Kurze Auntwort: Billig :)

Spaß beiseite.

I hoit eigantlich generell ned vü, vo dera Art de maunche Leid im Dezember aun den Tog leng. Die greßtn Oaschlecha wean auf amoi schasfreindlich und kaum san die letzten Feiertog im Jänner vorbei, werdns wieda zu de Oaschlecha des no Ende November woan. Is jetza nur a grobes Beispü und natialich ned fia die Allgemeinheit bezong, owa i hoff ihr wissts wos i damit song wü.

Dadurch, dass i Single bin und kane Kinder hob (zumindest wissat i nix davo), bleibt ma einiges zu Weihnochten erspoart. Es hot scho Dezember gem wo zeitweise richtig depressiv woan bin, weu i üwaroi die glicklichen Kinder mit eanare glicklichen (und gestressten) Kinder gsehng hob. Glaubts mas, i hob ma nix sehnlicher gwunschn ois a eigane Famülie. Owa nochdem mi mei laungjährige Freindin beschissn hot, is mei Vertrauen ind Frauenwöd zaumbrochn. Seitdem wü i ka Beziehung mehr und hob mein Spaß indem i a boa Gspusis hob. Vo ana Ehe wü i goaned aufaungan, des is nix fia mi. Vor ollem mit 52 Joahr, der Zug is obgfoahrn.

Egal, i schweif vom Thema ob.

Trotzdem leb i den Ursprungsgedanken vo Weihnochten: I vabring Zeit mit den Menschen de mir am Liebsten san.

Vor Weihnochten bin i oft auf den Adventmärkten untawegs und triff mi mit bekaunnte Gsichta damit ma a boa Glasln hem (schene Griaß aunan Häupl). Natialich mochst a Besuche bei deinen Freinden, komischerweise hom im Dezember olle Leid vü mehr Zeit ois im restlichen Joahr. Seis drum, i hob nix dageng.

Am 24.12. geh i a no kurz unta die Leid und so gegn 3 Nochmittog begib i mi daun zu meina Famülie. Do tuan ma daun gemeinsaum kochn. Noch spädastns 10 Minutn haut mi die Mama aus da Kuchl ausse, sunst brauch ma die Feiawehr. Daun begib i mi zu mein Voda, der is nämlich davor scho ausseghaut woan und tuat den Christbam aufputzn. Wenn ma fertig san, kummt die Mama eina und scheißt uns zaum, weu die Farben vom Christbam ned zaumpassn und die Dekoration aundas vateut gheat – oiso wean ma a do ausseghaut und gengan in Winergoatn ausse. Do schaun ma daun, dass die Raumtemperatur passt, Kachlofn hatz ma ei, Tisch wird gedeckt und danoch gibt’s Bescherung.

Nix pompöses, afoch nur a klane Andacht (keine Gebete!) vorm Christbam mit musikalischer Untermolung. Danoch gibt’s Bussis und Umormungen und die Geschenke wean auspockt. Aunschließend gibt’s es Festessen mit a boa guadn Weinfloschn.

Oiso so ziemlich wie bei jedem Otto Normalverbraucher, nur dass i mit 52 Joahr no mit meinen Ötan feier. Na und? Fia des wiad ma nie zu oid, i bin glicklich, dass i meine Ötan no hob und dass eana guat geht. Solaung ma si olle hom, solaung wean ma a Weihnochten gemeinsaum vabringan.

Am 25.12. foahr i daun zu mein bestn Freind, den sei Bua is sozusong mei Ziehsohn. Auf den hob i imma aufpasst seit er a Windlscheißer woa. Der griagt natialich immer a Geschenk vo mir, ob a wü oda ned. Es kumman a no aundare Freind vo friacha vorbei.

Der Besuch endet meistens mit an Besäufnis und Schädlweh am nächsten Tog. Zum Glick is des immer a Feiertog und i muas ned hackln, sunst warads a wengl Oarsch.

Oiso, a Single wia i feiert des beliebteste Familienfest (Weihnachten) ned wirklich aundast ois olle aundan Leid (de i kenn), bis auf des, dass er vü weniger Göd ausgibt und ned so an heftigen Eikaufsstress hot. F**k the system :)

Da Fraunz zählt mit mehr als 135.000 Facebook-Fans zu Österreichs berühmtesten Facebookerianern. Auf Zuckerbergs Plattform gilt er schon lange als Superstar. Da Fraunz schreibt nur in der Mundart und bloggt unter einem Pseudonym, niemand kennt die wahre Identität des Mannes. Profil ansehen

Auch Du kannst Teil unserer Community werden und so Kontakt zu Journalisten, Prominenten und anderen Usern aufnehmen. Registrier dich kostenlos und begeistere unsere Community mit deinen Kommentaren oder eigenen Blogpostings. Registrier dich hier und hab Spaß!