Es is a leidiges Thema – Vaschlofn! Wer kennts ned? Du mochst da wos aus mit diverse Leid, soist di mit erna treffen, oba wos is? RICHTIG, ma liegt liaba im Bett und genießt de Beziehung mit da Bettdeckn. Hot zur Folge, dass de Leid olle relativ grantig werdn und da am liabstn ane Woschn dadn. Oiso wos koma dagegen doa? A jeda der se jetzt denkt „stö da an Wecka!“ is nu nie mit 3 Promü um 3 in da fruah ins Bett gaunga und hot 4 Stund späta wieder aufsteh miasn. Des geht ned!

Und selbst wonnst as schoffst dasd aufstehst, legts di nach 3 Schritt eh von söba wieder hi. Oba aufsteh in da Restfettn is sowiso a Thema für sich.

Oiso Thema Wecker: An und für sich a guade Erfindung wonn man ned so leicht wieder ausschoitn oder auf schlummern stön kummt. De Schlummerfunktion is sowiso vom Satan erfunden woan. A Mensch im Hoibschlaf is meina Meinung ned dazu fähig so a Entscheidung zu treffen weil meistens bleibts ned bei 5 Minuten schlummern. Aus 5 werdn 10 aus 10 werdn 15 und so weita, bis dasd am End wieder dostehst und verpennt host. Oiso Schlummerfunktion – nur am Wochenend wons nix zum Toa gibt und es scheissegal is wonn ma aufsteht. Es gibt do nu de Möglichkeit den Wecker oafoch a poa Meter vom Bett entfernt histön. Vom Prinzip her koa deppade Idee. Nur homs do ned bedenkt, dass Leid gibt (ICH) de an verdaumt niedrigen Blutdruck hom wons schlofn. Soll heißen wonn da Wecker plärrt, i aufsteh den scheiss Wecker ausschoit und mi daun wieder niederleg. Des witzige an der gaunzn Soch is de, dass i von dem gaunzn nix mitgriag. Wonn ma am nächsten Tog wer vazöht, dass i im Schlaf quer durchs Gemüse spaziert bin, dat i erm mit ziemlicha Sicherheit an Vogl deitn a wonns wahrscheinlich stimmt.

Bleibn ma beim Wecker und kuma zu den verruckten Sachen dabei:

I hob jetzt noch unzähligen moi Verschlofen nach ana alternative zum Wecker gsucht. Hab leida auf de schnelle nix gfunden, dafür aber a etwas andere Variante vom Wecker. De gschicht mecht i eich natürlich ned vorenthalten.

http://www.monsterzeug.de/Wecker-mit-Rakete.html

I hob des Teil im Internet gfunden und hob ma docht des muas i afoch hobn. Gesagt Getan! Bestöht auf Amazon 2 Tog späda woas do des Drumm. Wie funktioniert des gaunze jetzt? Jo hob i ma am Anfang ah denkt, oba de ausschließlich japanische Anleitung hot ma do ned direkt a Auskunft gebn kina. Oiso learning by doing Oafoch moi an Probealarm eigstöt in 5 Min. Kurz drauf, i sitz grod mim Bier auf da Terassn, mochts an Plärra, dasd glaubst de Russn greifen oh. Grissn hots mi. und es Bier is ma a aus da Haund gfoin. Schnö umdraht und gseng, dass nur da wecker woa. „Fettes Teil“ hob i ma docht und woit na ausschoitn. Denkste! Noch 3 moi Knopfal drucka leit der depadde Hund nu imma. Do siag i auf da Verpockung von dem Teil dass ma de Raketen wieder ostecka muas, das da Wecker wieda ausgeht. Tjo wo is des Klumpad iatz higflogn? Natürlich super wennst an Garten host mit gfühlte 10000 Streicher. Jo jetzt steh i do mit an scheiss Wecker der wie Oide plärrt de grod a Kind griagt und i muas des Gegenstück dazu finden. Jo es woa im Endeffekt wia die Nadel im heuhaufen. Gfunden hob is trotzdem und danach ah glei wieder augsteckt – Wecker aus. Nachdem i mi von dem Stress (und Schock) erstmoi bei ana Hüsn erhoin hob miasn, bin i zu dem Entschluss kema, dass i mit dem Wecker nie wieder verschlof.

Die erste Wochn mitm neien Wecker hat super funktioniert, vielleicht oba oanfoch nur weils wos neichs woa... A wochn drauf am Mittwoch – aufsteh um 7:00 - Vortog fuat gwen bis ind nocht (do sama wieder beim Thema Restfett). 7 Uhr des läuten vom Wecker penetriert mei Ohrwaschl. Mi reissts, i bin saumiad, Schädlweh. null Bock dass i jetzt aufsteh und so a gschissene Raketen suach.

I hob jo vorher scho erwähnt, dass ma im Halbschlaf koane Entscheidungen treffn soit. Nu schlimma is wennst Restfett und Halbschlaf kombinierst. Es Gaunze hot ned guad fian Wecker ausgschaut. Und spätestens wia a mit 50 sochn gegen d Wand gflogn is woas vorbei. Jo jetzt lieg i do mit an hinigen Wecker in da eckn und moch mas wieder gmiatlich im Bett. Wia des gaunze daun wieder geendet hot konn ma se glaub i denga. Verpennt hob i – „14 nicht beantwortete Anrufe“ vom Chef – aufgstaundn bin i irgendwon moi um 12 sowos.

I bin deswegen auf den entschluss kema, dass soiche ausgfoinen wecker nur wos fia Chinesen san. Des woa wahrscheinlich a da grund warum de Anleitung ned auf Deitsch woa.

So des woa jetzt amoi gnuag vom gaunzn Wecker-Desaster.

Aufstehen durch Dritte (auf guad deitsch: aufgweckt werdn):

Is a super Soch, fost imma zuverlässig. Es gibt nur a poa Probleme bei der Soch.

1.) Du muast di auf wen ondan verlossn. Won der ondare genauso verlässlich beim Aufsteh is, wie da Ozzy Osbourne beim Sex mit da Hausfrau, dann hast a glick. Nur leider is eher as Gegenteil da Fall.

2.) Restfett besser koa Person de nu lebn wü einaschickn!

Wonn ma de 2 Punkte beachtet und umgeht sollte in de meisten Fälle as aufsteh koa Problem sei.

Am besten du trainierst da dei Frau, dass die so aufweckt wia a Bundesheer Ausbildner. De san imma so sanft beim einakema und haben meistens as Frühstück ah glei mit. (Achtung do foat da Ironie-Zug). Ohne Scheiss mit dem „Tagwache“ plärrn in da Fruah bist aufgsprunga und woast putzmunter. Najo song mas so, eigentlich bist nur aggresiv worn. weilst am Ausbildner irgendwos nochschmeissen woitst. Aber ma konn sagen was ma wü – ghoifn hots! Oiso foats in Army-Shop kaufts schwarze Stiefel fia eicha Oide und a uniform nu dazua.

Oba warum hoast der Text eigentlich „Warum man nicht verschlafen soll!“

Gaunz oanfoch wonnst ned verschlofst, ersporst da den gaunzn scheiss den i auf de letzten 1 ½ Seitn gschriebn hob. Oiso stehts brav auf in da Fruah und es miasts eich koan fliegenden Dildo kaufen beziehungsweise a Uniform zum aufsteh.

In dem Sinne ________