Am 28.06.2015 hob i mi vo London aufn Weg noch Trabzon gmocht. Via Istanbul bin i daun endlich gegen Mitternacht, oiso am nächsten Tag, duatn aukumman. Mei ehemaliger Studienkollege hot mi obghuit und i hob bei eam wohnen diafn. Der hot an wunderschönen Lebenslauf. Wuitat Lehrer werden, desweng hob i eam domois auf da Uni kennanglernt, hot si fia wos aundares entschieden und is mittlerweile Pilot für Turkish Airlines. A ned schlecht. Und glaubts mas, der Hund verdient vadaummt guat! Do wia sogoa i neidisch, und des wia i sötn. Schene Griaß aunan Michlmayr, i sog nur Led Zeppelin Konzert. Suche den Mittelfinger :-P
I hob bei eam im Gästezimmer übernachtet und am Balkon an wunderschönen Blick auf den Hafen vo Trabzon und des damit verbundene Meer genossen. Es woa herrlich! Die Stodt hot er ma a zagt, leider ned die Umgebung, weu de suitat aungeblich sehr schön sei. Owa jo, wir scheißn hoit ka Zeit wie ma so sche sogt. Schod eigantlich, warad sinnvoller ois.....egal, loss ma des Thema.
Heite am Vormittog woa Abschied nehmen angesagt. Er hot sowieso wieder Dienst ghobt und i wuitat mei Rundreise richtig starten. Es is vo Trabzon noch Rize (ned zweideutig und kindisch werden meine Herren der Schöpfung!) gaungan. Wie? Tjo, i hob zwa gsunde (eigantlich ned, owa wurscht) Fiaß. Ois aundare is a Glück und ergibt si vo söbst bzw. daun wenn ma a wengl nochhüft.
Noch 10km Fußmarsch hob i zum Autostoppen augfaungt, i woa nämlich immer aun da Küste unterwegs. Noch a boa Minuten hot a LKW Foahra aus Bulgarien mi eigfosst. A lässiger Typ, er hot sogoa Ungarisch gsprochen, weshoib i mit eam kommunizieren hob kennan. Olladings a sehr komischer Dialekt, i glaub den hot er söwa gfundn. Maunche Wörter wuit er glauwi ned song. Kau a fataler Fehler im Ungarischen sei, wennst do wos foisch aussprichst kau dei lieb gemeintes Lob auf amoi die ärgste Beschimpfung bis aufs Bluat sei. Jo, ich liebe meine Muttersprache :)
I hob an sehr großen Durst und natürlich genug Wasser dabei ghobt. ABER: Es is grod Ramadan. Des kummt ois aundare ois guat, wennst in da Öffentlichkeit genüsslich saufst und isst, während die Gläubigen bis Sonnenuntergang woatn miasn. Und weu i aundare Kulturen in an fremden Land respektiere, hob i do a nix trunken. Owa im LKW woas daun scho ollahechste Zeit.
(Dialog netterweise auf deitsch übersetzt, außerdem hob i ka ungarische Tastatur)
I: „Bist du Moslem?“
Er: „Nein, du?“
I: „Nein.“
Beide homma gleichzeitig gnickt, gleichzeitig wohin griffen (i hob gsogd ihr suits ned zweideutig denken!! Michl, reiß di zaum!) und a Wasserflasche hervorzaubert. Wir hom uns augschaut und zum Lochn aufaungan miasn. Des woa ois aundare ois ausgmocht. Hob i richtig lustig gfundn und wir hom unseren Durst gestillt.
Vor ungefähr 3 Stunden bin i daun in meiner Unterkunft in Rize aukumman. A schlichtes Hotel mit Dach übern Kopf, Bett und Bad im Zimmer. Mehr brauch i ned. Iagandwaun wia i moi mei Zöt aufstön und in da Natur schlofn miasn. Owa am Aufaung loss i ma den Komfort vor Ort no a wengl zu Gute kumman. Außerdem wirkt des a wengl bled, wenn i in ana Stadt am Hauptplotz a Zöt aufbau und drinnan schlof. Is nur so a Vermutung.
Wos sui i zur Stodt song? Hmmm......fad! Normale Stodt hoit, nix besonderes, so ähnlich wie Stockerau. Wennst ned duat woast, host a nix verpasst.
Morgen gehts weida noch Artvin - a Stodt im Gebirge aun da Nähe zur Grenze vo Georgien. I hob keine Ahnung waun i duatn aukumm. Es san 180 Kilometer und zu Fuaß wia i 2 Tog duathin brauchn. I prowias wieda mit LKW stoppen, eppa hob i Glick. Wenn ned - scheiß drauf, hikumman tua i sowieso. Stress hob i ned, so jung wie jetza kumm i nie wieder duat hi.
Und jo, in dera Unterkunft wo i bin gibts WLAN und a Computer Terminal, sunst darad i jetza ned diesen Blog schreiben, weu am Handy is ma des afoch zu kompliziert.
Bis iagandwaun moi, keine Ahnung waun des is. Eppa erst Ende des Monats, wie es sich hoit ergibt. I wünsch eich jedenfois an schönen Abend und a schene Wochn, hob jo gheat, dass es Wetter daham traumhoft werden sui. Desweng no schene Griaß aun meine Kollegen auf da Baustö. I hoff ihr hobts nix mit an Blech zum Tuan ;)
