sodale, i moch amoi an klan sprung in da zeit. bis jz hob i eich vo meina schuizeit dazöht, es gibt owa nu vü mehr vo mein leben zum dazöhn, drum hob i beschlossen i werd eich davo in meine blogs dazöhn. hoffantlich gibts daun a erfahrungsaustausch und ois, üwa des darad i mi gfrein.
sommer 2013, nuned laung her, owa weas nimma was...des woa da sommer wos üwan juli/august 4-5 wochen laung 35°+ khobt hot. jedenfois woas aunfaung juli. mein freindin (zu dea zeit woama 2 joa zaum, erzähl i eich a aundas moi vl genauer) hot scho ferien vo da uni khobt, i hob mittlaweile in wien gwohnt und ghacklet. woa oiso imma nua aum wochenend aum laund draussen (ba dea hitz geht nix üwa an bodeteich oda an fluss mit ana koit hüsn oda spritzer). Jedenfois woas scho länger so das de beziehung nimma so gaunz funktioniert hot. haum zum teil aundare interessen entwickelt, owa a so hots afoch imma nimma passt. i hobs nuimma fuachtboa gern khobt, und dad a jz nuimma ka schlechtes wort üwa se valian. jedenfois hob daun mit an guaden freind vo mir, nenn ma erm amoi Max gredet. dea hot se mei gschicht aukheat und daun gsogt "wast wos. du frogst mi wost do jz duan soist. owa so wiast du redst und wiast mi du jz auschaust, host innen drin dei entscheidung scho troffn. nua brauchst wen dea da des bestätigt. i sog da nua: moch des wost du fia richtig hoitst, und des mit demst du glücklich bist". na bumm. des woa de ungschminkte woaheit, owa genau des wos i braucht hob. i hob de beziehung daun beendet. do is ma daun amoi ned guad gaunga.
Des gaunze woa a samstag. i hob daun in max augruafen und erm gfrogt ob a zeit hot. sicha hot a des, haum uns troffn, und dea guade mau hot a bier a mitkhobt. so sama dogsessen, bis um 3 in da frua, bierli zischt, und gredt und gredt. supa woa des.
Haum uns glei ausgmocht, in freitog nehma uns frei, aum donnerstog gemma fuat. des hauma glei fia de nexten 4 wochen widahoit. oiso 5 4 tage wochn khobt, und brav fuat gwesn. mehr haum de chefs ned zualossn. owa de 5 wochn werd i nie vagessen. vo montag bis donnerstag aum obend imma irgendwo in wien mit olle troffn, bier/radler/gpritzte drunga, gaudi khobt, a boa haum de gitarre mitkhobt, iagendwöche sinnlosen liada gpsüt mit lustige texte, de meistens pervers und ned jugendfrei woan, versehen, afoch spaß khobt und de zeit genossen. donnerstag sama daun imma olle in wien fuat gwesn, haum unsa staumbar, do gemma jz a nu imma hin. jedenfois is de bar so: du gehst mit deine freind eine, nüchtern kimmst do unmegli aussa, und wennst drauf aus bist, gehst ned ala ham. aum freitog daun imma in kota und in schweinehund überwunden, des sackl pockt, und ausse aufs laund. haum do unsan bodeteich, dea is zwoa öffentlich owa richtig klass. a ehemolige schotagruam, dea hot nie mehr ois 22 grad, ned so wie de woamen freibäder üwaroi. a gastro hots duat a gebn, bosna, hot dog, schnitzsemme, spritzer. wos brauchst mehr. bis zum zuasperren imma duatgwesn, daun kurz haum duschen und umziagn. de mama hot se imma gfreit das i hamkuma, woa owa nie länger ois a hoiwe stund daham. Und daun freitog/saumstog imma de zötfesta in da umgebung unsicher gmocht.
da saumstog hot imma so augschaut: aufkreun, zaumpocka, eine ins auto, ob zum bodeteich, ban einegeh glei amoi da erste spritzer :D in gauzen tog ban bodeteich chün, spritzer dringa, de vorige nocht numoi reveu passieren lossn, koaten düwen, depad reden, schlofn. aum obend wida fuat, sonntag woa daun wie da samtog, nua aum obend wida iagendwie noch wien kuma, wei aum montag woa wida oawaten augsogt.
de 5 wochn woan echt a wahnsinn. wia woan do dau imma zu dritt untawegs aum laund, da max, da david (nenn man amoi so) und i. wia 3. i sogs eich do is a freindschoft entstaunden. des wünsch i jedem. wia haum üwa ois gredt. bledsinn, oawat, madlm, gefühle, erfahrungen..wiakli ois. is jz a nuimma so, nua wegn dan hockn, seng ma uns nimma jeds wochenend leida, und unta da wochn is a schwa.
Gegen ende august is weda daun a weng schlechta woan. woa amoi guad de obkühlung. Do sama daun hoit aum wochnend a in wien blieben zum fuatgeh. aum bledan woa das de madln daun wieder mehr aukhobt haum :P
Jedenfois werd i mi imma aun den sommer 2013 erinnern. sovü nette und leiwaunde leit kenna glernt. sovü dalebt, sovü gaudi gmocht. frequency 2013 woa a nu wos gaunz besonderes, owa festivals werd i an eigenen blog mochn.
des woas dawei wida, pfiat eich
