jetza Weanarisch, Stoasteirisch oda Türkisch spricht. Mensch = Mensch! Wichtige Matheformel, ned vagessn!

Vorher bin i olladings vo 3 hoibstorkn Jugendlichen in da U-Bahn (hob heit frei) "belästigt" woan. Ungefähr 16 Joahr oid. Zuerst homs mi nur augschaut, glocht und gschimpft. So Sochn wie "Kurva" vasteht jeda, "Bazmeg" is sogoa ungarisch und des is jo mei Muttersproch.

Danoch hot ana den aundaren gsteßn, sodass er auf mi draufgflong is. Instinktiv hob i moi aufd Hosentoschn griffn und somit mei Handy und Gödtaschl "beschützt". Do schreit mi derjenige auf amoi au, schimpft mi aus Tiafste, tritt mi beim Schienba und deit ma a Watschn au.

ZACK

So schnö hot a ned schaun kenna, do hot er ane vo mir kassiert. Nenn mas Selbstverteidigung oder sunst wos, jednfois loss i ma des ned gfoin, wenn ma oid gnua zum Aufmukken is, daun is ma oid gnua zum Eisteckn.

Rotets moi wer daun zum Plärrn augfaunga hot (es woa ka leichte Watschn), wer mir mit da Polizei droht und mi "ausländerfeindlich" gschimpft hot? Richtig, genau de hoibstorke Gurkn! Sogoa die aundaren Passanten in da U-Bauhn san mi augaungan, auf amoi woa i da Schuidige!?

Bin daun bei da nächstn Station ausse, hob ka Lust ghobt eventuell vo da Exekutive referieren zu diafn. Wos rennt do schief? Warum belästigt ma grundlos fremde Leid? Warum bist du da Deppate wennst di wehrst? Warum suit i ma sowos gfoin lossn? I hob eana üwahaupt nix tau!

Erklärts ma des bitte. Und kummts ma jetza jo ned mit Parteien! Und natialich san ned olle so, sundan nur a (zum Glick) klana Prozentanteil.

Da Fraunz zählt mit mehr als 135.000 Facebook-Fans zu Österreichs berühmtesten Facebookerianern. Auf Zuckerbergs Plattform gilt er schon lange als Superstar. Da Fraunz schreibt nur in der Mundart und bloggt unter einem Pseudonym, niemand kennt die wahre Identität des Mannes. Profil ansehen