In mein Blog htl zeit kennst lesen das i mi vo Schui weg, und für a lehre entschieden hob. Lehrzeit 3,5 joa, davo 35 wochen berufsschui. Auslandspraktikum hob i a khobt, und i werd auf ois a bissl eigeh.

Oiso, 1.9.2008, mei erster tog ois lehrling. I woa scho gspaunt, wi san de kollegen, wos hob i zum duan, und so weida und so weida. Mei lehrlingsausbüdna hot ma aum ersten tog amoi ois dazöht, wie wird des gaunz aurenna. Plan is i beweg in de 3,5 joa durch de IT-internen abteilungen. support, helpdesk und server. des letzte hoiwe joa deaf i ma daun aussuachen. Augfaungt hob i im Support, des hot mi aum aunfaung a aum meisten interessiert. De Kollegen woan olle nett, haum glei gsogt waun i iagendwos brauch soi i afoch frogn se höfn ma gern. Des hot a super funktioniert. De ersten 2 monat woan sche zum eigwehna, i hob amoi de leichtan aufgoben gmocht, und bin daun noch und noch zu de schwaran sochn zu gführt woan. Zerst mit hüfe, und daun immer mehr söbstständig. des wos i in da htl glernt hob, hot ma scho a khoifn, nua ois hob i ned braucht in da oawat. Wos mi bsundas gfreit hot, i hob daun de aufgob griagt das i de termine mitn externen techniker koordinieren deaf, oiso wenn wo a laptop, pc oder drucker hi is, wird des vo mir aufgnumma, i hob des genaue problem festgstöht und daun ois mitn techniker ausgmocht. wie der kuma is, hota ois hergricht, und i hob daun a unterschrieben dasa do woa und das ois passt. Heat se jz ned so wüd au, owa i woa 17 joa, und hob 3 monat goawat bis jz. woa wos besonderes fia mi, weil des woa mei verantwortung. Hob do daun a imma a lob griagt vo mein chef. Iagendwaun is daun a de erste klass berufsschui kuma. De bs woa ned so weit weg vo mein heimatort i bin owa trotzdem ins internat gaunga. I woa hoit wida a bissl faul, hob des gaunze owa mit guten erfolg ogschlossen. Des Internat hot mi hoit mächtig gstört. I was de aufsichtspersonen haum a verantwortung, junge leid baun an bledsinn, es gibt regeln und de soit ma eihoidn. owa wenn i vo 7:15 bis 16:45 unterricht hob, mit 1 stund mittogdpause, daun obendessen (des wos üwa is, wei de meisten um 16 uhr aus haum, und um 16:15 faungt des essen au), daun gfreits mi ned das i vo 17:45 bis 18:45 in da sogenannten lernstund wida lern. Do brauch i moi mei rua. des hot denan ned daugt, i bin hoit daun imma mit kopfhörer und laptop im bett gessen und hob wos aundas ois lerna, owa leise. haum imma gsogt in da lernstund wiad glernt. do woans sehr konservativ. owa mit a boa tricks wia a zweites fenster mit schuizeig offen haum, a boa zetteln nebn dia hilegn, und sowos hauma weida unsa rua khobt. Jo des woa so de erste klass, hob owa gwusst in da zweiten bin i daun nimma im internat.

Zweites joa lehrzeit, wechsel in den helpdesk. oiso first level support, vü telefonieren, vü koordinieren. woa a interessant. Es woa daun owa leida so das aufgrund vo da wirtschoftskrise und kurzarbeit leit im helpdesk braucht woan san, und do haums daun mi duatlossen, bin oiso daun 2 joa im helpdesk gwesn. mei teamleiterin woa a weng anstrengend und eigl a oame sau. ana vo unsare chefs is a bissl a oasch gwesn. dea hot afoch a unguade oat khobt. und sie hot se vo dem und a boa aundare imma aum schäl scheissen lossn. do hots daun a scho moi bleat, najo wos soist mochn. se hot so do a ned höfn lossn, do hauma vü gredt, gändert hot se nix. zweite klass berufsschui is daun a wida dahea kuma. desmoi woa i extern bin oiso imma hin und her gfoan. 20 minuten a strecken, hob jo mittlaweile a auto khobt. ka problem. wos i ba meine zeit in da berufschui hevoa hebn mecht, is das meine lehrer echt klasse typ woan. de haum olle a prinzip ban unterricht vafoigt: de stund dauert 50 minuten. wenns 40 minuten mit dats, hauma de letzten 10 minuten a gaudi. des hauma schnö üwarissen, ned olle, owa de meisten. hot supa funktioniert. an lehrer hauma khobt dea woa in da ersten a bissl a oasch und a ungustl. in da zweiten hauma daun gwusst warum. dea hot se sein respekt vaschofft und kloa gstöht er spüt de musi. mit dem hauma in da zweiten, dritten und vierten de greßte gaudi khobt. lässiga hund woa des. und wos daun in da zweiten a passiert is zwecks lerna: mia is irgendwie da knopf aufgaunga. i hob ma söwa des zü gsetzt i wü an ausgzeichneten erfoig haum. und fia den hob i a glernt. des hob i vorher nu nie so khobt, is schwa zum beschreiben. des is wie a innara schoita. jedenfois is des zeignis daun sehr guad ausgfoin, hob genau an zwara khobt, sunst ansa. In meina firma haum sa se olle gfreit, weil de einstellung vo da BS hob i daun a int arbeit mitgnumma. I woa wiakli verändert, owa sehr zum positiven, und hob des a vo vü kollegen gsogt griagt. des hot mia söwa a voi daugt, und wos do glernt hob: waunst wos erreichen und annerkennung haum wüst: dua wos dafia!

In mein dritten lehrjoa, bin i daun im oktober fia a monat in england gwesn, auslaundspraktikum. Mit 11 aundare junge leid aus österreich, hauma 3 wg's khobt, jeda is in da frua int hockn gfoan, und aum obend hauma meistens kocht, und wos biaschtlt. do hob i daun a mei liebe zum cider entdeckt, dringa i seitdem gern des zeig :D ausflüge noch clastonbury, brighton und london hauma a gmocht, imma ois söwa organisiert. woa richtig cool. Wia i daun wida daham woa gaunz normal in de oawat fia 2 wochen, wei daun is de berufschui los gaunga. dritte klass, mein schwung vo da zweiten hob i mitgnumma, und noch zehn wochn wida a supa zeignis khobt. daun is ma leida a unfoi passiert, ban kickn hob i ma des kreizbandl und in meniskus im rechtn knia grissen. aum tog da valetzung nu söwa hamgfoan, woa leicht gschwoin. aum nexten tog daun bist du depad. a knia wia a luftballon, kam ausn bett kuma wos ned leiwaund woa, wei i was jz nu das i aufs heisl miassn hob wia a postross. do woa i daun drei wochn im staund, im heer hob is a gmödt wei i jo scho gmustert woa. hob daun fia august 2012 a nochmusterung griagt. des restliche dritte lehrjoa is ohne recht vü umme gaunga.

Des vierte lehrjoa woa daun nuamoi a hoibs. 5 wochen berufsschui, woa a leiwaund, hauma lässig projekt gmocht wost des gaunze wissen wost drei joa laung glernt host eisetzn muasst. hauma an ansa drauf griagt, woama stoiz. daun olle fia de LAP oiso fia de lehrobschlussprüfung amöden, und wia san daun a olle zum söben termin drau kuma. de hob i a nu it auszeichnung gschofft, wobei des teuweis a bissl a vahau is, vaoim des theoretische. do kenans di nemli wiakli ois frogn, ned nua wos fachbezogenes, sondan a sochn aus deitsch oda politische bildung. find i a weng sinnfrei, owa wos soist mochn. so is passiert das i mit 31.3.2012 ausglernt woa. lässig, ogschlossene ausbüdung. mia haums daun a gsogt i kaun in da firma bleiben, hob des a voerst amoi augnumma. Fia mi is woa scho festgstaunden i ziag daun noch wien, gründ mit an freind a wg, und suach ma in wien a hockn. So is de zeit bis august vagaunga, daun woa da 25. august. nochmusterung. mei knia woa mittlaweule operiert. bast tauglich, mit 1.9.2012 wird eingrückt. oiso a gaunze wochn nu zeit. najo, bissl kurzfristig. owa i woits so schnö wia möglich umebrocht haum, drum hot des scho passt. Owa fias bundesheer brauch i an extra blog, des is vü zum dazöhn, und des is a schowida a gscheits gschichtl.

Danke fias lesn, bis zum nexten moi. pfiat eich