Schwierig wie ma mit sowos aufaungt, wenn mas des erste moi mocht. Hätt jz nie denkt das i amoi an blog schreib, hob owa de gaunzen Blogs vom Fraunz glesn, und iagendwaun denkst da warum eigentli ned, schoden kauns ned. Ans vorweg, i werd des gaunze in da mundoat schreiben, wer wos ned vasteht kaun mi jo frogn :) und a mit groß und kleinschreibung werd is ned imma so genau hoidn. so schreibts ses fi mia leichta und schnölla.

Guad, hot ma se moi entschieden das ma an blog mocht, braucht ma a thema. i hob mi jz amoi fia de zeit meines leben vo ~12 bis ~18-19 entschieden. Vü erlebt, vü mitgmocht und des (mittlaweile fia mi des wichtigste) vü glernt. Ois woa dabei, de erste freindn, alkohol/ziagretten, schui obbrochen, rauschgschichten, und so weida. Owa ans nochn aundan, is vü zum dazöhn, drum wiad a ned ois in an blog einepassn.

I faung amoi mitn Thema schui aun. I bin aus an klan deafe in NÖ, genaueres is unwichtig. Voikschui guad umebrocht, und a in da hauptschui hob i ma in da ersten ned wiakli schwa dau. Hob nie wos glernt und hob mit erfolg ogschlossen. In da zweiten is daun scho a weng aundast woan. Bin mehr und mehr a faule sau gwesn, de aufgob is ned imma daham gmocht woan, sondern hot ma in da frua a moi ogschrieben. Ins rauka haum a a boa augfaungt, i a, aun tschick bist nu leicht kuma, ban automaten host nu ka koaten braucht. Bist depad woama cool. Owa schlussendlich hob i a de zweite klass brav zu gschafft, de mama hot se üwa erfolg gfreit, a zeignisgöd springa lossn, und i hob mi a gfreit.

In da dritten woa de wöt daun schowida a weng aundasda. Wie in woascheinli jeda schui haum se a boa gruppen gebildet. Wir woan natirli de coolen. Zumindest hauma des glaubt. Ob und zua moi gstangelt, in da mittogspause iagendwo hi geh ane rauka, und aufgob san fost imma in da schui gmocht woan...fia wos a daham, haum jo ka zeit khobt, haum uns liawa wo troffn und iagendan schas aufgfiat. so is daun amoi kuma, das in mathe amoi a 5er daher kuma is. do woan daun meine ötan a nimma so leiwaund, des hot erna ned daugt. haums amoi mit da lehrerin telefoniert, daun mit mia a poa moi gredt. schluss endlich hots hikaut, dritte klass gschafft, mathe woa hoit nua a 4ra, de aundan fächer gmischt mit noten vo 1 bis 3.

Im sommer zwischen 3ter und 4ter klass hauma daun an haufn bledsinn aufgfiat. Olle zaumgredt, dea schloft ba dem, dea ba dem, mit unsare mentscha zaumgredt, zum zötln troffn, und an gscheiden in de birn khaut. da erste voirausch bist depad. 13 joa woama olle, i find des is fria gnua. ollas hauma gsoffn, an wein, koan hota gschmeckt, olle hots greckt, owa gsoffn hauman, woa jo cool. und wea gaunz vü masn khobt hot, is daun a mit an vo unsare mädls gaunga, de woan daun natürlich de chefs wie d'schui wida los gaunga is im september. De aus de untan klassen haum gschaut wia de maurer wauns blitzt, de lehrer haum nua grinst.

Guad, in da 4ten is uns daun noch da reih kloa woan, he wia woin olle in da schui weida geh, wia soitn wos duan. So hob i mi in da schui wida a bissl mehr augstrengt, vaoim in mathe, wei da bua woit in a HTL geh. semesterzeignis hot guad augschaut, und aun de HTL gschickt. de nehman im joa 64 schüler auf, ma griagt daun an brief wo steht aun wöcha stelle ma is, ois unta 64 is guad, des hast du bist so guad wie drin, aussa du haust da dei joareszeignis nu komplett zaum. ende ferbuar woas soweit, da briaf is kuma, aufgrissen, nummer 28, haxn ausgfreit. Zwa freind aus da hauptschui woitn a auf de schui, haums a gschofft. lässig. Da rest vom schuijoa woa daun eher unspektaklär. De Noten haum khoidn, olle haum de klass gschofft, jeda hot auf de schui kina wo a hi woit. wia haum a obschlussfeier organisert, woa a muadsdrum gaudi,iwa haum echt a guade klassengemeinschoft khobt. Des woa so de zeit in da hauptschui.

I woas, da ane oda aundare denkt se sicha, najo is jo ned vü passiert. Mir san a währenden schreiben a haufa aundare sochen eigfoin, und de gschicht und de gschicht. Owa mia is liawa i schreib des in eigene blogs. fois eich wos bsundas interessiert kennts es sogn, daun kaun i wos nua üwa des schreiben.

fias erste woas des amoi. bis zum nächsten moi