Eigentlich soitat da Fraunz diesen Blog schreibn, oba i bin amoi so frech und moch des, ohne erm vorher zan frogn. Gestan hob i wos üba Deutschlandismen glesn. Oiso dass in Österreich vor allem vü junge Leit "die Cola" statt "das Cola" oder "der Junge" stott "der Bub" sogn und lauta so Sochn hoid. Des sei auf de Fernsehkanäle zurückzuführn. Oiso ob jez ana nur ORF schaut oda den Fernseher ausschließlich für RTL etc. aufdraht.

Find i lustig, dass ma dabei dem Fernsehn die ganze Schuld zuaweist. Wos is, wenn a Elternteil aus D kummt? Daun kaunst nu so vü ORF schauen, oba wirst vermutlich trotz Wohnhaft in Österreich de ane oda ondare deitsche Phrase übanehmen.

Wos mia olladings gfoit, is die Tatsache, dass ma in D scheinbor jedn mit "Hallo" oredt. Waun ana "Grüß Gott" sogt, miasat ma afoch amoi drauf antwortn "Moch i, fois i erm jemois sehng suit". I glaub, des probier i amoi aus. Generell mog i des "Hallo" und "Tschüss" eha net, i find "Seas" bzw. "Grias di" und "Pfiati" vü bessa.

Amoi hob i mei Mobilbox auf "Jo Haaaaaaallllloooooo" gändert. De Leit san reihnweise drauf einegfoin. I glaub, dass vo 10e ana den Biepton ernst gnumma hot. Jednfois hob i des daun boid wieda gändert, da ma des Obhean da (unnetign) Sprochnochrichtn auf Daua zvü Orbeit wor. Außadem haums de meistn eh noch 1-2 Fails begriffn, wie da Hos rennt. Somit warads daun mit da Zeit eh nur mehr hoib so witzig gwesn.

A gewissa Kommentar unta dem eigentlichn Artikel üba de Deutschlandismen wor sowos vo unnedig. Ersterer hot ausgsogt, dass mia jez a endli sche redn lerna, wauma si dem großn Bruada onpassn. Wieso muas ma des Deitsche vaeinheitlichn? In da Schweiz redt doch a jeda, wie erm da Schnobel gwochsn is. I werd sicha net mein Dialekt aufgem - oba i kau im Notfoi schena redn. Waun i heit an Hawara aus Hannover hättat, daun is des ka Problem, dass i erm puncto Sproch bisl entgegenkumm. Oba Dialekt zwecks Sprach-Vereinheitlichung an den Nagl hängen - damit reißt ma bei mir ka Leibal.

Da Autor vo dem Kommentar soi hoit noch D auswondan, waun erm unsa Mundort so aufeut. Oba i wett, er wird trotzdem in Österreich huckn bleim und weita üba unsare (deitschn) Dialekte nörgeln... Erm is hoid net zan höfn...

Unlängst wor i ban Orzt und hob 2 Befunde kriagt. Es is drum gongen, dass die aktualisiert wordn san. I hob daun de Sprechstundnhüfe gfrogt, obs ma eh bade Dokumente nei ausdruckt? Wia i "bade" gsogt hob, hot de dreingschaut, ois darad i ihr a Puffn aufd Stirn hoitn. De hot vamutlich "Blade" vastondn. Jojo, die Wohrheit duat oft weh...

Hobts ihr eich scho moi übalegt, dass ma mit unsam Dialekt recht guat Englisch lerna kau? Waun i jeza ausn Fensta auseschau, daun is ois grau in grau. Oda ondas gsogt: Days is a shy sweater.