In mein ersten blog hob i a bissal wos vo meina hauptschuizeit dazöh, mia mocht des schreiben grod sovü spaß, das i glei weida schriebn und eich vo meina zeit in da HTL und wies weidagaunga is dazöhn mecht.
Wie scho gsogt bin i noch da hauptschui in a HTL weida gaunga. in gaunzn sommer scho drauf gfreit, de fächer des host haum se olle so interessant aukheat, wie werden de neichn klassenkollegen sei. woa ois fuachtboa aufregend. guad, erster schuitog, voi interessiert gwesn, ois cool. de ersten wochen hob i so weida dau wie in da hauptschui. nua des is in da HTL massiv schief gaunga. de ersten tests woan glei amoi olle negativ. hob i schnö gmerkt das des gaunz a aundare wöt is. I woa domois hoit afoch faul, computer spün oda mit freind wos mochn woa hoit imma leiwaunder ois lerna. meine ötan haum vü probiat, owa i hob hoit imma brav gsogt i hob eh scho glernt. im semesterzeigniss woan hoit daun 3 fetzn, 1 hob i nu ausbessern kina bis zum joaresend. zwa nochprüfungen, mathe und programmieren. mei klassenvorstaund hot ma scho gsogt i muas beide schoffn, es gibt zwar so a klausl dast mit an 5er weida deafst, owa de gebns ma ned. guad nochprüfung programmieren, ned gschofft danke. de in mathe hob i glei goaned gmocht. des hot meina mama ned daugt, i hob ia owa erklärt, i sitz mi do ned zwa stund hi, und quäl mi durch de prüfung de ma eh nix bringt. üwa des hauma laung gredt, owa schlussendlich hots mi vastaunden. So is passiert das i de erste klass HTL numoi gmocht hob. Hätt nie glaubt das i amoi a klass wiedahoin muas.
So is daun passiert, de neicha klass woa a wahnsinn. 2 vo meine engsten freind hob i in dea klass gfunden, olle 32 hansln wia ma woan (wia haum ka madl khobt) haum zaumkhoidn wia pech und schwefel. waun se ane moi wo schwa dau hot, hot erm a aundare khoifn. des woa echt super. de noten woan des joa daun ba mia a guad, trotzdem hot da papa so im november moi augfaunt: "bua, i was dia du bist jz gaud in da schui, und wia untasützen di wos geht, owa deng a moi noch ob ned a lehr a wos fia di wa". na bumm hob i ma denkt. owa i hob daun nochdocht, und ma afoch amoi auschaut wost ba mir in da umgebung Informationstechnologe/Technik (jo so hast der beruf) lerna kaunst. Hob i a firma gfunden, de i so a scho kennt hob, in neiderösterreich auf jeden foi ane der größten firmen, i glaub sogoa ane der größten de ma in gaunz österreich haum, und sehr international.
do muas i a kurzes rätsel fian fraunz eibaun: De produkte vo da firma san blau gelb und du kennst des auf jeden foi, und host des sicha scho öfters in da haung khobt, vaoim ban hackln ;)
Jo, i hob mi duad afoch amoi beworben. Bin daun a zu an vorstellungsgespräch eiglodn woan. Mama hob i mit khobt mit 16 woa i jo nuned mobil, und soweit mit moped, des woit i ned foan. Jedenfois hauma de glei amoi de gauze IT zagt, ois voi genau erklärt, wos fia de lehrling ois gibt, und soweida und soweida. Des geräch woa a guad, se haum ma gsogt in spätestens ana wochn was i bescheid, se haum nu an aundan bewerber. ban hamfoan daun mit da mama gredt, für und wieder, pro und contra vo HTL und lehre diskutiert, owa aum end hob i gwusst, egal wos i moch, es san beides super ausbüdungen, i werd kan fehler mochn wuascht i mi entscheid.
I hob mi daun scho während da hamfoat entschieden khobt, wenns ma de stelle aubieten, werd is nehma. Wia woan daun kane 15 min daham leit des telefon, woas de personalfrau vo denan, jo i kau aunfaungen, wenn i mog. i hob jo gsogt. somit is festgstaunden, ob 1.9.2008 woa i lehrling und ka HTLer mehr. meine ötan san daun aum nexten tog mit mia int HTL gfoan (zur anmerkungen es woa nu imma herbst, oiso nu gnua vom schuijoa üwa). wir haum mit mein klassenvorstaund gredt, und mitn abteilungsvoastaund. (de htl is in an schulzentrum, do is HAK, HAS und HTL banaund, 1 direktor und jede schui hot a betilungsvorstand). da abteilungsvorstand hot a gsogt er informiert meine lehrer das i aufhea, wei fois iagendwo amoi knopp warad mit ana positiven noten, daun muas i ka prüfung mochn, sondern se geben ma de positive.
guad, i bin weida in de HTL gaunga, meine hoibwegs guaden note khoiden (2ra udn 3ra, 2 4ra im semsterzeigniss). es woa hoit nimma sovü motivation do. I hob a fachl khobt, woa ma dawei imma schwa dau hob, des woa Grundlagen der elektrotechnik. Da lehrer woa owa schwa in ordnung. Streng, owa imma fia de schüler do. I hob daun leida im April mein Opa valoan (aundares thema, aundara blog). Des hot i daun a bissl aus da baun gschmissn. Leida hob i genau do daun an test in dem fachl khobt. natürlich voi vahaut, jz wa i auf de negativen noten gstaunden. hauma uns a prüfung ausgmocht, woebi i ma scho denkt hob, hmm eigl hot ma jo da abteilungsvorstaund gsogt i muas in so an foi ka prüfung mochn. owa wuascht, wenn i lern daun schoff i des. i hob glernt, und de prüfung a gschofft, 2ra gschrieben, da lehrer hot mi a globt, i hob daun owa frogn miassn: "herr professor, warum hob i jz eigl a prüfung mochn miassn?" hoat gsogt "najo, i woit hoit sicher dast du des kaunst. des brauchst nextes joa unbedingt". "wie nextes joa? i hea jo auf, i faung a lehr au im september" "woos? davo was i nix".
Hot dea oasch abteilungsvorstaund erm nix gsogt. Mei professor is mit dem daun a programm gfoan. wir san gemeinsaum hi, und er hot erm ziemlich zua sau gmocht warum a erm nix sogt, und ois. fia mi woas lässig zum auschaun. hob owa nu gseng das wea sein chef so aufeut. de letzten boa wochn hob i daun genossen. mei positives zeigniss hob i khobt, jeden tog a gaudi in da klass und noch da schui. supa woa des.
Dea ane oda aundare wiad se frogn, kane reiberein ka mobbing? sicha hots amoi des ane oda aundre gschichtln gebn, owa nix schlimmes, des woa ois glei wida vorbei. und mobbing. des host amoi gmocht, bist ban direktor gsessn. dea hot da genau amoi gsogt loss des, fia des gibts do ka toleranz. wennst as numoi gmocht host bist gflogn. do is richtig hoat durchgriffen woan, owa des find i guad so, aussadem is a gaudi mit olle nu vü lässiger, ois wia wennst an ausschliasst.
des woas scho wida. mia foin schowida an haufn sochn ei de i schreibn mecht. wiad glaub i ned so laung dauern bis wida wos zum lesn gibt.
pfiat eich
